Okwa Banya Roma
10 Balikyethu, eriyisunza ly’omuthima waghe n’erisaba Nyamuhanga omw’ilemba-lemba busana nabo, omo kwenene ni busana n’omulhamu wabo. 2 Kundi ngabahera obwema ngoku bawithire Nyamuhanga y’omuhwa aliwe isikwamana n’obuminya obuhikire. 3 Kundi busana n’erithendi minya erithunganene lya Nyamuhanga aliwe erianza eriyihiriraho eryabo, mubathaghondera erithunganene lya Nyamuhanga. 4 Kundi Kristo ya nduli y’Emighambo, nuku obuli mundu oyukakanganaya erikirirya angabana erithunganene.
5 Kundi Musa akahandika okwa lithunganene eririho busana n’Emighambo athi: “Omundu oyukakolha emyatsi eyi akendi syabyaho busana nayo.” 6 Aliwe erithunganene erikasa busana n’erikirirya likabugha lithi: “Isiwabugha omo muthima wawu wuthi, ‘Nindi oyukendi hethukira elhubulha?’ ni bugha ambu, eriyandaghalya Kristo, 7 kutse, ‘Nindi oyukendyandaghalira omwa kyuna kiri-kiri ekithawithe kabuno?’ ni bugha ambu, erilhusya Kristo y’omwa baholi.” 8 Aliwe Amasako akabugha athiki? “Ekinywe kine hakuhi nawu, omwa buno bwawu n’omo muthima wawu”; ni bugha ambu, “ekinywe” ky’erikirirya, ekyathunemuthulhughania. 9 Kundi wamathulhagho omwa buno bwawu embere sy’abandu wuthi Yesu ni Mukama, kandi wukikirirya omo muthima wawu ngoku Nyamuhanga mwamulhubukya okwa baholi, iwukendi syalhamibwa. 10 Kundi omo muthima omundu akakanganaya erikirirya busana n’erithunganene, aliwe omwa buno omundu akathulhughanaya embere sy’abandu busana n’omulhamu.
11 Kundi amasako akabugha athi: “Sihali oyukahira erikirirya liwe omw’iyo oyukendi syalhabira ahisi.” 12 Kundi sihali embaghane ahakathi-kathi k’Omuyuda n’Omugiriki. Hali Omukama mughuma okwa bosi, oyukaha ndeke abosi abakamubirikirako. 13 Kundi “obuli mundu oyukabirikira erina lya Yehova akendi syalhamibwa.” 14 Nomwabine, bangamubirikira bathi bamabya isibali bathamw’ikirirya? Kandi bangamw’ikirirya bathi isibali bathamwowako? Kandi bangamwowako bathi isihali mundu oyukathulira? 15 Kandi banga thulira bathi bamathendi thumwa? Ngoku kihandikire kithi: “Ebisandu by’abakathulhughanaya engulhu yuwene y’emyatsi mibuya ka byuwene kutsibu!”
16 Nomwabine, abosi mubathaghendera okwa ngulhu yuwene. Kundi Isaya athi: “Yehova, nindi yuwabir’ikirirya emyatsi eyo owa thukabugha?” 17 Neryo erikirirya likasa busana n’emyatsi eyik’owibawa. N’emyatsi eyik’owibawa yikasa busana n’ekinywe ekihambire oku Kristo. 18 Aliwe ngabulhaya, Mbwino mubathowa? Kundi nibya, “omulenge mw’owibwa omwa kihugho kyosi, n’omwatsi mwahika okwa nduli sy’ekihugho.” 19 Aliwe ngabulhaya, mbwino Israeli mwalemwa eriminya? Eritsuka, Musa akabugha athi: “Ngendi syaleka iwakwa erihali erilhabira omwa kithe kihanda; ngendi syaleka iwahithana kutsibu erilhabira omwa kihanda ekikiru.” 20 Aliwe Isaya akabya n’obuthubaha bunene n’eribugha athi: “Abanyibana babathabya bakanyisondya; munaminywa n’abathabya bakanyibulyako.” 21 Aliwe akabugha bino okwa Israeli: “Ekiro kyosi nabirisanzira abathowa n’ab’emithima yikalire b’ebyalha byaghe.”