Ebaruha y’Erimbere Okwa Banya Tesalonika

1 Paulo, Silvano,* na Timoteo, okwa kithunga ky’abanya Tesalonika ekimathikene na Nyamuhanga Thatha n’Omukama Yesu Kristo:

Ambi olhukogho n’obuholho ibyabya nenyu.

2 Mughulhu wosi thukasima Nyamuhanga omughulhu thukab’ahulha inywe bosi omwa misabe yethu, 3 kundi thukalholha embere eryibuka omubiiri wenyu ogho mukakolha buthaleghulha, akaghalha ako mukahiraho omo lhwanzo, n’eriyiyinia lyenyu busana n’amaha wenyu omo Mukama wethu Yesu Kristo embere sya Nyamuhanga wethu kandi Thatha. 4 Balikyethu, abo Nyamuhanga anzire, thunasi ngoku mwabasombolha, 5 kundi engulhu yuwene eya thukathulha muyithabahikako omwa binywe bisa aliwe n’omwa maaka n’omwa mulimu abuyirire n’omw’ikakasya erighumire, ngoku munasi nga muthwabya bandu abali bathi omwa kathi-kathi kenyu busana n’erighasirwa lyenyu. 6 Kandi mumwathugherererya n’erigherererya Omukama, kundi mumwaligha ekinywe omw’inuba linene imune n’etseme y’omulimu abuyirire, 7 neryo mumwabya ky’erileberyako okwa bikirirya bosi e Makedonia ne Akaya.

8 Okwenene kuli kuthi, sibugha indi mumwathulhughania ekinywe kya Yehova e Makedonia ne Akaya lisa aliwe n’erikirirya lyenyu omu Nyamuhanga lyabirilhandaghana erihika haali omwa buli mwanya, nuku sithubye n’ekyosi-kyosi eky’eribugha. 9 Kundi ibobene-bene bakabera erikania okwa mughulhu ithwe thwatsuka eribabana kandi ngoku mwasuba oku Nyamuhanga erileka eriramya esyosanamu syenyu nuku mukolere Nyamuhanga oyuliho kandi ow’okwenene, 10 n’erilindirira Mughalha wiwe erilhua elhubulha, oyo alhubukaya okwa baholi, ni bugha ambu, Yesu, oyukathusabulha okw’ihithana erikasa.