Ebaruha ya Yakobo
3 Balikyethu, si bugha indi abangyi omw’inywe batholere ibabya bakangirirya, ithunasi ngoku thukendi syabana eritswera erikalire. 2 Kundi ithwe bosi thukathwikalha* mirundi mingyi. Omundu amabya isyanga thwikalha omwa binywe, iniahikene, iniabirithoka erisondolha n’omubiri wiwe wosi. 3 Thwamahira omwa buno bw’esyosabayiri mw’ebikoba nuku sithughondere, thukasondolha n’omubiri wasyo wosi. 4 Mulebaye n’amathu: Nomwane manene-manene kandi iniakakunawa n’ekiyagha ekikalire, akasondolibawa omwa syongahya ngengenge erilholyagho eyo oyukaghendayagho anzire erighenda.
5 Neryo kuthya, olhulimi ni katsuku kake k’okwa mubiri, aliwe lhukayihalhamba kutsibu. Lhangira ngoku n’othuliro thuke thukathimaya omusithu munene! 6 Olhulimi nalho ni muliro. Olhulimi lhuk’imanira ebithathunganene byosi by’ebitsuku byethu by’omubiri, kundi lhukatsandaya omubiri wosi n’erithimya engebe* yosi omwa muliro, kandi lhukathimibawa omwa muliro omwa Gehena.* 7 Kundi obuli mulingo w’ebisoro by’omoli n’esyonyonyi n’ebikakulhulhuka okwa kithaka n’ebihangikwa by’omwa ngetse byangana thabalhwako kandi abandu babiribithabalhako. 8 Aliwe sihali omundu oyuwangathabalha okwa lhulimi. Silhuli sondolhawa kandi ni lhubi, lhwoswire mw’obutwa obukitha. 9 Omw’ilho thukapipa Yehova,* Thatha, kandi omw’ilho thukathakira abandi ababiribyaho “omwa kisosekanio kya Nyamuhanga.” 10 Omwa buno bughumerere mukalhua emighisa n’erithakira.
Balikyethu, emyatsi siyitholere yikabya yithya. 11 Engununuko siyirihulhukaya amaghetse awuwene* n’awanungunire, ikyanabya? 12 Balikyethu, omuthi w’omuthini syanga hethya emizaituni, kutse emizabibu siyangahethya emithini, ikyanabya? Kutse amaghetse w’omunyu syanga hulhukya amaghetse awuwene.
13 Ow’amenge kandi oyukayitheghereraya omw’inywe y’owahi? Emibere yiwe mibuya yikanganaye emikolere eyikakolhawa omwa bwolho obukalhwiririra omwa amenge. 14 Aliwe mwamabya imuwithe eritsuru erikalire n’obuhaka* omwa mithima yenyu, isimwayiheka n’eribugha amabehi okwa kwenene. 15 Aya si menge awakalhua endatha; ni w’ekihugho, aw’olhusoro-soro, aw’esyombinga. 16 Ahosi-hosi ahali eritsuru n’obuhaka,* hakabya ihane n’eputsu-putsu n’obuli kindu kibi.
17 Aliwe amenge awakalhua endatha erimbere erire, ni w’obuholho, ni w’obuyitheghererya, akabya inianayitheghekire eriowa, oswire mw’obughanyiri n’ebighuma ebyuwene, syalimo kasolholho, syalimo mathebo. 18 Eryongera okw’ekyo, ekighuma ky’erithunganene kikaherawa omwa mibere y’obuholho busana n’abakahiraho obuholho.