Emibiiri y’Abakwenda
5 Aliwe, omulhume oyukahulhawamo Anania haghuma na mukali wiwe Safira, mubaghulya okwa ebya babya bawithe. 2 Aliwe omwa bubiso-biso mwabisa okwa syosente mukali wiwe inianasi, neryo amalethera abakwenda b’esyasakaho. 3 Aliwe Petero mwabugha athi: “Anania, busana naki Sitani abirileka iwatheba omulimu abuyirire kandi omwa bubiso-biso iwabisa okwa syosente esiryalhua okw’irima? 4 Eririma ni lyawu, kwabithe? Kandi muwukabya wabirilighulya, esyosente silhue ini syawu, kwabithe? Neryo busana naki muwukathwamu erikolha ekindu ekiri ng’eki omwa muthima wawu? Wabiritheba Nyamuhanga, butsira abandu.” 5 Anania abere owa ebinywe ebi, mwawa ahisi, amaholha. N’abosi abowa okw’eki, mububaha kutsibu. 6 Neryo abalhwana mubahangana, bamamubohera omwa syongyimba, bamamuheka, n’eriyamutsika.
7 Neryo habere halhaba saha ng’isathu, mukali wiwe mwasa, isyasi ekyabere. 8 Petero mwamubulya athi: “Thambwira, esi sy’esinalyalhua okw’irima lyenyu?” Omukali mwabugha athi: “Ee, syan’esyo.” 9 Neryo Petero mwamubwira athi: “Busana naki inywe bosi babiri mumukalighirana erilenga okwa mulimu wa Yehova? Lebaya! Ebisandu by’abalyayatsika mwira wawu bine okwa lhukyo, nawu bakayakuthwalha.” 10 Aho naho omukali mwawa embere siwe n’eriholha. Abalhwana babere b’ingiramo mubeya iniamabiriholha neryo mubamuheka bamayamutsika hakuhi na mwira wiwe. 11 Neryo ekithunga kyosi kuthya n’abosi abowa emyatsi eyi mububaha kutsibu.
12 Eryongera okw’ekyo, ebiminyikalho bingyi n’ebikathikaya mubyalholha embere erikoleka omwakathi-kathi k’abandu erilhabira omwa byalha by’abakwenda; kandi abosi ibakayihindanaya haghuma omwa Bbalaza y’Esyonduhi* ya Solomona. 13 Ni kwenene, sihali n’omughuma w’okwa bandi oyuwathunga obulhume-lhume bw’eribayiyungako; aliwe abandu babya ibanemubakaniako ndeke. 14 Ekilengire ekyo, abakikiriraya Omukama mubalholha embere eriyongera, abalhume n’abakali bangyi. 15 Nibya mubaletha abalhwere okwa syonzira nene-nene n’eribalhalya okwa hikyingo n’okwa mikeka, nuku Petero akendibya akalhaba, hakiri akatsutsu kiwe ikabya ikanganahika okwa baghuma b’okw’ibo. 16 Kandi abandu bangyi erilhua omwa syotawuni esye Yerusalemu mubalholha embere eryasa, ibanahekire abalhwere n’abakaghalhawa busana n’emirimu mibi, kandi abosi mubalhamibwa.
17 Aliwe omuhereri mukulhu mwahangana n’abosi ababya haghuma nayu, ababya b’omwa kadini k’Abasadukayo kandi babya boswire mw’erihali. 18 Neryo mubahamba abakwenda n’eribahira omwa ngomo. 19 Aliwe omwa kiro omo, omumalaika wa Yehova mwakyungulha esyonyuyi sy’engomo, amabahulhukyamo n’eribugha athi: 20 “Mughende mwimane omwa hekalhu kandi mulhole embere eribwira abandu ebyosi ebihambire okwa ngebe eyi.” 21 Babere babiriowa eki, mub’ingira omwa hekalhu omwa ngyakya-ngyakya bamatsuka erikangirirya.
Neryo omuhereri mukulhu n’ababya nayu babere bahika, mubabirikira e Sanhedrini* n’abakulhu abosi b’abaana ba Israeli bo haghuma, kandi mubathumira okwa bakwenda abali omwa ngomo bathi balethawe embere syabo. 22 Aliwe abapolisi babere bahikayo, mubathabeya omwa ngomo. Neryo mubasubulha bamasyathulhagho, 23 bathi: “Muthukeghaya engomo iyinakyingire kandi iyinatheghibirwe, n’abatheya iban’imene okwa syonyukyo, aliwe muthukabya thukakyungulha muthuk’eghaya isimuli mundu.” 24 Neryo omukulhu w’abatheya b’okwa hekalhu n’abahereri bakulhu babere bowa ebinywe ebi, mubasweka bamabulha nga ni kyahi ekikendi kwamako. 25 Aliwe omundu mulebe mwasa amababwira athi: “Lebaya! Abalhume abo mwahira omwa ngomo bane omwa hekalhu, ban’imene, banemukangirirya abandu.” 26 Neryo omukulhu w’abatheya b’ehekalhu mwaghenda n’abapolisi biwe n’eriyaletha abakwenda, aliwe isihathabya malhwa, kundi babya bakasagha bathi abandu banganab’itha omwa mabwe.
27 Neryo mubabaletha n’eribimania embere sye Sanhedrini.* Neryo omuhereri mukulhu mwababulya 28 athi: “Muthwabakongomerera thuthi isimwathasyalholha embere erikangirirya omwa lina eri, aliwe lebaya! mwabiryusulya e Yerusalemu mw’erikangirirya lyenyu, kandi mwabirithwamu erithuhirako omusasi w’omulhume oyu.” 29 Neryo Petero n’abandi bakwenda mubabugha bathi: “Thutholere ithwaghondera Nyamuhanga ng’omuthabali butsira abandu. 30 Nyamuhanga w’abathatha-kulhu bethu mwalhubukya Yesu, oyo mw’itha omw’imuhanika okwa muthi.* 31 Nyamuhanga mwahamya oyu ng’Omusondoli Mukulhu kandi Omulhamya omw’imuhira okwa byalha biwe by’amali, erileka Abaisraeli ibayisubamo n’erighanyirwa ebibi. 32 Kandi thuli bema b’emyatsi eyi, kuthya n’omulimu abuyirire, ogho Nyamuhanga abiriha abakamughondera ng’omuthabali.”
33 Babere babiriowa eki, mubahithana kutsibu,* bamanza erib’itha. 34 Aliwe Omufarisayo oyukahulhawamo Gamalieli mwahangana omwa Sanhedrini;* abya mukangirirya w’Emighambo oyo abandu bosi babya basikirye, neryo mwahamulha athi bahulhukiraye abalhume abo b’eyihya habw’akathambi kake. 35 Neryo mwababwira athi: “Balhume be Israeli, muyitheghaye okwa kya mukanza erikolha okwa balhume aba. 36 Ng’eky’erileberyako, ebiro ebi bithe byahika, Teuda mwahangana, iniakabugha athi nayu ni mundu w’ekitsumbi, n’omughanzo mulebe w’abalhume nga 400, mubayiyunga okwa kyama kiwe. Aliwe mw’ithibwa, n’abosi ababya bamukwamire mubapanzikana n’ekyama mukyahwaho. 37 Enyuma waho, Yuda Omugalilaya nayu mwahangana omwa biro by’erihandikwa, kandi mwabana abakamukwama. Omulhume oyo nayu mw’ithibwa n’abosi ababya bamukwamire mubapanzikana. 38 Neryo busana n’emyatsi eyi, ngababwira, simuyingiraye omwa myatsi y’abalhume aba, aliwe mubaleke. Kundi omubiiri oyu amabya iniakalhua okwa bandu, iniakendi hwaho; 39 aliwe amabya iniakalhua oku Nyamuhanga, isimwendi thoka eribaghunzaho. Bithe bithya, imukendi yisanga imukalhwa na Nyamuhanga iyuwene-wene.” 40 Neryo mubaghendera okw’ihabulha liwe, bamabirikira abakwenda, bamabahunza,* n’eribakunga bathi balekere aho erikania okwa lina lya Yesu, neryo mubabaleka bamaghenda.
41 Neryo mubalhua embere sye Sanhedrini* ibanatsemire kundi babya ibabirighanzwa ng’abatholere erihemulhwa busana n’erina liwe. 42 Kandi obuli kiro omwa hekalhu na nyumba okwa nyumba, mubathaleka erilholha embere erikangirirya n’erithulhughania engulhu yuwene eyihambire oku Kristo, Yesu.