Ebaruha y’Erimbere Okwa Banya Korinto
14 Mukwamirire olhwanzo, aliwe imunemulhandamirira* ebihembo by’obunyakirimu, aliwe ibbwa kutsibu-tsibu muhe obuminyereri. 2 Kundi oyukakanaya omwa syondimi, akabya isyalikanaya n’abandu, aliwe na Nyamuhanga, kundi sihali oyukabyowa, aliwe omwa mulimu, akabugha esyombitha sibuyirire. 3 Aliwe, oyukaha obuminyereri akahimba abandu kandi iniabahira mw’omuhwa n’eribahumulikania omwa by’akabugha. 4 Oyukabugha omwa syondimi akayihimba iyuwene, aliwe oyukaha obuminyereri akahimba ekithunga. 5 Nangananzire inywe bosi imwabugha omwa esyondimi, aliwe kutsibu-tsibu nganzire imwaha obuminyereri. Kundi kwenene oyukaminyerera alengire oyukabugha omwa syondimi, mbwino inianalyabihindulha, nuku ekithunga kyanga himbwa. 6 Aliwe okwa ndambi eno balikyethu, kyamabya indi namasa n’erikania nenyu omwa syondimi, iningendi baghasira indi namathendi kania nenyu omw’ibugha omwatsi w’eribisulirwa kutse omw’iminya kutse omw’iha obuminyereri kutse omw’ikangirirya?
7 Kwabine bithya n’okwa bindu ebithehumulha ebikalhua mw’emirenge, mbulha ni nyabulere kutse enanga. Hamathendibya erihindulikania omulenge, ebikawathawa omwa nyabulere kutse omwa nanga ibikendi minywa bithi? 8 Kundi engubi yamabugha omwa mulenge owathekengeka, inindi yukendi yitheghekera amalhwa? 9 Kuthya, inywe mukabugha omwa syondimi mwamathendibugha ebyanga yitheghereribwa, in’indi oyuwangaminya ebyamabuwa? Omo kwenene, ebyawukabugha ibikendibya ibikalhabira omwa kyanya. 10 Omwa kihugho mwanganabya emiringo mingyi y’emibughe, aliwe sihali mulingo owathawithe eky’akamanyisaya. 11 Kundi namathendi yitheghererya ebikabughawa, iningendibya mubunga oko yukakanaya, n’oyukakanaya iniakendibya mubunga okw’ingye. 12 Neryo kuthya nenyu, kundi mwanzire kutsibu eribana ebihembo by’omulimu, mw’ongere erisaba eribya n’ebihembo omwa bungyi ebikendi himba ekithunga.
13 Busana n’ekyo, oyukabugha omwa syondimi asabe erithokesibwa erihindulira abandi. 14 Kundi namabya iningasaba omwa syondimi, ekihembo kyaghe ky’omulimu iky’ekikasaba, aliwe obulengekania bwaghe isibuthaghasaki. 15 Neryo ni kyahi ekyangakolhwa? Ngendi saba omw’ikolesya ekihembo ky’omulimu, aliwe kandi ngendi saba omw’ikolesya obulengekania bwaghe. Ngendyimba esyonyimbo sy’eripipa omw’ikolesya ekihembo ky’omulimu, aliwe kandi ngendyimba esyonyimbo sy’eripipa omw’ikolesya obulengekania bwaghe. 16 Kundi ibbwa wamapipa omwa kihembo ky’omulimu, omundu wa buli kiro oyuli omwa kathi-kathi kenyu angathoka athi eribugha athi “Amina” wukaha ewasingya, isyasi ebyawukabugha? 17 Ni kwenene, wukaha ewasingya omwa nzira eyitholere, aliwe owundi mundu syalihimbawa. 18 Ngasima Nyamuhanga kundi ngakanaya omwa syondimi nyingyi kwilhaba inywe bosi. 19 Aliwe, omwa kithunga kamwanya inakania binywe bithano omwa bulengekania* bwaghe, nuku ngakangiriraye* abandi, omwakanya k’ebinywe muthwalho omwa syondimi.
20 Balikyethu, si mubye baana balere omw’iyitheghererya lyenyu, aliwe mubye baana balere okwa kibi; kandi mukule ndeke omw’iyitheghererya lyenyu. 21 Omo Mighambo kihandikire kithi: “‘Omo syondimi sy’ababunga n’omwa minywe y’ab’ehandi ngendi kania n’abandu aba, nomwabine, sibendi nyihulikirira,’ Yehova athya.” 22 Busana n’ekyo, esyondimi sikiminyisyo okwa bikirirye aliwe ni ky’abathikirirye, n’eriminyerera si busana n’abathikirirye aliwe busana n’abikirirye. 23 Neryo ekithunga kyosi kyamahindana haghuma omwa mwanya mughuma kandi abosi bakakania omwa syondimi, aliwe abandu ba buli kiro kutse abathikirirye bakabayiyungako, isibendi bugha bathi mwabiribya basire? 24 Aliwe inywe bosi mwamabya imunemuminyerera neryo oyuthikirirye kutse omundu wa buli kiro akabayiyungako, iniakendi kungwa n’erilebibwa ndeke n’abosi. 25 Neryo esyombitha sy’omuthima wiwe isikendi minyikalha, ikyaleka iniathulhama ahisi n’eriramya Nyamuhanga, iniabugha athi: “Kwenene Nyamuhanga ali omwakathi-kathi kenyu.”
26 Neryo balikyethu, ni kyahi ekyanga kolhwa? Omughulhu mukahindana haghuma, owundi awithe olhwimbo, owundi awithe eky’erikangirirya, owundi awithe eribisulirwa, owundi akabugha omwa syondimi, n’owundi erihindulira abandi. Emyatsi yosi yikolhawe busana n’erihimba abandi. 27 Kandi hamabya eribugha omwa syondimi, ambi isibalhaba okwa babiri kutse basathu, kandi omw’isubungukana, kandi hatholere ihabya oyukahindulira abandi. 28 Aliwe hamabya isihali muhinduli, atholere iniabya bukuthu omwa kithunga, iniayikanirya iyuwene omwa muthima n’erikania na Nyamuhanga. 29 Abaminyereri babiri kutse basathu bakanaye, n’abandi baminye ebyo bakamanyisaya. 30 Aliwe owundi amahebwa eribisulirwa inian’ikere aho, oyulyatsuka eribugha abye bukuthu. 31 Kundi inywe bosi mwanganaha obuminyereri omw’isubungukana, nuku abosi bang’igha kandi abosi bangahiribwa mw’omuhwa. 32 Kandi ebihembo by’omulimu eby’abaminyereri bitholere ibyatheghekanibwa n’abaminyereri. 33 Kundi Nyamuhanga si Nyamuhanga w’eputsu-putsu aliwe ni w’obuholho.
Ngoku kiri omwa bithunga byosi by’ababuyirire, 34 abakali babye bukuthu omwa bithunga, kundi sibalighirwe erikania. Aliwe babye abakaghondera abalhume, ngoku n’Emighambo yikabugha. 35 Bamanza er’igha kindu kirebe, babulhaye bira babu iban’eka, kundi ni kihemu oko mukali erikanirya omwa kithunga.
36 Mbwino ekinywe kya Nyamuhanga kyalhua okw’inywe, kutse mukyahika okw’inywe basa?
37 Omundu wosi-wosi amalengekania athi ni muminyereri kutse athi awithe ekihembo ky’omulimu, atholere inialigha ngoku emyatsi eyo ngabahandikira ni kihano ky’Omukama. 38 Aliwe omundu wosi-wosi amagheghena eki, iniakendi syagheghenwa.* 39 Kwesi balikyethu, mulhandamirire ekihembo ky’eriha obuminyereri, aliwe simughanaye eribugha omwa syondimi. 40 Aliwe emyatsi yosi yikolhawe omwa nzira eyitholerene n’omwa buyithondeke.