Ebaruha Okwa Baebrania

13 Olhwanzo lhwenyu ng’olhw’abasubeneko lhulhole embere. 2 Isimw’ibirirawa erikokya,* kundi erilhabira omw’iryo abandi mubakokya abamalaika isibathaminya. 3 Mubye imun’ibukire abali omwa ngomo,* eribya nga mune nabo omwa ngomo, n’abakakolhawa nabi, kundi nenyu mukine omwa mubiri.* 4 Abandu bosi bahe obutheke bw’ekitsumbi, kandi engyingo y’abathahenie siyitsandibawe, kundi Nyamuhanga akendi syatswera abakakolha eby’obutswatswa* n’ab’amaraghane. 5 Engebe yenyu siyibye mw’erianza esyosente, munemutsemera ebya muwithe lino. Kundi abiribugha athi: “Sinendi syakuleka kandi sinendi syakusighania.” 6 Busana n’ekyo, thubye n’eriyikethera erighumire n’eribugha thuthi: “Yehova ni muwathikya waghe; sinendyubaha. Omundu anganyikolhaki?”

7 Mwibuke abakabasondolha, abakababwira ekinywe kya Nyamuhanga, kandi mukendibya munemulengekania okwa mibere yabo, mugherereraye erikirirya lyabo.

8 Yesu Kristo ni mughumerere muligholho na munabwire, na kera na kera.

9 Simuthebibawe omwa syongangirirya muthina-muthina kandi esy’ehandi, kundi kyuwene omuthima erighumibwa omwa lhukogho kwilhaba omwa byalya,* ebitheghasira abakayisulhusuthaya busana nabyo.

10 Thuwithe ekiherero ekyo abakakolha omubiiri owabuyirire oko hema bathawithe ehamuli y’erirya oko bikahererawa kukyo. 11 Kundi emibiri y’ebisoro ebya omuhereri mukulhu akathwalha omusasi wabyo ahabuyirire ng’obuhere bw’ebibi yikahisibirawa eyihya w’ekilhaliriro. 12 Busana n’ekyo, Yesu nayu mwanubibirwa eyihya w’olhukyo lhw’etawuni nuku ayire abandu mwa babuyirire omwa musasi wiwe-wiwe. 13 Neryo kwesi thughende eyihya w’ekilhaliriro eyo ali, ithunemuhemulhwa ngoku ahemulhawa, 14 kundi sithuwithe hano h’etawuni eyitheyangahwaho, aliwe n’omuhwa munene thunemusondekania eyikayasa. 15 Erilhabira omw’iyo, mughulhu wosi thuhe Nyamuhanga y’obuhere bw’eripipa, ni bugha ambu, ekighuma ky’eminywe yethu eyikathulhughanaya erina liwe. 16 Kandi simwibirirawe erikolha ebibuya n’eriha abandi okwa bya muwitheko, kundi Nyamuhanga akatsemera ebihongo ng’ebyo.

17 Mwowe abakabasondolha kandi mubaghondere, kundi bakabatheghaya ng’abanasi ku bakendi syabulibwa, nuku banga kolha eki ibanatsemire butsira omwa bulighe, kundi eki ikikendi hamba nabi okw’inywe.

18 Mulhole embere erithusabira kundi thuyikethere ngoku thuwithe obunyamuthima-thima obuli mw’okwenene,* ngoku thukayisunza omwa ngebe yethu eribya b’okwenene omo myatsi yosi. 19 Aliwe kutsibu-tsibu ngabalemba-lemba indi musabe nuku nangasubulibwa lhuba eyo muli.

20 Ambi Nyamuhanga w’obuholho, oyuwalhubukaya omulisya mukulhu w’esyombuli okwa baholi, Omukama wethu Yesu, omwa musasi w’endaghane ya kera na kera, 21 iniabaha obuli kindu kibuya ekikayithaghisibawa ekyangabathokesya erikolha erisonda liwe, erilhabira omu Yesu Kristo iniakolera omw’ithwe ebikamutsemesaya, oyukahebawa olhukengerwa kera na kera. Amina.

22 Neryo balikyethu, ngabalemba-lemba indi omw’ighumisirizya muhulikirire ekinywe eki ekikahimba, kundi nabiribahandikira ebaruha nyikuhi. 23 Nganza muminye ngoku mughalha wethu Timoteo abiriboholhwa. Amasa lhuba, iningendisyasa nayu ingasyabalholhako.

24 Munyiramukiraye abosi abakabasondolha n’ababuyirire abosi. Abali e Itali bamabaramukya.

25 Olhukogho lhubye nenyu inywe bosi.