Ebaruha Yakabiri Okwa Banya Korinto

13 Ono w’omurundi wakasathu ingasa eyo muli. “Obuli mwatsi atholere inialiwa hamabya erithulhagho* ly’abema babiri kutse basathu.” 2 Nomungathe nenyu lino, ngane ng’oyune nenyu engendo yakabiri, kandi ngasangwa ngakunga ababirihalya n’abandi abosi, indi namathasyasa isinendi babalya, 3 kundi mukasondekanaya obwema obukakanganaya kwenene Kristo, oyuthe mutseke embere syenyu aliwe ow’amaaka omwa kathi-kathi kenyu, kw’anemukania erilhabira omw’ingye. 4 Ni kwenene mwahanikwa okwa muthi busana n’obutseke, aliwe aneho busana n’amaaka wa Nyamuhanga. Kwenene, nethu thuli batseke haghuma nayu, aliwe thukendi syabyaho haghuma nayu busana n’amaaka wa Nyamuhanga okw’inywe.

5 Mulhole embere erilebya nga mune omw’ikirirya; mulhole embere erikangania ekyo muli. Kutse simwasi ngoku Yesu Kristo amathikene nenyu? Mbwino imunalyaghanawa. 6 Omo kwenene, ngayikethere ngoku mukendi minya ku sithughanirwe.

7 Neryo thukasaba Nyamuhanga thuthi ambi isimwakolha ekibi kyosi-kyosi, isi bugha indi thwanga lhangirika ng’abalighirwe, aliwe thuthi mwangakolha ebyuwene, nomuthwanga lhangirika ng’abathalighirwe. 8 Kundi sihali ekya thwanga kolha ekikahakanisaya ekwenene, aliwe erikulha-kulhania ekwenene lisa. 9 Ahathe erithika-thika, thukatsema omughulhu thuli batseke aliwe inywe imune n’amaaka. Kandi kino kyathukasabira, erihengulhwa lyenyu. 10 Ky’ekikaleka inahandika emyatsi eyi isindi nenyu, nuku omughulhu ngendi syabya nenyu, ingabya isinangatsuruma omw’ikolesya obuthoki obwa Omukama amba, obw’erihimba, butsira erihimbulha.

11 Erighunzerera, balikyethu, mulhole embere eritsema, erihengulhwa, erihumulikanibwa, erilengekania kighuma, eribya buholho; na Nyamuhanga ow’olhwanzo kandi ow’obuholho akendibya haghuma nenyu. 12 Muramukanaye omw’ilyatsirira eribuyirire. 13 Ababuyirire abosi bamabaramukya.

14 Olhukogho lhw’Omukama Yesu Kristo n’olhwanzo lhwa Nyamuhanga n’erisangira haghuma eby’omulimu abuyirire bibye nenyu inywe bosi.