Ebaruha y’Erimbere Okwa Banya Korinto
11 Munyigherereraye ngoku naghe ngagherereraya Kristo.
2 Ngabasima kundi omo myatsi yosi mukanyibuka kandi mukamakirira ndeke emirwa ngoku nanabahayo. 3 Aliwe nganzire imwaminya ngoku omuthwe w’obuli mulhume ni Kristo; n’omuthwe w’omukali y’omulhume; n’omuthwe wa Kristo ni Nyamuhanga. 4 Obuli mulhume oyukasaba kutse eriha obuminyereri inianahirire okwa muthwe wiwe kw’ekindu akahemulha omuthwe wiwe; 5 aliwe obuli mukali oyukasaba kutse eriha obuminyereri omuthwe wiwe isyaswikire, akahemulha omuthwe wiwe, kundi ingene n’omukali oyuwabirighemba omuthwe. 6 Kundi omukali amathendi yiswika, atholere iniathwa esyonzwiri siwe; aliwe kyamabya ikikahemulha omukali erithwa esyonzwiri siwe kutse erighembwa, atholere iniayiswika.
7 Omulhume syatholere akaswika omuthwe wiwe, kundi ni kisosekanio kya Nyamuhanga n’olhukengerwa, aliwe omukali ni lhukengerwa lhw’omulhume. 8 Kundi omulhume syalhua omo mukali, aliwe omukali yuwalhua omo mulhume. 9 Nibya kandi, omulhume syahangikawa busana n’omukali, aliwe omukali busana n’omulhume. 10 Ky’ekikaleka omukali iniabya iniatholere eribya n’akaminyikalho okwa muthwe wiwe ak’erighondera obuthoki, busana n’abamalaika.
11 Aliwe, omo Mukama, omukali syaghabwirwe oko mulhume n’omulhume syaghabwirwe oko mukali. 12 Kundi ngoku omukali alhua omwa mulhume, n’omulhume akasa erilhabira omo mukali; aliwe ebindu byosi bikalhua oku Nyamuhanga. 13 Nenyu muthathwamu: Mbwino kinatholere omukali erisaba Nyamuhanga omuthwe wiwe isyaswikire? 14 Mbwino obuhangwa ibubwene-bwene sibuli bakangiriraya ngoku omulhume eribyako esyonzwiri nyiri kikamughunzamo ekitsumbi, 15 aliwe ngoku omukali amabyako esyonzwiri nyiri, ni lhukengerwa okw’iyo? Kundi akahebawa esyonzwiri nyiri omwakanya k’ekitambara. 16 Aliwe owosi-wosi amanza erilhwira okwa wundi murwa athi alengire owundi, sithuwithe wundi, n’ebithunga bya Nyamuhanga kuthya.
17 Aliwe ingye eribaha obusondoli obu, sindi basima, kundi mukahindana isi busana n’obuholho aliwe busana n’obubi. 18 Kundi nibya, ngoku ngowa, omughulhu mukahindana omwa kithunga, hakabya erighabulhana omw’inywe; kandi ekyo ngakiligha. 19 Omo kwenene mukayayighaba mwa hidini-dini, nuku abakalighawa omw’inywe banga minyikalha.
20 Omughulhu mukahindana omo mwanya mughuma, si busana n’erirya Ekihulho ky’Omukama eky’Erigholho. 21 Kundi omughulhu mukakirya, obuli mundu akabya iniabirisangwa alya eky’erigholho, neryo owundi iniabya iniakwire enzalha aliwe owundi iniathamire. 22 Mbwino simuwithe amanyumba w’eririramu n’erinywiramo? Kutse mukapona ekithunga kya Nyamuhanga n’erileka abathawitheki bahemuke? Ngababwire indiki? Mbwino ngabasime? Omw’eki, sindi basima.
23 Kundi ebya Omukama amba naghe byo nabaha, indi erigholho ly’ekiro Omukama Yesu abya iniakayaghoberibawamo mwimya omuggati, 24 kandi abere abiriha ewasingya, mwatsutsangagho n’eribugha athi: “Oyu ak’imanira omubiri waghe, ow’akendihebwayo busana nenyu. Mubye mukakolha muthya erinyibuka.” 25 Mwakolha athya n’okwa kikopo, ibamabirirya ekihulho ky’erigholho, athi: “Ekikopo eki kik’imanira endaghane nyihya-nyihya erisighikira okwa musasi waghe. Mubye mukakolha muthya, obuli erikinywa, erinyibuka.” 26 Kundi obuli erirya omuggati oyu n’erinywa ekikopo eki, mukalholha embere erithulhughania olhuholho lhw’Omukama, erihika aho asyasira.
27 Busana n’ekyo, owosi-wosi oyukalya omuggati kutse erinywa ekikopo ky’Omukama isyatholere iniakendibyako olhubanza busana n’omubiri w’Omukama n’omusasi wiwe. 28 Omundu atholere iniatsuka eriminya ng’anatholere omw’iyilebya ndeke, imwalya okwa muggati n’erinywa okwa kikopo. 29 Kundi oyukalya n’erinywa isyathaminya omubiri ng’ak’imaniraki akayirira n’eriyinywira olhubanza. 30 Ky’ekikaleka abangyi omw’inywe ibabya ini batseke kandi balhwere, n’abandi ng’ab’abo banaghotsere omwa lhuholho.* 31 Aliwe thwamayiminya, isithwendi tswerwa. 32 Aliwe thwamatswerwa, Yehova akabya iniakathukunga, nuku thuleke erisyahirwako olhubanza haghuma n’ekihugho. 33 Neryo balikyethu, omughulhu mukasa haghuma busana n’erikiryako, mulindane. 34 Owosi-wosi amabya iniakwire enzalha, alire eka, nuku omughulhu mukahindana haghuma sikibye busana n’eritswerwa. Aliwe oko myatsi eyisighereyo, ngendi syabathonderayo ingahika eyo.