Ebaruha y’Erimbere Okwa Banya Korinto

15 Neryo balikyethu ngab’ibukaya engulhu yuwene eyo nababwira, eyo nenyu mwaligha, kandi eyo mwabirimanirako. 2 Kandi erilhabira muyo mukalhamibawa mwamamakirira ndeke engulhu yuwene eyo nababwira, mbwino isihali ekyaleka imwabya bikirirya.

3 Kundi omwa byo nabahikayako erimbere mwamuli naghe ebyo nanahebawa, bithi Kristo mwaholha busana n’ebibi byethu ngoku Amasako akabugha; 4 kandi bithi mwatsikwa, ee, bithi mwalhubukibwa okwa kiro kyakasathu ngoku Amasako akabugha; 5 kandi bithi mwabuthukira oku Kefa,* n’enyuma waho okw’Ikumi n’Ababiri. 6 Enyuma waho mwabuthukira oko balikyethu abalhabire omu 500 okwa buthuku bughuma, abangyi b’okw’ibo bakine omw’ithwe, nomwakine indi abandi babirighotsera omwa lhuholho. 7 Enyuma waho mwabuthukira oku Yakobo, n’enyuma waho oko bakwenda abosi. 8 Aliwe okw’ighunzerera naghe mwanyibuthukirako ng’oyukabuthukira ok’oyuwabuthawa isyali ahika.

9 Indi w’ahisi okwa bakwenda, kandi singatholere eryahulhwa mo mukwenda, kundi mun’endererya ekithunga kya Nyamuhanga. 10 Aliwe ngali ekyo nyiri busana n’olhukogho lhwa Nyamuhanga. Kandi olhukogho lhwiwe olhw’anyikanganaya mulhuthakwira busa, aliwe munakolha kutsibu kwilhaba abosi; nomwabine abya is’ingye, aliwe lhw’olhukogho lhwa Nyamuhanga olhuli haghuma naghe. 11 Neryo mbulha n’ingye kutse n’ibo, ku thukathulira thuthya, kandi nenyu ku mw’ikiriraya muthya.

12 Kyamabya ikikathulhughanibawa indi Kristo abirilhubukibwa okwa baholi, neryo busana naki abandi omw’inywe ibabugha bathi sihali erilhubuka ly’abaholi? 13 Neryo kwenene, hamabya isihali erilhubuka ly’abaholi, kwesi Kristo isyali athalhubukibwa. 14 Aliwe Kristo amabya isyali athalhubukibwa, omo kwenene erithulira lyethu ini buyira, n’erikirirya lyenyu nalyo ini buyira. 15 Kandi abaholi bamabya isibendi syalhubukibwa, nethu ithukendibya ithuli bema ba Nyamuhanga ab’amabehi, kundi thwabiriha obwema oku Nyamuhanga thuthi mwalhubukya Kristo, oyo athalhubukaya. 16 Kundi abaholi bamabya isibendi syalhubukibwa, obo Kristo nayu imwathalhubukibwa. 17 Eryongera okw’ekyo, Kristo amabya isyali athalhubukibwa, erikirirya lyenyu isiriwithe mughaso; mukasighalha omwa bibi byenyu. 18 Neryo n’ababirighotsera omwa lhuholho ibanamathikene na Kristo ibabirithoghotha. 19 Thwamabya ithwabirihira amaha wethu w’omu Kristo busana n’engebe eno nyisa, ithuli b’erikwira obulighe kwilhaba mundu wosi-wosi.

20 Aliwe Kristo abirilhubukibwa okwa baholi, ng’ebighuma by’erimbere-mbere okw’abo ababirighotsera omwa lhuholho. 21 Kundi olhuholho mulhwasa erilhabira omwa mulhume, erilhubuka ly’abaholi nalyo likasa erilhabira omwa mulhume. 22 Ngoku erilhabira omu Adamu abosi bakaholha, kuthya erilhabira omu Kristo abosi bakendi syasuba. 23 Aliwe obuli mughuma omwa buyithondeke bwiwe: Kristo ng’ebighuma by’erimbere-mbere, enyuma waho aba Kristo omwa mughulhu w’eribyaho liwe. 24 Neryo okw’ighunzerera, iniasubulirya Nyamuhanga wiwe kandi Thatha wiwe y’Obwami, iniamabirighunziraho ighuma amathabali awosi n’ehamuli yosi n’obuthoki. 25 Kundi atholere iniathabalha ng’omwami erihika aho Nyamuhanga akendi syahirira esyonzighu syosi sy’ahisi sy’ebisandu biwe. 26 N’enzighu y’erighunzerera, olhuholho, yikendi syathoghothibirwa ighuma. 27 Nyamuhanga “mwahira emyatsi yosi ahisi sy’ebisandu biwe.” Aliwe omughulhu akabugha athi ‘emyatsi yosi yabirihirwa omw’isi siwe,’ kilhangirikire ngoku sikirithwaliramo n’Oyuwahira emyatsi yosi omwisi sy’obuthoki bwiwe. 28 Aliwe omughulhu emyatsi yosi yikendi syabya iyabirihirwa omwa buthoki bwiwe, na Mughalha iyuwene-wene akendi syayihira ahisi sy’Oyuwahira emyatsi yosi omwisi sy’obuthoki bwiwe, nuku Nyamuhanga angabya myatsi yosi okwa buli mundu.

29 Bithe bithya, abakabatizibawa busana n’ekighendererwa ky’eribya baholi ibakendi kolhaki? Abaholi bamabya isibendi syalhubukibwa nahake, busana naki aba nabo ibathasyabatizibwa busana n’ekighendererwa ng’ekyo? 30 Busana naki nethu thuli omwa kabi obuli saha?* 31 Obuli kiro ngabana ebyanga leka inakwa. Ekyo nga kikakasirye ngoku nanabirikakasya etseme yaghe busana nenyu, balikyethu, eyo ngawithe omu Kristo Yesu Omukama wethu. 32 Ng’abandi bandu,* namabya imunalhwa n’ebisoro by’omoli e Efeso, eki ikikanyighasira kithi? Abaholi bamabya isibendi syalhubukibwa, “muleke thulye, thunywe, kundi omungya thuli b’eriholha.” 33 Simuthebibawe. Amanywani mabi akatsandaya emibere eyuwene. 34 Mubuke kw’obulengekania omwa nzira eyithunganene kandi simukole ekibi, kundi abandi sibawithe eriminya lya Nyamuhanga. Ngabugha busana n’eribahemulha.

35 Aliwe, omundu iniangana bugha athi: “Abaholi bakendi syalhubukibwa bathi? Kandi bakendi syalhubukibwa n’omubiri owali athi?” 36 Iwe mukiru! Ekyawukahera sikiribyaho kithethatsuka eriholha. 37 Kandi ebya wukahera, wukahera, butsira omubiri owakendi lhasa, aliwe enguma buyira, mbulha ey’engano kutse embutho y’owundi mulingo; 38 aliwe Nyamuhanga akahererayayo omubiri ngoku anzire, kandi akahereraya obuli mbutho y’omubiri wayu. 39 Eminyoku yosi siyisosene, aliwe hali ow’omundu, hali owundi munyoku w’ekisoro, owundi munyoku w’esyonyonyi, n’owundi ow’esiswe. 40 Kandi hali emibiri y’elhubulha n’emibiri y’okwa kihugho; aliwe olhukengerwa lhw’emibiri y’elhubulha ni lhw’owundi mulingo, n’olhw’emibiri y’okwa kihugho ni lhw’owundi mulingo. 41 Olhukengerwa lhw’eryuba ni lhw’owundi mulingo, n’olhukengerwa lhw’okwezi ni lhundi, n’olhukengerwa lhw’esyongununu ni lhundi; kundi kwenene, engununu nguma yiri mbaghane okwa yindi ngununu omwa lhukengerwa.

42 Kwabine bithya n’okw’ilhubuka ly’abaholi. Ekikaherawa kikaherawa omw’ihonda; ikyalhubukibwa omwa buthahonda. 43 Kikaherawa omw’ithendi sikibwa; kikalhubukibawa omwa lhukengerwa. Kikaherawa omwa butseke; kikalhubukibawa omwa maaka. 44 Kikaherawa ini mubiri w’omusasi; kikalhubukibawa ini mubiri w’ekirimu. Hamabya ihali omubiri w’omusasi, ihali n’ow’ekirimu. 45 Neryo kihandikire kithi: “Omundu w’erimbere Adamu mwabya mundu oyuliho.” Adamu w’erighunzerera mwabya kirimu ekikaha engebe. 46 Aliwe, ow’ekirimu si y’ow’erimbere. Ow’omubiri w’omusasi y’ow’erimbere, ikwakwama ow’ekirimu. 47 Omulhume w’erimbere ni w’okwa kihugho kandi akolirwe omwa tsutsu; omulhume wakabiri ni w’elhubulha. 48 Ng’oyuwakolhawa omwa tsutsu, n’abakolhawa omwa tsutsu ku bali bathya; kandi ng’ow’elhubulha, n’ab’elhubulha ku bali bathya. 49 Ngoku thwabiribya omwa kisosekanio ky’oyuwakolhawa omwa tsutsu, thukendi syabya n’omwa kisosekanio ky’ow’elhubulha.

50 Aliwe balikyethu, ngababwira kino, indi omunyoku n’omusasi sibyanga sighalya Obwami bwa Nyamuhanga, kutse erihonda siryanga sighalya erithendi honda. 51 Lebaya! Ngababwira embitha yibuyirire: Ithwe bosi sithwendi syaghotsera omwa lhuholho, aliwe ithwe bosi thukendi syahindukibwa, 52 omwa kathambi kake, omw’ikohya ly’eriso, omwa buthuku bw’engubi* y’erighunzerera. Kundi engubi* yikendi syabugha, n’ababiriholha ibalhubukibirwa okwa buthahonda, neryo ithwahindukibwa. 53 Kundi ekikahonda eki kitholere ikyambalha obuthahonda, n’ekikaholha eki kitholere ikyambalha obuthaholha. 54 Aliwe omughulhu ekikahonda eki kikendi syambalha obuthahonda n’ekikaholha eki ikyambalha obuthaholha, neryo ekyabughawa ekihandikire ikyabererera: “Olhuholho lhwabirimerwa kera na kera.” 55 “Lhuholho, erikinda lyawu liri hayi? Lhuholho, eritsimitha lyawu liri hayi?” 56 Eritsimitha erikaletha olhuholho ky’ekibi, n’amaaka w’ekibi ni Mighambo.* 57 Aliwe ewasingya oku Nyamuhanga, kundi akathuha erikinda erilhabira omo Mukama wethu Yesu Kristo!

58 Busana n’ekyo, balikyethu banzwa, musike, simusegha-seghane, mughulhu wosi mubye n’ebingyi by’erikolha omwa mubiiri w’Omukama, imunasi ngoku ebya mukakolera Omukama sibirikwira busa.