Ebaruha Okwa Banya Kolosai
4 Inywe bakama, muthwale abakobe benyu omwa mibere eyithunganene kandi eyuwene, imunasi ngoku nenyu munawithe Omukama elhubulha.
2 Muyitsinge omw’isaba, erisaba imunabukire imunemuha ewasingya. 3 Eryongera okw’ekyo, muthusabire muthi Nyamuhanga akyungule olhuyi busana n’ekinywe nuku thwanga thulhughania embitha yibuyirire eyihambire oku Kristo, eyilekire inabya omwa miriki y’engomo, 4 kandi muthi ambi ingathulhughaniayo ndeke-ndeke ngoku ngatholere.
5 Mulhole embere erilendera omwa menge embere sy’abali eyihya, erikolesya ndeke obuthuku bwenyu.* 6 Muleke ebinywe byenyu mughulhu wosi bibye by’olhukogho, ebisihire mw’omunyu, nuku mwanga minya ngoku mwangasubirya obuli mundu.
7 Tikiko, mughalha wethu mwanzwa kandi muherezya muthaleghulha kandi omughombe mulikyethu omo Mukama, akendi babwira emyatsi yosi eyinyihambireko. 8 Ngamuthuma eyo muli nuku mwanga minya ngathuliyo thuthi kandi nuku angahumulikania emithima yenyu. 9 Akendyasa haghuma na Onesimo, mughalha wethu muthaleghulha kandi mwanzwa, oyuwabya akabya nenyu; bakendi babwira ebyosi ebinemubya eno.
10 Aristariko, omunya-ngomo mulikyaghe, amabaramukya, kuthya na Mariko, omuhughu wa Baranaba (oyo mwahebawako obusondoli bw’erimwangirira amasa eyo muli), 11 na Yesu oyukahulhawamo Yusto, ab’okwa babanibwe. Aba basa babakakolha haghuma naghe busana n’Obwami bwa Nyamuhanga, kandi babirinyihumulikania kutsibu.* 12 Epafra, omughombe wa Kristo Yesu, oyuwabya akabya nenyu, amabaramukya. Mughulhu wosi akayitsingirira omw’isaba busana nenyu, nuku erighunzerera mwangalhughirirana kandi imunawithe erikakasya erighumire omw’isonda lya Nyamuhanga eryosi. 13 Kundi ngamuhera obwema ngoku akahiraho akaghalha kanene busana nenyu kandi busana n’abali e Laodikia ne Hierapoli.
14 Luka, omuthambiri mwanzwa, amabaramukya, kuthya na Dema. 15 Munyiramukiraye balikyethu abali e Laodikia na Nemfa n’ekithunga ekiri omwa nyumba yiwe. 16 Neryo ebaruha eno yikendibya yabiribasomerwa, muhireho emitheghekere nuku yisomerawe n’omwa kithunga ky’abanya Laodikia kuthya nenyu musome eyikalhua e Laodikia. 17 Kandi mubwire Arkipo muthi: “Wutsomane ndeke obuherezya obo waligha omo Mukama, nuku wuberererayebo.”
18 Ingye Paulo, eriramukya lyaghe lya lino omwa byalha byaghe. Mubye imun’ibukire emiriki yaghe y’engomo. Olhukogho lhubye nenyu.