Ebaruha y’Erimbere Okwa Banya Korinto
1 Paulo, mwabirikirwa eribya mukwenda wa Kristo Yesu omw’isonda lya Nyamuhanga, na mughalha wethu Sostini, 2 okwa kithunga kya Nyamuhanga ekiri e Korinto, okw’inywe ababiriyirwa mwa babuyirire omw’imathikana na Kristo Yesu, ababirikirawa eribya babuyirire, haghuma n’abosi abali ehosi-hosi abakabirikira okwa lina ly’Omukama wethu Yesu Kristo, Omukama wabu kandi owethu:
3 Olhukogho n’obuholho erilhua oku Nyamuhanga Thatha wethu n’Omukama Yesu Kristo bibye nenyu.
4 Mughulhu wosi ngaha Nyamuhanga waghe y’ewasingya busana nenyu erikwamana n’olhukogho lhwa Nyamuhanga olho mwabirihebwa omu Kristo Yesu; 5 kundi omwa buli kindu mwabirighasirwa omw’iyo, omwa maaka manene w’erikania n’omw’iminya linene, 6 ngoku mwabiriligha ndeke obwema obuhambire oku Kristo, 7 nuku simubulhaweko nahake ekihembo kyosi-kyosi, imunemulindirira kutsibu eribisulhwa ly’Omukama wethu Yesu Kristo. 8 Kandi akendi syabaghumya erihika okwa nduli nuku sihabye ekikabahandikirira okwa kiro ky’Omukama wethu Yesu Kristo. 9 Nyamuhanga ni muyiketherwa, oyuwababirikira eribya bughuma* na Mughalha wiwe, Yesu Kristo Omukama wethu.
10 Neryo ngabalemba-lemba, balikyethu, erilhabira omwa lina ly’Omukama wethu Yesu Kristo, indi inywe bosi mutholere imwalighirana mukakania kandi indi isihabya erighabulhana omwa kathi-kathi kenyu, aliwe indi mubye bughuma ndeke omwa menge n’omwa bulengekania. 11 Kundi abaghuma b’okwa b’omwa nyumba ya Kloe babirimbwira ebibahambireko, balikyethu, bathi omwa kathi-kathi kenyu muli erighabulhana. 12 Ekyangamanyisaya kya kino, indi obuli mughuma w’okw’inywe akabugha athi: “Ingye indi wa Paulo,” “Aliwe ingye indi wa Apolo,” “Aliwe ingye indi wa Kefa,”* “Aliwe ingye indi wa Kristo.” 13 Mbwino Kristo aghabene? Paulo mwanahanikwa okwa muthi busana nenyu? Kutse mwabatizibawa omwa lina lya Paulo? 14 Ngasima Nyamuhanga kundi mundabatizya n’omughuma w’okw’inywe kwihaho Krispo na Gayo, 15 nuku sihabye n’omughuma oyuwangabugha athi mwabatizibawa omwa lina lyaghe. 16 Ee, kandi munabatizya ab’omwa nyumba ya Stefana. Okwa bandi, singasi ngamunanabatizya n’omughuma. 17 Kundi Kristo mwanyithuma, isi busana n’erisyabatizya, aliwe erisyathulhughania engulhu yuwene; kandi butsira omwa binywe by’amenge, nuku omuthi w’obwaghali* wa Kristo syabye butsira mughaso.
18 Kundi omwatsi owahambire okwa muthi w’obwaghali* ni bukiru okwa bakahera, aliwe okw’ithwe abanemulhamibwa, ni buthoki bwa Nyamuhanga. 19 Kundi kihandikire kithi: “Ngendi syaherya amenge w’ab’amenge, kandi ngendi syaghana* amenge w’ab’amenge.” 20 Omundu w’amenge ali hayi? Omuhandiki* ali hayi? Ow’obuhaka omwa mulembe ono ali hayi? Nyamuhanga abiriyira amenge w’ekihugho mwa bukiru, kwa bithe? 21 Kundi omwa menge wa Nyamuhanga ekihugho mukithaminya Nyamuhanga erilhabira omwa menge wakyo, mukyatsemesya Nyamuhanga erilhamya abakikiriraya erilhabira omwa bukiru bw’ebikathulhughanibawa.
22 Abayuda bakasaba erihebwa ebiminyikalho n’Abagiriki bakasondaya amenge; 23 aliwe thukathulhughanaya Kristo oyuwahanikawa okwa muthi, oko Bayuda ni mwatsi ow’akathwikalhaya aliwe okwa banya bihanda ni bukiru. 24 Aliwe, okwa babiribirikirwa, Abayuda n’Abagiriki, Kristo ni buthoki bwa Nyamuhanga kandi menge wa Nyamuhanga. 25 Kundi ekindu kya Nyamuhanga eky’obukiru ni ky’amenge kwilhaba abandu, n’ekindu kya Nyamuhanga ekithawithe kaghalha ni ky’amaaka kwilhaba abandu.
26 Balikyethu, munasi ngoku omughulhu iyo ababirikira, sihabya bangyi ab’amenge erikwamana n’ebihano by’abandu, sihabya bangyi ab’amaaka, sihabya bangyi abalhuire omwa b’ebitsumbi, 27 aliwe Nyamuhanga mwasombolha ebindu by’obukiru eby’ekihugho erihemulha abandu b’amenge; kandi Nyamuhanga mwasombolha ebindu ebithawithe maaka eby’ekihugho erihemulha ebiwithe amaaka; 28 kandi Nyamuhanga mwasombolha ebithawithe mughaso eby’ekihugho n’ebikaghayawa, ebindu ebitheho, erighunzaho ebiriho, 29 nuku sihabye n’omughuma* oyuwanga yihalhamba embere sya Nyamuhanga. 30 Aliwe ni busana nayu indi mumathikene na Kristo Yesu, oyuwabirithubera menge erilhua oku Nyamuhanga, kandi lithunganene kandi akaleka ithwayirwa mwa babuyirire n’eriboholhwa erilhabira omwa ndongolya, 31 nuku kyangabya ngoku kihandikire kithi: “Oyukayihalhamba, ayihalhambire omu Yehova.”