Ebaruha y’Erimbere oku Timoteo
6 Abakobe* balhole embere erilhangira abakama babu ibatholere erihebwa ekitsumbi omwa buswire, nuku erina lya Nyamuhanga n’erikangirirya sibikanibaweko nabi. 2 Kandi abawithe abakama ab’ikirirye isi baghana eribasikya ambu kundi ni balikyabo. Omwakanya k’ekyo, batholere ibbwa ibakolha n’omuhwa kundi abakaghasirawa omwa mibiiri yabo mibuya ni bikirirya kandi banzwa.
Wulhole embere erikangirirya emyatsi eyi n’eriha erihana eri. 3 Omundu wosi-wosi amakangirirya eyindi ngangirirya kandi isyali lighirana n’erikangirirya erihikire,* erikalhua oko Mukama wethu Yesu Kristo, kutse n’engangirirya eyihambene n’eryubaha Nyamuhanga, 4 inioswire mw’emiyiheko kandi syali yitheghereraya ekyosi-kyosi. Akanza kutsibu eby’erikakalhukana n’obuhaka okwa binywe. Emyatsi eyi yikaletha eritsuru, amalhwa, eritsandya okwa bandi kw’erina,* erilengekanirya omwa bandi mw’ebibi, 5 amalhwa w’olhughumerere okwa hindu hike-hike aw’abandu abatsandire omwa bulengekania kandi abathasi ekwenene, erilengekania bathi eryubaha Nyamuhanga ni nzira y’erighoberamo. 6 Omo kwenene, eryubaha Nyamuhanga n’eritsemera ebya wuwithe* muli endundi nene. 7 Kundi muthuthaletha omwa kihugho mwa kindu, kandi sithwendi syalhuamo na kindu. 8 Neryo thwamabya n’eky’erirya* n’eky’eriambalha,* thutsemere ebyo.
9 Aliwe abanzire kutsibu eribya bagaga bakawa omw’ilengwako n’omwa kithegho n’omwa myatsi mingyi mikiru n’omwa syongumbu esy’akabi esikakolhaya abandu okw’ithoghothibwa n’okw’ihera. 10 Kundi erianza esyosente ya nzuko y’emiringo yosi y’ebibi, kandi omw’ilhandamirirasyo abandi babirisighania erikirirya kandi babiriyihuthangalya n’eribya omwa malhumi mangyi.
11 Aliwe, iwe, omundu wa Nyamuhanga, wuthibithe wusaghe ebindu ebi. Aliwe wukwamirire erithunganene, eryubaha Nyamuhanga, erikirirya, olhwanzo, eriyiyinia, n’obwolho. 12 Wulhwe amalhwa awuwene aw’erikirirya; wamakirire ndeke engebe y’erikotha eyo wabirikirirawa kandi muwayihayo eriha obwema obuwene embere sy’abema bangyi.
13 Embere sya Nyamuhanga, oyukaleka ebindu byosi ibyabyaho, na Kristo Yesu, iyo ng’omwema oyuwaha obwema obuwene embere sya Pontio Pilato, ngakulhaghira 14 indi wughendere okwa kihano isiwuliko kithingo n’akahinira erihika okw’iminyikalibwa ly’Omukama wethu Yesu Kristo, 15 eryo Omuthabali mughuma musa oyutsemire akendi syakangania okwa buthuku bwalyo obwabirihirwaho. Iyo ni Mwami w’abakathabalha ng’abami kandi Mukama w’abakathabalha ng’abakama, 16 iyo musa oyuthehonda, oyuwikere omwa kyakakalha kinene kutsibu ekya wuthe wanga segherako hakuhi, oyuthe wathalhangirwa n’omundu kutse oyo omundu athe angalhangira. Ahebawe ekitsumbi n’obuthoki bwa kera na kera. Amina.
17 Wuhabule* abagaga ab’omwa mulembe ono wuthi sibabye mw’emiyiheko,* kandi sibahire amaha wabo okwa by’obugaga obutheebo, aliwe oku Nyamuhanga, oyukathuha ahathe eriyikukumirira ebindu byosi ebya thukatsemera. 18 Wubabwire wuthi bakole ebibuya, bakanyirire omwa mibiiri eyuwene, babye abakahithaya,* ibanayitheghekire eriha abandi okwa byabawitheko, 19 ibanemuyibikira eky’obughuli, ni bugha ambu, omusingyi owuwene busana n’obuthuku obukasa, nuku banga makirira ndeke engebe eyiri ngebe kundu.
20 Timoteo, wutheghaye ebyo wabirihebwa, eriyihighulha okwa binywe ebithawithe mughaso ebikatsandaya ekibuyirire n’okwa mabehi aw’akahulhawamo “eriminya” erithahambana n’ekwenene. 21 Omw’ikwama eriminya ng’eryo, abandi babiriyisununulha okw’ikirirya.
Ambi olhukogho ilhwabya nawu.