Ebaruha Okwa Banya Filipi

4 Busana n’ekyo, balikyethu abo nganzire kandi abo ngakandira, obutseme bwaghe kandi mbiitha yaghe, musike omwa nzira eyi omo Mukama, banzwa baghe.

2 Ngalemba-lemba Eodia na Sintike indi babye n’obulengekania bughuma omo Mukama. 3 Ee, nenyu ngabasaba, ng’omukoli mulikyenyu ow’okwenene,* indi mulhole embere eriwathikya abakali aba. Omo kwenene, ibo na Klementi kuthya n’abandi bakoli balikyethu babirilengaho kutsibu erikolha haghuma naghe busana n’engulhu yuwene. Amena w’abosi aba ane omwa kitabu ky’engebe.

4 Mutseme mughulhu wosi omo Mukama. Ngathasyakibugha, Mutseme! 5 Muleke obuyitheghererya bwenyu buminyawe n’abandu abosi. Omukama ali hakuhi. 6 Simuhanga-hangaye busana n’ekyosi-kyosi, aliwe omwa buli mwatsi omw’isaba n’omw’ilemba-lemba haghuma n’eriha ewasingya, muleke Nyamuhanga owe erisaba lyenyu; 7 n’obuholho bwa Nyamuhanga obulhabire amalengekania wosi bukendi theya emithima yenyu n’amaaka wenyu w’obulengekania erilhabira omu Kristo Yesu.

8 Erighunzerera, balikyethu, ebyosi-byosi eby’ekwenene, ebyosi-byosi ebikulhu-bikulhu, ebyosi-byosi ebithunganene, ebyosi-byosi ebihenirye,* ebyosi-byosi ebyanganzwa, ebyosi-byosi ebikakanibawako ndeke, ebyosi-byosi ebitholere erikwamana n’eby’esyongeso, n’ebyosi-byosi ebyanga pipwa, mulhole embere erighanirya* okwa bindu ebi. 9 Emyatsi eyo mwigha kuthya n’eriligha n’eriowa n’erilhangira okw’ingye, mukoleyo, na Nyamuhanga w’obuholho akendibya nenyu.

10 Ngatsema kutsibu omo Mukama indi lino, erighunzerera, mwabirithasyanyitsomana. Nomwakine indi mwanabya munyitsomene, mwabya mukabulha akaghisa k’erikikangania. 11 Sindi bugha eki kundi ngali omwa buyithawa, kundi nabir’igha eritsemera ebya ngawithe nomunangabya omwa mibereki. 12 Nganasi eribyaho omwa bike n’eribyaho omwa binene. Omwa buli mwatsi n’omwa mibere yosi nabiriminya embitha y’eribya iwun’ughuthire n’eribya omwa nzalha, eribya n’ebingyi n’eribya isiwuwitheki. 13 Kundi omo myatsi yosi ngawithe akaghalha erilhabira omwa oyukanyiha amaaka.

14 Nomwabine, mumwakolha ndeke mukanyiwathikya omwa malighe waghe. 15 Omo kwenene, inywe banya Filipi kandi munasi ngoku mwabere mwabiriminya engulhu yuwene, omughulhu nalhua e Makedonia, sihali n’ekithunga ekyanyiwathikaya omo mwatsi w’erihithya n’erihebwa, ninanywe basa; 16 kundi omughulhu nabya e Tesalonika, mumwayira ekya mukanyithumira busana n’obuyithawa bwaghe, butsira murundi mughuma musa aliwe kabiri. 17 Si bugha indi ngasondaya ekihembo, aliwe ngayithagha ebibuya ebikaletha amaghoba omwa kighona kyenyu. 18 Nomwabine, nganawithe obuli kindu ekya ngayithagha nibya n’ebilhabire okw’aho. Nganawithe bingyi, kundi lino Epafrodito abirimba ebya mwanyithumira, akakumbo akasihire, obuhere obukalighawa, obukatsemesaya ndeke Nyamuhanga. 19 Na Nyamuhanga waghe akendi baha omwa buswire ebyosi ebya mukayithagha erikwamana n’obungyi bw’olhukengerwa lhwiwe erilhabira omu Kristo Yesu. 20 Neryo Nyamuhanga wethu kandi Thatha ahebawe olhukengerwa kera na kera. Amina.

21 Munyiramukiraye obuli mubuyirire oyumathikene na Kristo Yesu. Balikyethu abali naghe bamabaramukya. 22 Ababuyirire abosi, aliwe kutsibu-tsibu abali omwa nyumba ya Kaisari, bamabaramukya.

23 Olhukogho lhw’Omukama Yesu Kristo lhubye nenyu busana n’omuthima ogho mukakanganaya.