Ebaruha Okwa Banya Kolosai
1 Paulo, omukwenda wa Kristo Yesu omw’isonda lya Nyamuhanga, na Timoteo mughalha wethu, 2 okwa babuyirire kandi balikyethu abathaleghulha abamathikene na Kristo e Kolosai:
Olhukogho n’obuholho erilhua oku Nyamuhanga Thatha wethu bibye nenyu.
3 Mughulhu wosi thukasima Nyamuhanga, Thatha w’Omukama wethu Yesu Kristo, omughulhu thukabasabira, 4 kundi muthwowa okw’ikirirya lyenyu omu Kristo Yesu n’olhwanzo olhwa muwithire ababuyirire abosi 5 busana n’amaha awabikirwe busana nenyu elhubulha. Enyuma, mumwowa okwa maha aya erilhabira omo mwatsi w’ekwenene ow’engulhu yuwene 6 eyabiribahikako. Ngoku engulhu yuwene yinemuhethya ebighuma n’erikanyirira omwa kihugho kyosi, kwa yinemukolha yithya omwa kathi-kathi kenyu eritsuka okwa kiro mwowa n’eriminya ndeke olhukogho lhwa Nyamuhanga omo kwenene. 7 Ebyo byamwabir’igha erilhua oko mughombe mulikyethu mwanzwa ya Epafra, omuherezya muthaleghulha wa Kristo busana nethu. 8 Kandi mwathubwira okwa lhwanzo lhwenyu omwa nzira y’obunyakirimu.*
9 Kandi ekyo ky’ekikaleka erilhua okwa kiro thwowagho, sithuli thwathaleka eribasabira n’erisaba thuthi ambi imwosulibwa mw’eriminya erihikire ery’erisonda liwe omwa menge wosi n’eriyitheghererya eby’obunyakirimu, 10 nuku mulendere ng’abatholere embere sya Yehova nuku mwanga mutsemesya omwa buswire imunemuhethya ebighuma omwa buli mubiiri owuwene n’erikanyirira omw’iminya erihikire erya Nyamuhanga; 11 kandi ambi imwaghumibwa omwa buthoki obwosi erikwamana n’amaaka wiwe w’olhukengerwa nuku mwanga yiyinirya ighuma omw’ighumisirizya n’obutseme, 12 imunemuha ewasingya oku Thatha, oyuwaleka imwatholera erisangira omo mwandu w’ababuyirire omwa kyakakalha.
13 Mwathusabulha okwa buthoki bw’omwirima n’erithuhumirya omo bwami bwa Mughalha wiwe omwanzwa, 14 oyo erilhabira omw’iyo thukaboholhawa omwa ndongolya, erighanyirwa ebibi byethu. 15 Iyo ni kisosekanio kya Nyamuhanga oyuthelhangirawa, akambere omwa bihangikwa byosi; 16 kundi erilhabira omw’iyo ebindi bindu byosi mubyahangikwa omwa lhubulha n’okwa kihugho, ebindu ebikalhangirawa n’ebindu ebithelhangirawa, mbulha ni bithumbi by’obwami kutse amakama kutse amathabali kutse eby’ehamuli. Ebindi bindu byosi byabirihangikwa erilhabira omw’iyo kandi busana nayu. 17 N’ekindi, ebindi bindu byosi byasire linyuma okw’iyo, kandi erilhabira omw’iyo ebindi bindu byosi mubyabyaho, 18 kandi ya muthwe w’omubiri, ekithunga. Iyo ya nzuko, akambere erilhua omwa baholi, nuku angabya w’erimbere omwa bindu byosi; 19 kundi Nyamuhanga aby’anzire erihika-hikana lyosi iryikalha omw’iyo, 20 kandi nuku erilhabira omw’iyo, asubanemo n’ebindi bindu byosi omw’ihiraho obuholho erilhabira omwa musasi ogho utha iniane okwa muthi w’obwaghali,* mbulha ni bindu ebiri okwa kihugho kutse ebindu ebiri omwa lhubulha.
21 Kwenene inywe mwanabya imwabirighanwa kandi imwabiribya nzighu kundi amalengekania wenyu abya okwa mikolere mibi, 22 lino abirileka imwasubanamu na Nyamuhanga busana n’omubiri w’omunyoku ow’oyo erilhabira omwa lhuholho lhwiwe, nuku abaheyo imunabuyirire kandi isimuliko kahinira kandi isimukiri kw’olhubanza embere siwe— 23 aliwe mbwino imunalyalholha embere omw’ikirirya, erisingikwa ndeke okwa musingyi kandi imunasikire, isimulilhua okwa maha w’engulhu yuwene eyo, eya mwowa kandi eyathulhughanibawa okwa bihangikwa byosi eby’okwa kihugho. Ingye Paulo, munabya muthuli w’engulhu yuwene eyi.
24 Lino ngatsemera omw’aghalhwa lyaghe busana nenyu, kandi nganemulhaba omwa malighe wa Kristo awakinabulirweko omwa mubiri waghe busana n’omubiri wiwe, iky’ekithunga. 25 Munabya muherezya w’ekithunga eki erighenda-ghendania n’obw’imaniri erilhua oku Nyamuhanga obo nahebawa busana nenyu erithulhughania ekinywe kya Nyamuhanga omwa buswire, 26 embitha yibuyirire eyabya yibisirwe okwa mighulhu ya kera n’okwa syondengo sya kera. Aliwe lino yabiribisulirwa ababuyirire biwe, 27 abo Nyamuhanga anza eriminyisya omwa kathi-kathi k’ebihanda obunene bw’olhukengerwa lhw’embitha yibuyirire eyi, ini Kristo oyumathikene nenyu, amaha w’olhukengerwa lhwiwe. 28 Oyo yathunemuthulhughania, erihabulha obuli mundu n’erikangirirya obuli mundu omwa menge wosi, nuku thwanga hayo obuli mundu inianalhughirirene omw’imathikana na Kristo. 29 Busana n’ekyo, nganemukolha kutsibu, eriyikasa omwa kaghalha kiwe akanemukolha kutsibu omw’ingye.