Ebaruha Okwa Baebrania

11 Erikirirya n’ikakasya ly’ebilindirirwe, obwema obulhangirikire* obw’ebineho ebithelhangirawa. 2 Kundi erilhabira mulyo, abandu ab’omwa buthuku bwa kera* mubahebwako obwema.

3 Busana n’erikirirya, thukaminya ngoku emighulhu muyathondekanibwa erilhabira omwa kinywe kya Nyamuhanga, erileka ebindu ebikalhangirawa ibyabyaho omw’ilhua omwa bithelhangirawa.

4 Busana n’erikirirya, Abeli mwaha Nyamuhanga y’ekihongo eky’obughuli bunene kwilhaba ekya Kaina, kandi erilhabira omw’ikirirya eryo, mwahebwako obwema ngoku abya muthunganene, kundi Nyamuhanga mwasima* ebihembo biwe, kandi nomwakine indi abiriholha, akinabugha erilhabira omw’ikirirya liwe.

5 Busana n’erikirirya, Enoka mwahumibwa nuku syalhangire olhuholho, kandi mwabya isyangathasyabanika ehosi-hosi kundi Nyamuhanga abya iniabirimuhumya; kundi athali ahumibwa mwahebwako obwema ngoku abya iniabiritsemesya Nyamuhanga ya ndeke. 6 Kandi ahathe erikirirya sikyanga thokekana eritsemesya Nyamuhanga ya ndeke, kundi owosi-wosi oyukahikira Nyamuhanga atholere in’ikirirya ngoku Nyamuhanga aneho kandi ngoku akahemba abakamusondekanaya n’omuhwa.

7 Busana n’erikirirya, Noa abere abirihebwa omwatsi wa Nyamuhanga okwa bindu ebithe byalhangirwa, mwakangania kw’akubaha Nyamuhanga neryo amahimba obwathu busana n’erilhamya ab’enyumba yiwe; kandi erilhabira omw’ikirirya eri mwahira okwa kihugho kw’olhubanza, kandi mwabya muwetwa w’erithunganene erikalhwiririra omw’ikirirya.

8 Busana n’erikirirya, Abrahamu abere abirikirwa, mwabya mwowa amaghenda omo mwanya ogho angahebirwe ng’omwandu; mwaghenda, nomwakine indi abya isyasi eyo akaya. 9 Busana n’erikirirya, mw’ikalha ng’omubunga omwa kihugho ekyo alhaghawa, ekihugho eky’athasi, mw’ikalha omwa syohema haghuma na Isaka na Yakobo, abawetwa balikyabu ab’omulhaghe iwan’oyo. 10 Kundi aby’akalindirira etawuni eyiwithe emisingyi eyighumire, eyo omutheghekania wayo n’omuhimbi wayo ni Nyamuhanga.

11 Busana n’erikirirya, na Sara mwahebwa amaaka w’eriheka obukule, nomwanabya iniabirikulha omo myaka, kundi aby’ikirirye ngoku oyuwaha omulhaghe ni muyiketherwa. 12 Busana n’eki, erilhabira omwa mulhume mughuma oyuwabya alhalire lhuholho, abaana mubabuthwa, abangyi ng’omughanzo w’esyongununu sy’omwa kyanya kandi abatheghanzika ng’omuseghe w’okwa ngetse.

13 Abosi aba mubaholha ibanawithe erikirirya, nomwakine indi mubathalhangira eribererera ly’emilhaghe; aliwe mubalhangirirayo haali kandi mubangirirayo n’erithulhughania bathi babya b’ehandi kandi bikalhani b’obuthuku buke omwa kihugho ekyo. 14 Kundi abakabugha bathya, bakakikanganaya ndeke-ndeke ngoku bakasondekanaya n’omuhwa omwanya owabo. 15 Kandi kubabera erilengekania okwa kihugho ekyo balhuamo, bangabwene akaghisa k’erisubayo. 16 Aliwe lino bakasimbirira omwanya owalengire, ni bugha ambu, omwanya w’elhubulha. Busana n’ekyo, Nyamuhanga syalikwir’isoni eky’eryahulhwamo Nyamuhanga wabo, kundi abiribatheghekanirya etawuni.

17 Busana n’erikirirya, Abrahamu abere alengesibwa, mwabya ng’oyuwabirihonga Isaka. Abrahamu oyuwabya iniabiriangirira n’etseme emilhaghe mwanza erihonga mughalha wiwe ekyusa— 18 nomwanabya iniabiribwirwa indi: “Abakendi syahulhwamo lhubutho* lhwawu bakendi syasira omu Isaka.” 19 Aliwe mwaghanirya athi Nyamuhanga akendi thoka erimulhubukya okwa baholi, kandi mwahebwa Isaka omwa nzira y’omusyo.

20 Busana n’erikirirya, na Isaka mwatsumulha Yakobo na Esau busana n’emyatsi eyikasa.

21 Busana n’erikirirya, Yakobo iniakisiya iniaholha, mwatsumulha obuli mughalha wa Yozefu kandi mwaramya inianakondomere okwa mutso wiwe.

22 Busana n’erikirirya, Yozefu iniakisiya iniaholha, mwakania okw’ilhuayo ly’abaana ba Israeli, kandi mwaha obusondoli* obuhambire okwa makuha* wiwe.

23 Busana n’erikirirya, Musa abere abiributhwa, ababuthi biwe mubamubisa ahabw’amezi asathu kundi mubalhangira omwana ini mubuya kandi mubathasagha ekilhaghiro ky’omwami. 24 Busana n’erikirirya, Musa abere abirikulha mwaghana erithasyahulhwamo mughalha wa mwali wa Farao, 25 amayisinga erikolhwa nabi haghuma n’abandu ba Nyamuhanga omwakanya k’eritsemera ekibi habw’akathuku kake, 26 kundi mwalhangira eritsumwa lya Kristo mwa bugaga bunene kwilhaba eby’obughuli ebye Misiri, mwathungerera ekihembo eky’akendi syahembwa. 27 Busana n’erikirirya, mwalhua e Misiri aliwe mwathasagha erihithana ly’omwami, kundi mwalholha embere erisika ng’oyunalhangire oyuthelhangirawa. 28 Busana n’erikirirya, mwakolha Erikyuruka n’erihaka omusasi oko syonyuyi nuku omuthoghothya syakole nabi* ehimbere hyabo.

29 Busana n’erikirirya, mubasoka Engetse y’Engulha nga bali okwa kithaka ekyumire, aliwe abanya Misiri babere banza erisokayo, muyabamera.

30 Busana n’erikirirya, esyombimbo sye Yeriko musyathera abandu babithimba kusyo habw’ebiro musanju. 31 Busana n’erikirirya, Rahabu omumalaya mwathathoghothibwa haghuma n’abathowa, kundi mwangirira abalingyi omwa buholho.

32 Kandi ngendi thondogholha ingahikyahi? Kundi obuthuku ibukendibya buke namakania n’oku Gideoni, Baraka, Samusoni, Yefuta, Dawudi, kuthya na Samweli n’abandi baminyereri. 33 Erilhabira omw’ikirirya mubakinda amami, bamaletha erithunganene, bamahebwa emilhaghe, bamakumba amuno w’esyondale, 34 bamalimya amaaka w’omuliro, bamabalha okwa muyali, bamalhua omwa butseke n’eriyirwa mw’ab’amaaka, bamabya mbangyi omwa malhwa, bamakinda amahe awakababambira. 35 Erilhabira omw’ilhubuka, abakali mub’angirira abandu babo ababya ibabiriholha, aliwe abandi balhume mubaghalibwa kundi mubathaligha eriboholhwa omwa ndongolya ndebe, nuku basyabana erilhubuka erilengireyo. 36 Abandi mubasekereribwa n’eriswiribwa, kandi kwilhaba aho, mubabohwa omwa bigyeghere kandi bamahirwa omo ngomo. 37 Mubaswiribwa omwa mabwe, mubalengesibwa, mubasathibwa kabiri, mubakerwa omwa muyali, mubaghenda ibanambere esyongobi sy’esyombuli, esye syombene, ibane omwa buyithawa, omwa malighe, erikolhwa nabi; 38 kandi mubathatholera eribya omwa kihugho. Mubaghanga-ghanga omo mbwarara n’okwa bithwe n’omwa myangalhu n’omwa marubu w’ekithaka.

39 Aliwe abosi abo nomubanahebawako obwema obuwene busana n’erikirirya lyabo, mubathalhangira eribererera ly’omulhaghe, 40 kundi Nyamuhanga abya iniabirisangwa alhangira embere ku yine ebibuya busana nethu, nuku si bahikanibawe thuthethwabya.