Ebaruha Okwa Banya Galatia
4 Neryo ngabugha indi omuwetwa amabiribya iniakine mwana mulere, syali mbaghane okwa mukobe, nomwane mukama w’emyatsi yosi, 2 aliwe akabya iniakine ahisi sy’abalebererya n’abimaniri erihika okwa kiro ekyo thatha wiwe abirisangwa ahiraho. 3 Kuthya nethu omughulhu thwabya baana, thwabya omwa bukobe bw’emyatsi y’ekihugho ey’omusingyi. 4 Aliwe obuthuku obwahirawaho bwabere bwahwayo, Nyamuhanga mwathuma Mughalha wiwe, oyuwabuthawa n’omukali kandi oyuwabya ahisi sy’emighambo, 5 nuku abohole abali ahisi sy’emighambo omw’ibaghulha, nuku thwangayirwa mwa baghalha.
6 Neryo kundi muli baghalha, Nyamuhanga abirithuma omulimu wa Mughalha wiwe omwa mithima yethu, kandi akabirikira athi: “Abba,* Thatha!” 7 Neryo siwukiri mukobe aliwe mughalha; kandi wamabya iwuli mughalha, obo kandi iwuli muwetwa erilhabira omu Nyamuhanga.
8 Aliwe omughulhu mwabya isimwasi Nyamuhanga, mwabya bakobe b’esyonyamuhanga, omo kwenene esithe syonyamuhanga. 9 Aliwe kundi mwabiriminya Nyamuhanga kutse Nyamuhanga eribya iniabiribaminya, busana naki imwathasyasubira emyatsi ey’omusingyi eyithemo bwahi kandi eyithawithe mughaso n’erianza erithasyabya bakobe bayo? 10 N’omuhwa munene mukakulhaya ebiro n’amezi n’ebirimo n’emyaka. 11 Ng’ubaha busana nenyu, indi obundi nanganabya inabiribatsandiryako akaghalha kaghe.
12 Balikyethu, ngabalemba-lemba indi mubye ng’ingye, kundi naghe nanabya ngoku muli. Mumuthanyisoberya. 13 Aliwe munasi ngoku nabana akaghisa k’erimbere ak’eribabwira okwa ngulhu yuwene busana n’obulhwere bwaghe. 14 Kandi nomwakine indi obulhwere bwaghe mubwabya kitsibu okw’inywe, mumuthanyikuthya kutse erinyinuwa;* aliwe mumwanyangirira ng’omumalaika wa Nyamuhanga, nga Kristo Yesu. 15 Etseme eyo mwabya nayo yiri hayi? Kundi ngabahera obwema ngoku ku kyabya ikyangana thokekana, mwangakulhangire ameso wenyu imwanyihagho. 16 Neryo mbwino nabiribya nzighu yenyu habw’eribabwira ekwenene? 17 Bali n’omuhwa w’erianza eribakurira okwa lhuhandi lhwabo, aliwe isi busana n’ekighendererwa kibuya; banzire eribaghabulha okw’ingye, nuku mwanganza eribakwama. 18 Aliwe mughulhu wosi ni kibuya omundu eribasondekania kutsibu busana n’ekighendererwa kibuya butsira omughulhu ngali nenyu lisa, 19 abaana baghe balere, abakaleka ingathasyabya omwa bulhumi bw’eributha erihika aho Kristo akendi thondekanibirwa omw’inywe. 20 Ngayisunza indi ambi ngalyabya nenyu okwa ndambi eno inakania nenyu omwa yindi mibere, kundi ngahanga-hangaya busana nenyu.
21 Muthambwira, inywe mwanzire eribya ahisi sy’emighambo, Simulyowa Emighambo? 22 Ng’eky’erileberyako, kihandikire kithi Abrahamu aby’awithe baghalha babiri, omughuma okwa musika omughombe n’owundi okwa mukali w’obwiranda; 23 aliwe ow’omusika omughombe abuthawa omwa mibere y’obuhangiranwa* n’ow’omukali w’obwiranda abuthawa erilhabira omwa mulhaghe. 24 Emyatsi eyi yangana thwalhwa omwa nzira y’omusyo; kundi abakali aba bak’imanira esyondaghane ibiri, ey’okwa Kithwe Sinai, eyikabutha abaana b’obukobe nayu ini Hagari. 25 Hagari akamanyisaya Sinai, ekithwe ekiri e Arabia, kandi ak’imanira e Yerusalemu eya munabwire, kundi ali omwa bukobe n’abaana biwe. 26 Aliwe e Yerusalemu y’endatha yiri bwiranda, kandi ni mama wethu.
27 Kundi kihandikire kithi: “Wutseme iwe mukali ngumba oyuthebutha; wuyisyandire omo mulenge munene w’etseme, iwe mukali oyuthasi bulhumi bw’eributha; kundi abaana b’omukali oyuwabirisighanibwa ni bangyi kwilhaba ab’omukali oyuli n’iba.” 28 Neryo balikyethu, muli baana b’omulhaghe ngoku Isaka abya. 29 Aliwe ngoku oyuwabuthawa omwa mibere y’obuhangiranwa* anatsuka eriendererya oyuwabuthawa erilhabira omwa mulimu, kwabine bithya na lino. 30 Nomwabine, amasako akabugha athiki? “Thibitha okwa musika omughombe na mughalha wiwe, kundi mughalha w’omusika omughombe syendi syabya muwetwa haghuma na mughalha w’omukali w’obwiranda.” 31 Neryo balikyethu, thuli baana b’omukali w’obwiranda butsira ab’omusika omughombe.