Ebaruha y’Erimbere Okwa Banya Korinto
10 Neryo balikyethu, nganzire imwaminya ngoku abothatha-kulhu wethu abosi babya ahisi sy’ekithu kandi abosi mubalhaba omwa ngetse 2 kandi abosi mubabatizibwa omu Musa erilhabira omo kithu n’omwa ngetse, 3 kandi abosi mubalya ebyalya by’obunyakirimu bighumerere 4 kandi abosi mubanywa amaghetse w’obunyakirimu maghumerere. Kundi ibakanywira okwa lhukuka lhw’obunyakirimu olhwabya lhukabakwama, kandi olhukuka olho lhwamanyisaya* Kristo. 5 Nomwabine, Nyamuhanga mwathatsemera abangyi b’okw’ibo, mub’ithirwa omwa mbwarara.
6 Emyatsi eyi muyabya by’erileberyako okw’ithwe, nuku sithuyighombe ebik’itha nye, ngoku bayighombabyo. 7 Kutse eribya abakaramaya esyosanamu, ng’abandi b’okw’ibo ku bakolha; ngoku kihandikire kithi: “Abandu mubikalha bamalya n’erinywa. Neryo mubahangana bamayitsemesya.” 8 Kandi sithukole eby’obutswatswa* ng’abandi b’okw’ibo ku bakolha eby’obutswatswa,* kyamaleka abandu 23,000 ibaholha omwa kiro kighuma. 9 Kutse isithwalenga oku Yehova, ng’abandi b’okw’ibo ku bamulengako, kyamaleka esyonzoka isyab’itha. 10 Kutse isithwayineghenaya, ng’abandi b’okw’ibo ku bayineghenaya, kyamaleka omuthoghothya iniabahwerekererya. 11 Neryo emyatsi eyi muyababyako babye by’erileberyako, kandi muyahandikwa busana n’erighusa akasali okw’ithwe abaliho okw’ihwererera ly’emighulhu.
12 Neryo oyukalengekanaya athi animene, ayitheghaye akasyayithinira. 13 Sihali erilengwako erikabahikako erithehika okwa bandu. Aliwe Nyamuhanga ni muyiketherwa, kandi syangaligha mukabana erilengwako eryo muthe mwangathoka erighumira, aliwe kandi omw’ilengwako eryo akendi yira eky’erikolha nuku mwanga thoka eriyiyiniryalyo.
14 Neryo banzwa baghe, muthibithe musaghe eriramya esyosanamu. 15 Ngakanaya ng’oyukakanaya n’abandu abakayitheghereraya; inywibene-bene mutswere ebyo ngabugha. 16 Ekikopo ky’emighisa ekyathukasabira, mbwino si sangira omwa musasi wa Kristo? Omuggati owathukatsutsanga n’erirya, mbwino si sangira omwa mubiri wa Kristo? 17 Kundi hali muggati mughuma, neryo nomuthune bangyi thuli mubiri mughuma, kundi ithwe bosi thukalya okwa muggati mughuma oyo.
18 Musamalire Israeli omwa nzira y’ekinyamubiri: Mbwino abakalya ebihongo sibali sangira omwa by’ekiherero? 19 Neryo ni kyahi ekyo ngabugha? Mbwino ekikahongerawa esanamu nina kindu, kutse esanamu nina kindu? 20 Eyihi; aliwe ngabugha nyithi ebyo abanya bihanda bakahonga, bakabihongera esyombinga butsira Nyamuhanga; kandi singanzire mukasangira haghuma n’esyombinga. 21 Simwangabya mukanywa okwa kikopo kya Yehova n’ekikopo ky’esyombinga; simwangabya mukalya okwa “meza ya Yehova” n’okwa meza y’esyombinga. 22 Kutse ‘thukabukaya omu Yehova mw’erihali’? Sithumulengirye kaghalha, ikyanabya?
23 Ebindu byosi bikalighawa, aliwe si bugha indi ebyosi bikaghasa. Ebindu byosi bikalighawa, aliwe si bugha indi ebyosi bikahimba. 24 Obuli mundu alhole embere erisondekania erighasirwa ly’owundi, butsira eriwe.
25 Mulye ekyosi-kyosi ekikaghulibawa omwa kathali k’esyonyama isimuthabulirirya busana n’obunyamuthima-thima bwenyu, 26 kundi “ekihugho n’ebyosi ebirimo ni bya Yehova.” 27 Oyuthikirirye amabakokya kandi imunanzire erighendayo, mulye ekyosi-kyosi ekyo akabatheghekera, isimuthabulirirya busana n’obunyamuthima-thima bwenyu. 28 Aliwe owosi-wosi amababwira athi, “Ekindu eki kiryahebawayo ng’obuhere,” isimwalya busana n’oyulyababwira na busana n’obunyamuthima-thima. 29 Sindi manyisaya obunyamuthima-thima obwawu, aliwe obw’owundi mundu. Kundi busana naki obwiranda bwaghe ibwatswerwa omwa bunyamuthima-thima bw’owundi mundu? 30 Namabya iningalya inganemuha ewasingya, busana naki inatsumwa-tsumwa busana n’ekyo ngahako ewasingya?
31 Busana n’ekyo, mbulha mukalya kutse mukanywa kutse mukakolha ekyosi-kyosi, mukole ebyosi busana n’eriha Nyamuhanga y’olhukengerwa. 32 Muyitheghaye okw’ithwikalya Abayuda kuthya n’Abagiriki n’ekithunga kya Nyamuhanga, 33 ngoku nganemulengaho eritsemesya abandu bosi omwa byosi, butsira erisondya erighasirwa eryaghe aliwe ery’abangyi, nuku banga lhamibwa.