Okwa Banya Roma
2 Neryo iwe mundu, mbulha wulindi, siwuwithe eky’eriyihambulyamo, wamatswera; kundi omughulhu wukatswera owundi, nawu wukabya iwamayitswera, kundi iwe wukatswera wukakolha ibyan’ebyo. 2 Neryo lino thunasi ngoku eritswera lya Nyamuhanga okw’abakakolha emyatsi ng’eyi lihambene n’ekwenene.
3 Aliwe iwe mundu, wukalengekanaya wuthi wamabya iwunemutswera abakakolha emyatsi ng’eyi kandi iwe iwunemukolhayo, iwunemwendi syabalha okw’itswera lya Nyamuhanga? 4 Kutse wukatsanga omwa lhukeri lhwiwe lhunene n’eriyiyinia* liwe n’erighumisirizya liwe, kundi siwasi ngoku omwa lhukeri lhwiwe, Nyamuhanga anemulengaho erikulholya okw’iyisubamu? 5 Aliwe erikwamana n’obukale bwawu n’omuthima wawu owatheyisubamu, wunemuyibikira obuhithane okwa kiro ky’erihithana n’eky’eribisulha eritswera lya Nyamuhanga erithunganene. 6 Kandi akendi syaliha obuli mundu erikwamana n’emikolere yiwe: 7 engebe y’erikotha okw’abakasondekanaya olhukengerwa n’erisikya n’obuthahonda omw’iyiyinia omwa mubiiri owuwene; 8 aliwe okw’abakakakalhukana n’abatheghendera okwa kwenene aliwe ibakwama ebithathunganene, Nyamuhanga akendi syabahithanako n’eribasuyira. 9 Hakendi syabya obulighe n’erinuba okwa buli mundu oyukakolha ebibi, erimbere okwa Muyuda n’Omugiriki iniakwamako; 10 aliwe olhukengerwa n’erisikya n’obuholho okwa buli mundu oyukakolha ebibuya, erimbere okwa Muyuda n’Omugiriki iniakwamako. 11 Kundi Nyamuhanga syawithe kasolholho.
12 Kundi abosi abakolha ebibi isibawithe emighambo bakendi syahera isibawithe mighambo; aliwe abosi abakolha ebibi ibanawithe emighambo bakendi syatswerwa omwa mighambo. 13 Kundi abakowa emighambo sibabathunganene embere sya Nyamuhanga, aliwe abakakolha ebya emighambo yikabugha bakendi syahulhwamo bathunganene. 14 Kundi omughulhu abandu b’ebihanda, abathawithe emighambo, bakaghendera okwa mighambo omwa nzira y’obuhangiranwa, abandu aba, nomobathawithe emighambo, ibo bibene-bene bakayibera mighambo. 15 Aba babakakanganaya ebiri omwa mighambo ku bihandikire omwa mithima yabo, n’obunyamuthima-thima bwabu ibunemubahera obwema, n’amalengekania wabo iniabahandikirira kutse nibya iniabimira. 16 Eki kikendi syabya okwa kiro omughulhu Nyamuhanga erilhabira omu Kristo Yesu akendi syatswera emyatsi y’abandu ey’embitha, erikwamana n’engulhu yuwene eyo ngathulhughanaya.
17 Wamabya lino, iwukahulhawamo Muyuda, kandi iwukayikethera emighambo n’eriyisyethera Nyamuhanga, 18 kandi iwunasi erisonda liwe n’eriligha emyatsi ey’omughaso munene kundi wabirikangiriribwa* Emighambo, 19 kandi iwunakakasirye ku wuli musondoli w’esyondimethime, ekyakakalha eky’abali omwa mwirima, 20 oyukahengulha abakiru, omukangirirya w’abaana balere, kandi oyuwithe emyatsi mikulhu y’eriminya n’ey’ekwenene eyiri omwa Mighambo— 21 aliwe iwe wukakangiriraya owundi, isiwuli yikangiriraya? Iwe wukathulira wuthi, “Isiwiba,” wuk’iba? 22 Iwe wukabugha wuthi, “Isiwasingira,” wukasingira? Iwe, wuponire esyosanamu, wukanyegha esyohekalhu? 23 Iwe wukayisyethera emighambo, wukaghana erisikya Nyamuhanga omw’ithwa Emighambo? 24 Kundi “erina lya Nyamuhanga linemutsumwa omwa kathi-kathi k’ebihanda busana nawu,” ngoku kihandikire.
25 Omo kwenene, eribanibwa irikendibya ly’omughaso iwunalyaghendera okwa mighambo; aliwe wamabya oyukathwa emighambo, eribanibwa lyawu isirikir’ibanibwa. 26 Neryo kwesi, oyuthabanibwe amaghendera okwa bikayithaghisibawa omwa Mighambo ebithunganene, erithendi banibwa liwe irikendi ghanzwa mw’ibanibwa, kwa bithe? 27 Kandi oyuthabanibwe okwa mubiri amaghendera okwa Mighambo, iniakendi kutswera iwe wukathwa emighambo nomwakine indi wunawithe ebihandiko byayo kandi iwunabanibwe. 28 Omuyuda w’okwa mubiri kw’eyihya oyo si Muyuda, kutse eribanibwa si ry’okwa mubiri kw’eyihya. 29 Aliwe Omuyuda akabya Muyuda omwa kathi, n’eribanibwa liwe ni ly’omuthima erilhabira omwa mulimu butsira omwa mighambo eyihandikire. Eripipwa ly’omundu oyo likalhua oku Nyamuhanga butsira oko bandu.