Ebaruha ya Yakobo
5 Inywe bagaga mwase lino, mulire kandi muyilhakire busana n’amalighe awakayabahikako. 2 Obugaga bwenyu bwabiribbolha, n’esyongyimba syenyu syabirilibwa n’ehinyurughunzu. 3 Ehoro n’efeza yenyu byabiryasako amakenge, n’amakenge wabyo akendibya bwema busana nenyu kandi akendirya emibiri yenyu. Ebyo mwabiriyibikira bikendi syabya ng’omuliro omwa biro by’erighunzerera. 4 Lebaya! Obuhingyi obo mwabirighana erithuha abakoli abaghesa amalima wenyu bunemulira, n’ekiriro ky’abaghesi eky’erisaba obuwathikya kyabirihika omwa mathwe wa Yehova* ow’amahe. 5 Mwabiribya omwa ngebe y’ekigaga-gaga n’ey’eriyitsemesya okwa kihugho. Mwabirinenehya emithima yenyu okwa kiro ky’erikerwa. 6 Mwabiritswera; mwabir’itha omuthunganene. Mbwino syali bahakanisaya?
7 Neryo balikyethu, mughumisirizaye erihika okw’ibyaho ly’Omukama. Lebaya! Omulimi akalholha embere erilinda ebighuma by’obughuli eby’ekithaka, erikangania erighumisirizya erihika aho embulha y’erimbere n’ey’erinyuma yikendyasira. 8 Nenyu mughumisirizaye; musikaye emithima yenyu, kundi eribyaho ly’Omukama lyabiriseghera hakuhi.
9 Balikyethu, owundi syayineghenaye okwa wundi, nuku simutswerawe. Lebaya! Omutsweri animene okwa lhukyo. 10 Balikyethu, mukwame eky’erileberyako ky’abaminyereri abakanaya omwa lina lya Yehova,* abaghalhawa omwa bibi n’erikangania erighumisirizya. 11 Lebaya! Thukaghanza abayiyinaya mwa b’obutseme. Mwabiriowa okw’iyiyinia lya Yobu kandi mwabirilhangira ebyo Yehova* amuha, ngoku Yehova* awithe olhwanzo lhw’eribuya-buya kandi ku ni w’obughanyiri.
12 Ekikulhu kutsibu, balikyethu, mulekere aho erilhahirya omwa lina ly’olhubulha kutse ery’ekihugho kutse omwa kindi kilhahiryo kyosi-kyosi. Aliwe muleke e “Ee” yenyu yibye ee ne “Eyihi” yenyu, eyihi, mukasyatswerwa.
13 Mbwino omw’inywe mune owosi-wosi oyukaghalhawa busana n’ebitsibu? Asabe mughulhu wosi. Mbwino hane oyutsemire? Imbe esyonyimbo. 14 Mbwino omw’inywe mune owosi-wosi oyulhwere? Abirikire abasyakulhu b’ekithunga, bamusabire, bamuhakabaye amaghutha omwa lina lya Yehova.* 15 N’omusabe w’erikirirya akendi leka omulhwere inialhama, kandi Yehova* akendi muhangania. Kandi, amabya iniabirikolha ebibi, iniakendi ghanyirwa.
16 Busana n’ekyo, mubikulirane amalholho wenyu ahathe eribisirira kandi musabirane, nuku mwangalhamibwa. Omusabe w’erilemba-lemba ow’omuthunganene awithe amaaka manene. 17 Eliya abya mundu oyuwithe eriyowa ng’eryethu, aliwe abere akasaba erilhua okwa muthima athi embulha siyiwe, muyithawa okwa kithaka habw’emyaka isathu n’amezi mukagha. 18 Neryo enyuma waho kandi mwasaba, olhubulha mulhwahulhukya embulha n’ekithaka mukyahethya ebighuma.
19 Balikyethu, omw’inywe mwamabya oyukathalibawa okwa kwenene n’owundi akamusubulya, 20 muminye ngoku owosi-wosi oyukasubulhaya omukolha-nabi erilhua okwa nzira yiwe nyibi akendi syamulhamya okwa lhuholho kandi akendi syakuningira amalholho mangyi.