Emibiiri y’Abakwenda
21 Thwabere thwabiriyinyukulha kubo, muthwasoka engetse, thwamalhaba omwa nzira eyitherekerere thwamasa e Kosi, n’ekiro ekyakwamako muthwaghenda e Rodo, thwamalhua eyo thwamaghenda e Patara. 2 Thwabere thwabana obwathu obukasokera e Foiniki, muthwabusambiramo thwamasoka. 3 Thwabere thwahika hakuhi n’ekizinga ekye Kipuro, muthwakisigha enyuma okwa lhuhandi lhw’amalembe,* thwamasokera e Suria n’erimana e Tiro, eyo obwathu bwabya butholere erighobera nuku balhusayemo emisiko. 4 Neryo muthwasondya abigha, thwamababana, thwamabyayo habw’ebiro musanju. Aliwe erilhabira omwa mulimu, mubabera eribwira Paulo bathi isyalyathaya ekisandu kiwe kye Yerusalemu. 5 Neryo obuthuku bwethu bw’eribyayo bwabere bwahwa, muthwahongoka thwamalholha embere n’olhughendo lhwethu, aliwe abosi, haghuma n’abakali n’abaana, mubathutsindika erihika aho thwahulhukira omwa tawuni. Neryo muthwakukama okwa musike w’engetse thwamasaba 6 n’eribwirana thuthi bukyayi. Neryo muthwasambira omo bwathu, nabu bamasuba ewabo.
7 Neryo muthwaghunza olhughendo lhwethu lhw’erilhua e Tiro thwamahika e Tolemai, neryo thwamaramukya balikyethu kandi thwamaghunza nabo kiro kighuma. 8 Ekiro ekyakwamako muthwalhuayo thwamasa e Kaisaria, thwamingira omwa nyumba ya Filipo omuthuli w’enjiri, oyuwabya mughuma w’okwa balhume musanju, neryo muthwabya ewiwe. 9 Omulhume oyu aby’awithe bali biwe bbani abahuru* ababya bakaminyerera. 10 Aliwe thwabere thwabiribyayo habw’ebiro birebe, omuminyereri oyukahulhawamo Agabo mwandaghalha erilhua e Yudea. 11 Neryo mwathuhikako amimya omukabba wa Paulo amaboha mw’ebisando biwe n’ebyalha n’eribugha athi: “Omulimu abuyirire athi, ‘Abayuda be Yerusalemu bakendiboha omwinye omukabba ono ya bathya kandi bakendi muhira omwa byalha by’abandu b’ebihanda.’” 12 Neryo thwabere thwowa eki, ithwe n’ababyaho muthwatsuka erimulemba-lemba thuthi syahethukire e Yerusalemu. 13 Neryo Paulo mwabugha athi: “Busana naki mukalira n’erilengaho eritsekya erithwamu lyaghe?* Ngabakakasaya ngoku nganayitheghekire eribohwa n’eriholera e Yerusalemu busana n’erina ly’Omukama Yesu.” 14 Abere aghana eriligha erilemba-lemba lyethu, muthwabikyako* thwamabugha thuthi: “Leka erisonda lya Yehova likoleke.”
15 Neryo enyuma w’ebiro ebi, muthwayitheghekera olhughendo lhw’eriya e Yerusalemu neryo muthwahongoka. 16 Abaghuma b’okwa bigha erilhua e Kaisaria nabo mubaghenda nethu, mubathuthwalha ewa Nesoni owe Kipuro, omwigha wakera oyo thwabya b’eribya bagheni biwe. 17 Thwabere thwahika e Yerusalemu, balikyethu mubathwangirira ibanatsemire. 18 Aliwe ekiro ekyakwamako, Paulo mwaghenda nethu ewa Yakobo, n’abasyakulhu abosi babya ibaneho. 19 Neryo mwabaramukya n’eritsuka eribabwira buuli emyatsi eyo Nyamuhanga akolha omwa kathi-kathi k’ab’ebihanda erilhabira omw’ithulira liwe.
20 Babere babiriowa eki, mubatsuka eriha Nyamuhanga y’olhukengerwa, aliwe mubamubwira bathi: “Mughalha wethu, wanamalhangira ngoku omwa Bayuda muli esyongumi sy’abikirirya kandi abosi bawithe omuhwa w’erikwama Emighambo. 21 Aliwe babiriowa ebinyambwirwa ebikuhambireko ambu wabya wukakangirirya Abayuda bosi abali omwa b’ebihanda wuthi baleke erikwama Emighambo ya Musa, eribabwira wuthi isibabanaya abaana babu kutse erikwama emirwa yabo. 22 Neryo thukoleki okw’eki? Omo kwenene bakayowa ngoku wabirihika eno. 23 Neryo wukole ebya thukakubwira: Thuwithe abalhume bbani ababirilhahirya. 24 Wughende n’abalhume aba wuyeraye haghuma nabo erikwamana n’emirwa kandi wubalihire ebikayithaghisibawa, nuku banga ghemba emithwe yabo. Neryo obuli mundu akendi minya ngoku ebinyambwirwa ebyo babwirawa ebikuhambireko ni mabehi, aliwe ngoku wunemulendera omwa buyithondeke kandi ku wunemughendera okwa Mighambo. 25 Bikahika okwa bikirirya abanya bihanda, thwabiribathumira erithwamu lyethu omwa buhandiki ngoku batholere ibayihighulha okwa biryahongerawa esyosanamu kuthya n’okwa musasi, n’okwa kyabiriniwa,* n’okwa by’obutswatswa.”*
26 Neryo ekiro ekyakwamako, Paulo mwaghenda n’abalhume abo amayayerya haghuma nabo erikwamana n’emirwa, neryo mwaghenda omwa hekalhu erikangania ebiro by’eriyerya erikwamana n’emirwa nga bikendi syahwa mughulhu wahi n’obuhere obutholere ibwahebwayo busana n’obuli mughuma w’okw’ibo.
27 Neryo ebiro musanju ibikisiya ibyahwa, Abayuda erilhua e Asia, babere bamulhangira omwa hekalhu, mubahongererya bandu abosi neryo bamamuhamba, 28 ibanemubirikira bathi: “Balhume be Israeli, muwathikaye! Oyu y’omulhume oyukakangiriraya obuli mundu ehosi-hosi amabehi okwa bandu bethu n’okwa Mighambo yethu n’okwa mwanya ono. Kandi ekilhabire okw’aho, nibya mwaletha Abagiriki omwa hekalhu kandi abiritsandya omwanya owabuyirire ono.” 29 Kundi ahanyumaho babya ibabirilhangira Trofimo omunya Efeso iniane omwa tawuni na Paulo, neryo mubalengekania bathi Paulo abya iniabirimuletha omwa hekalhu. 30 Etawuni yosi muyabya mw’ebyughungu, n’abandu mubasa bakathibitha n’erihamba Paulo n’erimukurira eyihya w’ehekalhu, kandi aho naho esyonyuyi musyakingwa. 31 Babere bakanza erimwitha, omwatsi mwahika oku kamanda w’egurupu y’amahe ngoku e Yerusalemu eyosi yabiribyamo akatabanguko; 32 neryo aho naho mwathwalha abasirikali n’abakulhu b’abasirikali bamanguha eribandaghalirako. Babere balhangira kamanda w’abasirikali n’abasirikali, mubalekeraho eriswirya Paulo.
33 Neryo kamanda w’abasirikali mwasa hakuhi, amamuhamba n’erihamulha athi abohawe omwa bigyeghere bibiri; neryo mwabulya nga nindi kandi ng’akolireki. 34 Aliwe abandi omwa kingungu mubatsuka eribugha ebithahambene omwa mirenge miiri. Neryo abere alemwa eriminya ekiriho nga niki busana n’ewaha-waha, mwalhaghira athi alethawe omwa bbarakisi y’abasirikali. 35 Aliwe Paulo abere ahika okwa matembero, abasirikali mubabya b’erimuheka busana n’akaburungu k’ekingungu ky’abandu, 36 kundi ekingungu ky’abandu kyabya ikinabakwamire ikinemubirikira kithi: “Mumughunzeho!”
37 Iniakisiya in’ingiribwa omwa bbarakisi y’abasirikali, Paulo mwabwira kamanda w’abasirikali athi: “Nganalighirwe erikubwira ekyosi-kyosi?” Mwamusubirya athi: “Wunasi Olhugiriki? 38 Mbwino siwe munya Misiri oyuwatsukisaya obuyisamambuli obwabyaho kera n’erisondolha abalhume 4,000 ab’emiyali omwa mbwarara?” 39 Neryo Paulo mwabugha athi: “Indi Muyuda owe Tarso e Kilikia, omwikalhani w’omwa tawuni eyasibwe. Neryo ngakulemba-lemba, wunyilighire ngakaniraye abandu.” 40 Abere abirimulighira, Paulo mwimana okwa matembero amahunia abandu omwa byalha biwe. Habere habiribya akahunerero, mwabakanirya omwa Lhuheburania athi: