Emibiiri y’Abakwenda
3 Neryo Petero na Yohana babya ibanemuhethukira okwa hekalhu okwa saha y’erisaba, saha mwenda,* 2 n’abandu babya ibanahekire omulhume oyuwabuthawa ini mulema. Obuli kiro ibakamuhira hakuhi n’olhukyo lhw’ehekalhu olhwabya lhukahulhwamo Lhubuya, nuku angasaba abak’ingira omwa hekalhu b’ebihembo by’olhukeri. 3 Abere alhangira Petero na Yohana ibakayingira omwa hekalhu, mwatsuka erisaba ebihembo by’olhukeri. 4 Aliwe Petero haghuma na Yohana mubamuthungerera n’eribugha bathi: “Thusamalire.” 5 Neryo mwabahanda kw’ameso akalengekania athi bakayamuha kindu kirebe. 6 Aliwe Petero mwabugha athi: “Singawithe efeza n’ehoro, aliwe ebyangawithe bya ngendi kuha. Omwa lina lya Yesu Kristo Omunazareti, lyatha!” 7 Neryo mwamuhamba okwa kuboko kw’amali n’erimuhangania. Aho naho ebisandu biwe n’ehikongulhu hiwe mubyakalha-kalha; 8 neryo mwahangana, amatsuka erilyatha kandi amaghenda nabu omwa hekalhu, inianemulyatha n’eriyisumbanga n’eripipa Nyamuhanga. 9 N’abandu bosi mubamulhangira inianemulyatha kandi inianemupipa Nyamuhanga. 10 Neryo mubatsuka erimuminyerera, bathi oyu y’omulhume oyuwabya akabera er’ikalha okwa Lhukyo Lhubuya olhw’ehekalhu akalindirira ebihembo by’olhukeri, neryo mubaswekera ighuma n’eritsema kutsibu busana n’ekyabirimubyako.
11 Omulhume abere akinahambire oku Petero na Yohana, abandu bosi mubasa bakathibitha aho bali ahabya hakahulhwamo Bbalaza y’Esyonduhi* ya Solomona, ibabiriswekera ighuma. 12 Petero abere alhangira eki, mwabwira abandu athi: “Bandu be Israeli, busana naki eki ikyabaswekya, kandi busana naki imwathuthungerera eribya omulhume oyu ng’amalyatha busana n’amaaka wethu kutse busana n’ithwe erikenga Nyamuhanga? 13 Nyamuhanga wa Abrahamu kandi owa Isaka na Yakobo, Nyamuhanga w’abathatha-kulhu bethu, abiriha Omughombe wiwe, Yesu, y’olhukengerwa, oyo mwahira omwa byalha by’abandu n’erimuyighana embere sya Pilato, nomwakine indi Pilato abya iniabirithwamu erimuboholha. 14 Ee, mumwayighana oyubuyirire oyo kandi oyuthunganene, kandi mumwasaba erihebwa omulhume omwithi, 15 aliwe mumw’itha Omusondoli Mukulhu w’engebe. Nomwabine, Nyamuhanga mwamulhubukya okwa baholi, kandi thuli bema b’omwatsi oyu. 16 Kandi erilhabira omwa lina liwe, nethu erikirirya omwa lina liwe, omulhume oyomulhangire oyu kandi oyo munasi abirilhamibwa. Erikirirya omu Yesu ly’eryamaleka omulhume oyu inialhama ndeke embere syenyu. 17 Neryo lino balikyethu, nganasi ku mwakolha omwa buthaminya, ngoku abathabali benyu nabo bakolha. 18 Aliwe omwa nzira eyi Nyamuhanga abiriberererya emyatsi eyo asangwa aranga erilhabira omwa buno bw’abaminyereri abosi, ngoku Kristo wiwe abya w’eriaghalhwa.
19 “Busana n’ekyo, muyisubemu n’eribinduka nuku ebibi byenyu bisangulhawe, nuku emighulhu y’erilhuhuka yangalhua oku Yehova iyuwene-wene* 20 kandi angathuma Kristo oyo abiribasombolera, Yesu. 21 Oyu atholere iniabya iniane elhubulha erihika aho emighulhu y’erisuba-subania emyatsi eyosi eyo Nyamuhanga abugha erilhabira omwa buno bw’abaminyereri biwe ababuyirire abakera. 22 Kundi nibya Musa mwabugha athi: ‘Yehova Nyamuhanga wenyu asyabahanganirya omwa baghalha benyu mw’omuminyereri oyuli ng’ingye. Mutholere imwahulikirira ekyosi-kyosi eky’akababwira. 23 Kandi kwenene, omundu wosi-wosi oyuthehulikirira Omuminyereri oyo akendi syathoghothibirwa ighuma erilhua omwa bandu.’ 24 Kandi abaminyereri abosi eritsuka oku Samweli n’abamusubuka, n’abangyi ababirimukaniako, nabo babirikania okwa biro ebi ahathe eribisirira. 25 Muli baghalha b’abaminyereri n’ab’endaghane eyo Nyamuhanga akolha haghuma n’abathatha-kulhu wenyu, akabwira Abrahamu athi: ‘Kandi erilhabira omwa lhubutho* lhwawu amahiika wosi w’ekihugho asyatsumulhwa.’ 26 Nyamuhanga, abere abirilhubukya Omughombe wiwe, mwatsuka erimuthuma okw’inywe nuku abatsumule omw’ibindulha obuli mughuma w’okw’inywe erileka emikolere yiwe mibi.”