Ebaruha Yakabiri Okwa Banya Korinto
5 Kundi thunasi ngoku enyumba yethu y’okwa kihugho, ehema eno, yamahimbulhwa,* ithukendi syabya n’enyumba erilhua oku Nyamuhanga, enyumba eyithahimbawa n’ebyalha by’abandu, eya kera na kera omwa lhubulha. 2 Kundi kwenene omwa nyumba* eno thukasimba, ithwayisunza kutsibu eryambalha eyethu* ey’elhubulha,* 3 nuku omughulhu thwangambalhayo, sithwendi sy’eghibwa ndumbu. 4 Ni kwenene, ithwe thuli omwa hema eno thukasimba, ithwalithoherwa, kundi sithwanzire erilhusya ehema eno, aliwe thwanzire eriambalha eyindi, nuku engebe yangamera ekikahonda. 5 Neryo oyuwathuthegheka busana n’ekindu eki ni Nyamuhanga, oyuwathuha omulimu ng’omutsimbo w’ebikendi syasa.*
6 Neryo mughulhu wosi thuli n’erisika linene ithunasi ngoku nomuthunawithe obwikalho bwethu omwa mubiri, sithuli eyiri Omukama, 7 kundi thukalendera omw’ikirirya butsira omw’ilhangira. 8 Aliwe thuli n’erisika linene kandi n’iyisunza lyethu erilhua omwa mubiri nuku obwikalho bwethu bubye haghuma n’Omukama. 9 Neryo mbulha thwikere nayu kutse sithuli eyo ali, thukayira mwa kilhubirirwa kyethu iyo erithuligha. 10 Kundi ithwe bosi thukendi sy’imana* embere sy’ekithumbi ky’eritswera kya Kristo, nuku obuli mundu angasyalihwa erikwamana n’eby’akakolha iniane omwa mubiri, mbulha ni bibuya kutse bibi.*
11 Busana n’ekyo, kundi thunasi eryubaha ly’Omukama, thukalholha embere erisona-sona abandu, aliwe Nyamuhanga anathwasi ndeke.* Nomwabine, ngawithe amaha indi thunasibwe ndeke* n’omwa bunyamuthima-thima bwenyu. 12 Sithwendi thasyayihamyako embere syenyu aliwe thukabahira mw’omuhwa w’erithuyihalhambira, nuku mwangathoka erisubirya abakayihalhambira emisosere y’eyihya butsira ebiri omwa muthima. 13 Kuthwabya isithuli ndeke omwa bwongo, ini busana na Nyamuhanga; thwamabya ithune ndeke omwa bwongo, ini busana nenyu. 14 Kundi olhwanzo lhwa Kristo lhukathusukuma, kundi thwabirighunzerera thuthi, ngoku omundu mughuma mwaholha busana n’abosi; neryo abosi babiriholha. 15 Kandi mwaholha busana n’abosi nuku abaliho sibabyeho ahabwabo ibobene-bene, aliwe busana n’oyuwaholerabo kandi amalhubukibwa.
16 Neryo eritsuka lino, sithwasi mundu wosi-wosi erikwamana n’amalengekania w’ekinyamubiri. Nomuthwanabya thwasi Kristo erikwamana n’omubiri, sithukimwasi thuthya. 17 Busana n’ekyo, owosi-wosi amabya iniamathikene na Kristo, ni kihangikwa kihya-kihya; emyatsi eya kera yabirilhaba; lebaya! habiribya emyatsi mihya-mihya. 18 Aliwe emyatsi yosi yikalhua oku Nyamuhanga, oyuwathuwathikaya erisubanamo nayu erilhabira omu Kristo n’erithuha omubiiri w’erisubya abandu okw’iyo, 19 ni bugha ambu, Nyamuhanga erisubanamo n’ekihugho erilhabira omu Kristo, isyakibaghanzirako ebibi byabo, kandi mwathuha olhukwamirwa lhw’erithulhughania omwatsi w’erisubanamo na Nyamuhanga.
20 Busana n’ekyo, thuli b’ambasada abak’imanira Kristo, eribya Nyamuhanga ng’akalemba-lemba abandu erilhabira omw’ithwe. Ithwe ng’abak’imanira Kristo, thukalemba-lemba thuthi: “Musubanemo na Nyamuhanga.” 21 Oyuthabya asi ekibi, mwayirwa mwa kibi* busana nethu, nuku erilhabira omw’iyo thwangabya lithunganene lya Nyamuhanga.