Ebaruha y’Erimbere Okwa Banya Korinto

13 Namakania omwa mibughe y’abandu n’ey’abamalaika aliwe isingawithe olhwanzo, inabiribya ng’ekyida ekikabughirana kutse erisengo erikabughirana. 2 Kandi namabya ingawithe ekihembo ky’eriminyerera n’eriyitheghererya esyombitha syosi esibuyirire n’eriminya lyosi, kandi namabya ingawithe erikirirya lyosi eryangahumya ebithwe, aliwe isingawithe olhwanzo, ingali buyira.* 3 Kandi namaha abandi b’ebyosi ebya ngawithe eribalisya, kandi namahayo omubiri waghe nuku ngayihalhambe, aliwe isingawithe olhwanzo, sindi ghasirawa nahake.

4 Olhwanzo lhukaghumisirizaya kandi ni lhw’olhukeri. Olhwanzo silhuli mw’erihali. Silhuli yipipa, silhuli yibimbaya, 5 silhulibya buthayira ngeso,* silhuli yitsomana ilholhwene, silhuli hithana. Silhuli bikirira erikolhwa nabi. 6 Silhuli tsemera ebithathunganene, aliwe lhukatsemera ekwenene. 7 Lhukaghumira emyatsi yosi, lhuk’ikiriraya emyatsi yosi, lhukabya n’amaha omwa myatsi yosi, lhukayiyiniraya emyatsi yosi.

8 Olhwanzo silhuli lemawa. Aliwe hamabya ihali ebihembo by’eriha obuminyereri, bikendi syahwaho; hamabya ihali eby’eribugha omwa syondimi,* bikendi syahwaho; hamabya ihali eriminya, likendi syahwaho. 9 Kundi eriminya lyethu sirilhughirirene, n’ebyathukabugha omwa buminyereri sibilhughirirene, 10 aliwe emyatsi eyilhughirirene yikendi syabya yasa, ebithalhughirirene ibyahwaho. 11 Omughulhu nabya mwana iningabugha ng’omwana, iningalengekanaya ng’omwana, iningaghaniraya ng’omwana; aliwe kundi lino nabirikulha, nabirileka emitse y’obwana. 12 Lino thukalhangira omo biruru* omwa ndabirwamu y’ekyuma, aliwe okwa buthuku obo kikendi syabya busu okwa busu. Lino ngasi bike-bike, aliwe okwa buthuku obo ngendi syaminya ebyosi ndeke-ndeke,* ngoku nganasibwe ndeke. 13 Aliwe, ebindu bisathu bino bikasighalha ibineho: erikirirya, amaha, olhwanzo; aliwe ekilengire ebi lhw’olhwanzo.