Ebaruha Yakabiri Okwa Banya Korinto

7 Neryo abanzwa, kundi thuwithe emilhaghe eyi, thuyerayeko ebyosi ebikatsandaya omubiri n’omulimu, erihikana omwa bubuyirire omw’ubaha lya Nyamuhanga.

2 Muthuhe omwanya omo mithima yenyu. Sithuthasoberya owosi-wosi, sithuthathebya owosi-wosi, sithuthabendekerya owosi-wosi. 3 Sindi bugha eki eribatswera. Kundi erilhua kera nabiribugha indi muli omwa mithima yethu ng’abangaholha haghuma nethu n’eribyaho haghuma nethu. 4 Ngawithe obwiranda bunene obw’erikania nenyu. Ngawithe eriyihalhamba linene busana nenyu. Nabirihumulikanibwa kutsibu; obutseme bunyibughene omw’aghalhwa lyethu lyosi.

5 Kundi nibya omughulhu thwahika e Makedonia, emibiri yethu muyithalhuhuka, aliwe muthwalholha embere eriaghalhwa omwa mibere yosi—habya amalhwa eyihya, obuba omwa kathi. 6 Aliwe Nyamuhanga, oyukahumulikanaya ababbunikire muthima, mwathuhumulikania omw’ibyaho lya Tito; 7 kandi isi busana n’eribyaho liwe lisa aliwe na busana n’erihumulikana eryo abana busana nenyu, akathubwira okwa lhukando olho munyiwithire, okwa bulighe bwenyu bunene, n’erinyitsomana* lyenyu linene; neryo mun’ongera eritsema.

8 Nomunangabya imunab’itha obulighe omo baruha yaghe, sindi yikubayabwomo. Nomwakine indi erimbere munanayikubyabwomo (kundi ebaruha muyab’itha obulighe, aliwe habw’akathambi kake), 9 lino ngatsemire, isi busana n’eribya imumwakwa obulighe buyira, aliwe kundi mumwakwa obulighe mwamayisubamu. Mumwakwa obulighe omwa nzira eyo Nyamuhanga akatsemera, nuku simughalhawe busana nethu. 10 Kundi erikwa obulighe omwa nzira eyo Nyamuhanga akatsemera likalhwiriramo eriyisubamu erikakolhaya okwa mulhamu, eriyikubyabwomo iryabya isirikiriho; aliwe erikwa obulighe ly’ekihugho mukalhwiririra olhuholho. 11 Kundi lhangira ngoku erikwa obulighe lyenyu omwa nzira eyo Nyamuhanga akatsemera mulyaleka imwahiraho akaghalha kanene, ee, imwayilhusyako olhubanza, ee, imwahithana okwa malholho wenyu, ee, imubaha, ee, imwabya n’eriyisunza linene, ee, imwabya n’omuhwa, ee, imwahengulha ekibi! Omwa buli kindu mukayikanganaya ku muhenirye* omo mwatsi oyu. 12 Nomunanabahandikira, sinakolha eki busana n’oyuwasobaya, kutse busana n’oyo basoberaya, aliwe nuku omuhwa wenyu busana nethu alhangirike omwa kathi-kathi kenyu embere sya Nyamuhanga. 13 Ekyo ky’ekyabirileka ithwahumulikanibwa.

Aliwe eryongera okw’ihumulikana lyethu, muthwongera eritsema busana n’etseme ya Tito, kundi inywe bosi mumwathulerya omuthima wiwe. 14 Kundi namabya imunabayihalhambira embere siwe, sinathahemuka; aliwe ngoku emyatsi yosi eyo thwababwira yabya yihikire, nethu eriyihalhamba lyethu embere sya Tito lyabiriminyikalha ku ni kwenene. 15 Kandi olhwanzo lhw’eribuya-buya olhw’abawithire ni lhunene omughulhu ak’ibuka obwowa bwenyu inywe bosi, ngoku mwamwangirira ndeke omw’ubaha n’omw’ithithimana. 16 Ngatsema kundi omwa mibere yosi nangana bayikethera.*