Ebaruha y’Erimbere oku Timoteo
5 Isiwatsweba-tsweba omulhume mukulhu. Omwakanya k’ekyo, kanaya nayu nga thatha, abalhwana ng’abaghalha benyu, 2 abakali bakulhu ng’abamama, abasika nga bali benyu, omwa muthima owahenirye.
3 Wutsomane* abakwakali abali kwenene bakwakali.* 4 Aliwe omukwakali wosi-wosi amabya inianawithe abaana kutse abitsikulhu, bakanganaye ku bakubaha Nyamuhanga omw’itsuka eritsomana ab’omwa nyumba yabo n’eriliha ababuthi babu n’abasokulhu n’abamukaka ebibatholere, kundi eki kikalighawa embere sya Nyamuhanga. 5 Omukali oyuli kwenene mukwakali kandi oyuwabirisighalha isyawithe kiwathikya, abirihira amaha wiwe oku Nyamuhanga n’erilholha embere erisaba omw’ilemba-lemba omwa kiro n’omw’ithungyi. 6 Aliwe omukwakali oyukayingiraya omwa by’eriyitsemesya by’omubiri aholire nomwakine indi aneho. 7 Neryo wulhole embere eriha erihabulha* eri, nuku sibabyeko kahinira. 8 Omo kwenene, owosi-wosi amathendiha ab’okw’iyo b’ebiyithawa byabo, kandi kutsibu-tsibu ab’omwa nyumba yiwe, akabya iniabirighana erikirirya kandi ini mubi kwilhaba oyuthikirirye.
9 Omukwakali atholere iniahirwa okwa mughanzo w’abakwakali amabya ini w’emyaka eyilhabire oku 60, inianabya mukali w’omulhume mughuma, 10 iniasibwe ng’oyukakolha ebibuya, amabya imwanalembera abaana, amabya iniabya mukokya, amabya inianabya akanabya ebisandu by’ababuyirire, amabya inianabya akawathikya abakaghalhawa, amabya inianabya akayihayo erikolha obuli mubiiri mubuya.
11 Okwa lhundi lhuhandi, isiwahira abakwakali balere okwa mughanzo w’abakwakali, kundi omughulhu esyongumbu syabu sy’emyatsi y’engyingo sikabakakiraya erikolera Kristo, bakayisunza erithahibwa. 12 Kandi bakendi syatswerwa busana n’erisighania erikirirya lyabo ly’erimbere.* 13 Kandi bakabya baghatha, eribera erighanga-ghanga omwa miyi; ee, isi baghatha lisa aliwe kandi ni b’olhuthongo kandi abakayingiraya omo myatsi yabene, erikania oko myatsi eya bathatholere erikaniako. 14 Busana n’ekyo, ngayisunza indi abakwakali abalere ibathahibwa, ibabutha baana, ibatsomana eka yabo, nuku sibahe omuhakani y’akaghisa k’erithutsambulikania. 15 Nibya abandi babirikwama Sitani. 16 Omukali wosi-wosi omwikirirya amabya inianawithe abahughu abakwakali, abawathikaye nuku sibabye muheke okwa kithunga. Nakyo kyanga wathikya abali kwenene bakwakali.*
17 Abasyakulhu abakasondolha omwa nzira eyuwene batholere ibasikibwa kabiri, kwilhabirirya abakakolha kutsibu omw’ikania n’omw’ikangirirya. 18 Kundi amasako akabugha athi, “Isiwaboha obuno bw’enume omughulhu yikakolesibawa okw’ihumba engano,” kandi athi, “Omukoli atholere obuhingyi bwiwe.” 19 Isiwaligha olhubanza olhukahirawa oko mulhume mukulhu* mbwino ihanalyabya abema babiri kutse basathu. 20 Abakabera erikolha ebibi wubakungire embere sy’abandu, ng’erighusa okwa bandi kw’akasali.* 21 Embere sya Nyamuhanga na Kristo Yesu n’abamalaika abasombolhwa, ngakulhaghira indi wughendere okwa bihano ebi ahathe kathondolho kutse kasolholho.
22 Isiwaharabana erihira okwa mulhume wosi-wosi kw’ebyalha;* kutse isiwasangira omwa bibi by’abandi; wubye iwunahenirye.
23 Isiwathasyanywa amaghetse,* aliwe wunywe evini nyike busana n’enda yawu kandi busana n’erilhwalha-lhwalha lyawu.
24 Amalholho w’abandi akaminyikalha embere sy’abandu, erikolya okw’itswerwa aho naho, aliwe aw’abandi bandu akaminyikalha linyuma. 25 Omwa nzira iyan’eyo, emibiiri mibuya yikaminyikalha embere sy’abandu n’eyithuwene siyangabiswa kera na kera.