Ebaruha Okwa Baebrania
5 Kundi obuli muhereri mukulhu oyukasombolhawa omwa bandu akahirawaho erib’imanira omo myatsi eyihambire oku Nyamuhanga, nuku angahayo ebihembo n’ebihongo busana n’ebibi. 2 Akathoka erithwalha abathasiki n’abakasobaya* omwa mibere ey’eribakwira obulighe,* kundi nayu anemubambirwa* n’obutseke bwiwe, 3 neryo busana n’ekyo atholere iniahayo obuhere busana n’ebibi biwe ngoku akanabuhayo busana n’ebibi by’abandu.
4 Omundu syangayiha ekitsumbi eki, aliwe akahebawakyo inianalyabirikirawa na Nyamuhanga, ngoku kyabya oku Haruni. 5 Neryo kuthya, Kristo mwathayiha olhukengerwa omw’ibya muhereri mukulhu, aliwe mwahebwa olhukengerwa n’Oyuwamubwira athi: “Wuli mughalha waghe; munabwire namabiribya thatha wawu.” 6 Ngoku akathasyabugha ahandi athi, “Wuli muhereri kera na kera omwa muhanda wa Melkizedeki.”
7 Omwa ngebe ya Kristo okwa kihugho,* iniakasaba omw’ilemba-lemba n’omw’ilhakira Nyamuhanga, n’erilira omw’ithoghongya emisoni, oko Yuwangathoka erimulhamya okwa lhuholho, kandi emisabe yiwe muyowibwa kundi iniakubaha Nyamuhanga. 8 Nomwanabya mughalha, mw’igha eribya mwowa omo ebyo aghalhawamo. 9 Kandi abere abirihikanibwa, mwabya n’olhukwamirwa lhw’erilethera abosi abakamwowa omulhamu wa kera na kera, 10 kundi abya iniabirisombolhwa na Nyamuhanga eribya muhereri mukulhu omwa muhanda wa Melkizedeki.
11 Thuwithe bingyi eby’erimukaniako, kandi kikalire erisoborera, kundi mwabiribya gholi-gholi omwowa lyenyu. 12 Nomwakine indi lino* mutholere eribya imuli bakangirirya, mukinayithagha oyuwanga bakangirirya eritsuka okwa myatsi y’omusingyi ey’ebinywe bya Nyamuhanga ebibuyirire, kandi mwabirithasyabya abakayithagha amathe, butsira ebyalya ebikalha-kalire. 13 Kundi obuli mundu oyukine okwa mathe akabya isyasi ekinywe ky’erithunganene, kundi akine mwana mulere. 14 Aliwe ebyalya ebikalha-kalire ni by’abandu abakulire, abo omw’ikolesya amaaka wabo w’obulengekania* babirithendekagho erighabulha ekihikire okwa kithahikire.