Ebaruha Yakabiri eya Yohana

1 Ingye musyakulhu mukulhu ngahandikira omukali omusombolhwa n’abaana biwe, oyo nganzire kutsibu, kandi is’ingye musa aliwe n’abosi ababiriminya ekwenene, 2 busana n’ekwenene eyiri omw’ithwe kandi eyikendibya iyine omw’ithwe kera na kera. 3 Thukendisyabya n’olhukogho, obughanyiri, n’obuholho erilhua oku Nyamuhanga Thatha n’erilhua oku Yesu Kristo, Mughalha wa Thatha, haghuma n’ekwenene n’olhwanzo.

4 Ngatsemire kutsibu kundi nabiryeya abaghuma b’okwa baana bawu ibanemulendera omwa kwenene, ngoku thwahebawa ekihano erilhua oku Thatha. 5 Neryo lino ngakulemba-lemba, iwe mukali, indi thwanzane. (Ngakuhandikira, butsira ekihano kihya-kihya, aliwe ekyo thwabya nakyo okw’itsuka.) 6 Kandi olhwanzo lhukamanyisaya kino, kithi thulhole embere erilendera erikwamana n’ebihano biwe. Ekihano kya kino, ngoku mwanabiriowa eritsuka okwa nzuko, ngoku mutholere imwalholha embere erilendera mukyo. 7 Kundi abathebya bangyi babiryasa omwa kihugho, abatheligha Yesu Kristo ng’oyukasa omwa mubiri. Oyu y’omuthebya kandi muhakanisya wa Kristo.

8 Muyitheghaye, nuku simuheraye emyatsi eyo thwabirikolha kutsibu erihulhukya, aliwe nuku mwangabana olhuhembo lhunene. 9 Obuli mundu oyukalhaba okwa lhubibi kandi akathendi sighalha omw’ikangirirya lya Kristo syawithe Nyamuhanga. Oyukasighalha omw’ikangirirya eri y’oyuwithe Thatha na Mughalha. 10 Owosi-wosi amasa okw’inywe kandi akathendi letha erikangirirya eri, isimwamwangirira omwa manyumba wenyu kutse nibya erimuramukya. 11 Kundi oyukamuramukaya akasangira omwa mikolere yiwe mibi.

12 Nomwakine indi ngawithe bingyi eby’eribahandikira, singanzire erikolha ekyo okwa lhupapura n’omwa bwino, aliwe ngawithe amaha w’eriasa eyo muli nanakania nenyu busu okwa busu, nuku obutseme bwenyu bwangabya bunene.

13 Abaana ba mwali wenyu, omusombolhwa, bamakuramukya.