Ebaruha y’Erimbere oku Timoteo
3 Ebinywe bino ni by’eriyikethera: Omulhume amasimbirira eribya mulebererya, iniamayisunza omubiiri owuwene. 2 Busana n’ekyo, omulebererya syatholere akabyako kahinira, atholere iniabya n’omukali mughuma, ow’emibere eyuwene, ow’obulengekania bw’amenge,* oyuyithondekenie, oyukakokaya, oyuwasi ndeke erikangirirya, 3 oyuthe muthamiri, oyuthe mulhwi,* aliwe ow’obuyitheghererya, oyutheneghena, oyuthanzire esyosente, 4 omulhume oyukasondolha* eka yiwe omwa nzira eyuwene, oyuwithe abaana abowa abathe thwalha emyatsi mwa lhutseghe-tseghe 5 (kundi omulhume wosi-wosi amabya isyasi ngoku angasondolha* eka yiwe, angatsomana athi ekithunga kya Nyamuhanga?), 6 isi mwikirirya muhyaka, habw’erisagha indi iniangan’usulha mw’emiyiheko n’eritswerwa ngoku Diabolo abiritswerwa. 7 Kandi atholere eribya iniakakanibawako ndeke* n’ab’eyihya nuku syahemuke* n’eriwa omwa kithegho kya Diabolo.
8 Abaghombe abawathikya nabo sibatholere bakathwalha emyatsi mwa lhutseghe-tseghe, isibabya b’othulimi thubiri,* isibabya abakanywa obwabu bunene, isibabya ab’omururu w’eribana amaghoba omwa nzira eyithatholere, 9 babye abakamakirira embitha eyibuyirire y’erikirirya omwa bunyamuthima-thima obuhenirye.
10 Kandi, muleke aba batsuke erilengesibwa nga banatholere; neryo bakole ng’abaghombe, kundi ibakendibya isibaliko mwatsi.
11 N’abakali nabu babye abathe thwalha emyatsi mwa lhutseghe-tseghe, isibabya abakatsandaya okwa bandi kw’erina, babye ab’emibere eyuwene, abathaleghulha omo myatsi yosi.
12 Abaghombe abawathikya batholere ibabya n’omukali mughuma-mughuma, abakasondolha ndeke abaana babu n’amaka wabu. 13 Kundi abalhume abakasondolha ndeke bakayikolera erina libuya n’eribya n’obwiranda bunene bw’erikania omw’ikirirya eriri omu Kristo Yesu.
14 Ngakuhandikira emyatsi eyi, nomwakine indi nganawithe amaha w’eriasa eya wuli obuthuku obuthe bwahali, 15 nuku namasibayo, iwabya iwunasi nga wangabya n’emibere eyiri yithi omwa nyumba ya Nyamuhanga, nayo ni kithunga kya Nyamuhanga oyuliho, enduhi kandi ekikasighika ekwenene. 16 Omo kwenene, embitha yibuyirire y’eryubaha Nyamuhanga eyi ngaligha ni nyikulhu, yithi: ‘Mwaminyikalibwa omwa mubiri, mwaghanzwa mwa muthunganene omwa mulimu, mwabuthukira okwa bamalaika, mwathulhughanibwa okwa banya bihanda, ekihugho mukyamw’ikirirya, mw’angirirwa endatha omwa lhukengerwa.’