Ebaruha Okwa Baebrania
12 Neryo kundi thuwithe ekithu kinene ky’abema ng’eki ekithuthimbireko, thughuse obuli musiko n’ekibi ekikathuyighobanayamo bweghu-bweghu, kandi thuthibithe amathangwa awali embere syethu omw’iyiyinia, 2 ithunathungerere Omwimaniri Mukulhu kandi Omuhikania w’erikirirya lyethu, Yesu. Busana n’obutseme obwabya embere siwe mwayiyinirya omuthi w’obwaghali,* mwagheghena ekihemu, kandi abir’ikalha okwa byalha by’amali eby’ekithumbi ky’obwami kya Nyamuhanga. 3 Omo kwenene, mughaniraye ndeke ok’oyuwabiriyiyinirya eritsumwa ng’eryo erikalhua okwa bakolha-nabi abakayitswera omo bitsumi byabo ebyo, nuku simulhuhirire mukabikyako.*
4 Omw’irwanisya ekibi ekyo, simuli mwathalhwa erihika okwa kiika ky’omusasi wenyu eryuthika. 5 Kandi mwabiribiririrwa ighuma erihabulha erikabahulhamo baghalha lithi: “Mughalha waghe, isiwagheghena erikunga erikalhua oku Yehova, kutse siwubikyeko omughulhu akakuhengulha; 6 kundi Yehova akakunga abo anzire, kandi akaswiraya* obuli mundu oyo ak’angirira nga mughalha.”
7 Mukayithagha eriyiyinia kundi ni kitsweka ky’okw’ikungwa* lyenyu. Nyamuhanga akabathwalha ng’abaghalha. Kundi ni mughalha wahi oyo thatha wiwe athe angakunga? 8 Aliwe inywe bosi mwamabya isimuli mwathakungwa muthya, omo kwenene, imuli basa-na-nyinya, butsira baghalha. 9 Eryongera okw’ekyo, abathatha wethu b’ekinyamubiri ibakathukunga, kandi ithukabasikaya. Mbwino sithwanga ghondera Thatha w’engebe yethu ey’obunyakirimu kwilhaba aho nuku thubyeho? 10 Kundi mubathukunga ahabw’akathuku kake erikwamana n’ebyo ibo babya bakalhangira mwa bibuya, aliwe iyo akakolha ekyo nuku thughasirawe, thwanga sangira omwa bubuyirire bwiwe. 11 Ni kwenene, sihali erikunga erikaletha obutseme okwa ndambi eyo, aliwe likaletha obulhumi;* nomwabine, enyuma waho likahethaya ekighuma ky’obuholho eky’erithunganene okw’abo abakathendekawa mulyo.
12 Busana n’ekyo, mughumaye ebyalha ebihwere amani n’amarwe awaleghetsene, 13 kandi mulhole embere eriterekererya esyonzira busana n’ebisandu byenyu, nuku ekilehemire sikibutukare, aliwe omwakanya k’ekyo, kilhamibawe. 14 Mukwamirire obuholho okwa bandu abosi n’obubuyirire kundi butheho sihali mundu oyukendi syalhangira Omukama. 15 Muyitheghaye ndeke nuku sihabye mundu oyukalemawa eribana olhukogho lhwa Nyamuhanga, nuku omulihi w’obutwa syakununuke akalethaho ebitsibu kandi akatsandya abangyi; 16 kandi muyitheghaye nuku omw’inywe simubye oyukakolha eby’obutswatswa* kutse owosi-wosi oyuthesima emyatsi eyibuyirire, nga Esau, oyuwahingisaya obukulhu bwiwe bw’eribya kambere omwa kihulho ky’ebyalya. 17 Kundi munasi ngoku enyuma waho omughulhu anza erisighalya omughisa, mwaghanwa; kundi nomwanalengaho kutsibu erihindulha amalengekania* omw’ithoghongya emisoni, mukithathokekana.*
18 Simuli mwathahika okwa kindu ekikathulhawako kandi ekyabiryakibwa kw’omuliro, n’ekithu ekikinirene n’omwirima munene n’ekihunga kinene, 19 n’omulenge munene w’engubi n’omulenge ow’akabugha ebinywe, abandu babere babyowa, mubayilemba-lemba bathi baleke erithasyabwirwa ekindi kindu. 20 Kundi babya isibanga ghumira ekihano kino: “Nibya n’ekisoro kyamathulha okwa kithwe, ikitholere ikyaswiribwa omwa mabwe.” 21 N’ebyalhangirika mubyitha obuba indi Musa mwabugha athi: “Nabirikwa engitsi kandi ngathithimana.” 22 Aliwe mwabirihika okwa Kithwe Sioni, etawuni ya Nyamuhanga oyuliho, e Yerusalemu y’elhubulha, n’engulele* y’abamalaika 23 abahindene haghuma, n’ab’ekithunga ky’akambere abahandikisibawa elhubulha, na Nyamuhanga Omutsweri w’abosi, n’esyongebe sy’obunyakirimu esy’abathunganene ababirihikanibwa, 24 na Yesu omusangania w’endaghane nyihya-nyihya, n’omusasi owatsatsangawa, owakakanaya ndeke kwilhaba omusasi wa Abeli.
25 Mulhangire muthi simuli ghana* erihulikirira oyukabugha. Kundi abaghana erihulikirira oyukaha erikunga lya Nyamuhanga okwa kihugho bamabya imubathabalha, mbwino ithwanabalha thwamayisununulha oko yukabughira elhubulha! 26 Okwa buthuku obo omulenge wiwe mwasuka-sukania ekihugho, aliwe lino abirilhaghanisya athi: “Ngathasyaya suka-sukanaya butsira ekihugho kisa aliwe n’olhubulha.” 27 Ekinywe “ngathasya” kikakanganaya erilhusibwaho ly’ebindu ebikasuka-sukanibawa, ebindu ebyabirikolhwa, nuku ebindu ebithesuka-sukanibawa byanga sighalhaho. 28 Busana n’ekyo, kundi thuli b’erihebwa Obwami obuthe bwangasuka-sukanibwa, thulhole embere eribana olhukogho, olhukaleka ithwalighirwa erikolera Nyamuhanga y’omubiiri owabuyirire omw’imubaha n’omw’imusikya. 29 Kundi Nyamuhanga wethu ni muliro owakathoghothaya.