Ebaruha ya Yakobo
1 Yakobo, omughombe wa Nyamuhanga kandi ow’Omukama Yesu Kristo, okwa bihanda 12 ebiyitsatsangire:
Namabaramukya!
2 Balikyethu, mutseme kutsibu omughulhu mukabana ebitsibu muthina-muthina, 3 imunasi ngoku mukabya mukakolha muthya erikirirya lyenyu eryabirilengesibwa likaletha eriyiyinia. 4 Aliwe muleke eriyiyinia libughirire omubiiri walyo, nuku mwangahikana n’erilhughirirana omo myatsi yosi, isimuli bulha kindu.
5 Neryo owosi-wosi okw’inywe amabya iniakabulha amenge, alhole embere erisaba Nyamuhanga, kundi akaha abosi ahathe eriyikukumirira kandi isyathabatsweba,* neryo akendi hebwagho. 6 Aliwe alhole embere erisaba omw’ikirirya, isyalithika-thika nahake, kundi oyukathika-thika ali ng’ebisunda by’engetse ebikahekawa n’omuyagha n’erithwalhwa eyi n’eyi. 7 Omo kwenene, omundu oyo isyalengekanaya athi Yehova* akendi muha kindu kyosi-kyosi, 8 ni mundu oyuli kange-kange, oyukatsinga-tsinga omwa syonzira siwe syosi.
9 Aliwe mulikyethu oyuthawitheki atseme* busana n’erihamibwa liwe, 10 n’omugaga busana n’erihemulikanibwa liwe, kundi ng’ebimole by’omoli akendi syahwaho. 11 Kundi ngoku eryuba likanahulhuka n’ekihuhania kyalyo kinene, eryumya ekirimwa, n’ebimole byakyo ibyathoghonga n’obubuya bwakyo bw’eyihya ibwahwa, n’omugaga kw’anemwendi syahwaho athya inianemusondekania eby’obugaga.
12 Obutseme buli n’omundu oyukalholha embere eriyiyinirya ebitsibu, kundi akendi syabya abiriliwa akendi syahebwa embiitha y’engebe, eyo Yehova* alhaghanisaya abakalholha embere erimwanza. 13 Omughulhu omundu ali omwa bitsibu, isyabugha athi: “Nyamuhanga akanyilengako.” Kundi Nyamuhanga syangalengwako omwa bindu bibi, kandi iyo iyuwene-wene syalilenga okwa mundu wosi-wosi. 14 Aliwe obuli mughuma akalengawako omw’ikurwa n’eryohibwa* omwa syongumbu siwe. 15 Neryo esyongumbu sikabya syabiriheka obukule, sikabutha ekibi; n’ekibi kikabya kyabikolhwa, kikaletha olhuholho.
16 Balikyethu banzwa, simuthebibawe. 17 Obuli kihembo kibuya kandi ekihikene kikalhua endatha, eryandaghalha erilhua oku Thatha ow’ekyakakalha ky’omwa kyanya, oyuthebinduka ng’ebitsutsu ebikahuma-huma. 18 Lyabya isonda liwe iyo erithubutha erilhabira omwa kinywe ky’ekwenene, nuku thwangabya mulingo w’ebighuma by’erimbere-mbere by’ebihangikwa biwe.
19 Balikyethu banzwa, muminye kino: Obuli mundu atholere iniabya akowa lhuba, isyabugha lhuba, isyahithana lhuba, 20 kundi erihithana ly’omundu siririletha erithunganene lya Nyamuhanga. 21 Busana n’ekyo, muyilhusayeko oburofu obwosi n’akaminyikalho kosi-kosi k’obubi,* kandi omwa bwolho mulighe erihandwamo ekinywe ekikathoka eribalhamya.
22 Aliwe, mubye bakoli b’ekinywe butsira bahulikiriri buyira, eriyitheba inywibene-bene omw’ighanirya ly’amabehi. 23 Kundi owosi-wosi amabya muhulikiriri w’ekinywe aliwe isyali kikolha, oyu ali ng’omundu oyukasamalira obusu* bwiwe omwa kiyo. 24 Kundi akayisamalira, neryo iniayighendera neryo aho naho in’ibirirwa nga ni mundu oyusosire athi. 25 Aliwe oyukalebaya ndeke omwa mighambo eyihikene eyikaletha obwiranda neryo akalholha embere muyo abiribya, butsira muhulikiriri oyuk’ibirirawa, aliwe mukoli w’omubiiri; kandi akendibya n’obutseme omwa by’akakolha.
26 Omundu wosi-wosi amalengekania athi ni muramya wa Nyamuhanga* aliwe isyalikakiraya olhulimi lhwiwe, iniakayitheba omwa muthima wiwe, n’eriramya liwe ini buyira. 27 Omulingo w’eriramya* owahenirye kandi owathatsandibirwe erikwamana n’amalengekania wa Nyamuhanga wethu kandi Thatha, w’ono: eritsomana esyongubi n’abakwakali omwa malighe wabo, n’erithendibyako kahinira k’ekihugho.