Ebaruha Yakabiri eya Petero

2 Aliwe, abaminyereri b’amabehi nabo mubabuthuka omwa kathi-kathi k’abandu, ngoku hanemwendi syabya n’abakangirirya b’amabehi omwa kathi-kathi kenyu. Bubiso-biso, aba bakendi syalethaho omubere w’akabi ow’erighabana omwa nyikirirya, kandi nibya bakendi syayighana mwinyebo oyuwabaghulha, eriyilethera erithoghothibwa erya lhuba-lhuba. 2 Eryongera okw’ekyo, abangyi bakendi syakwama emibere yabo y’obukamya meso,* kandi busana nabo, enzira y’okwenene yikendi syakanibwako nabi. 3 Kandi omwa mururu bakendi syabanyegha omwa binywe by’amabehi. Aliwe eritswerwa lyabo, eryahirawaho kera, siririghenda lyolho-lyolho, n’erithoghothibwa lyabo sirighotsere.

4 Ahathe erithika-thika Nyamuhanga mwathaghana erisuyira abamalaika abahalhaya, aliwe mwabaghusa omwa Tartaro,* eribahira omwa bigyeghere* by’omwirima munene eribabika busana n’eritswerwa. 5 Kandi mwathaghana erisuyira ekihugho kya kera, aliwe mwatheya Noa omuthuli w’erithunganene, haghuma n’abandi musanju omughulhu aletha eribogha ly’amaghetse okw’abandu abathekenga Nyamuhanga. 6 Kandi mwahwerekererya etawuni ye Sodomu ne Gomora yamabya ribu, mwabatswera, erihiriraho abandu abathekenga Nyamuhanga eky’erileberyako ky’ebikendi syasa. 7 Kandi mwalhamya omuthunganene Loti, oyuwabya iniabiriaghalhwa omo muthima busana n’emibere y’obukamya meso* ey’esyongoli sy’ebibi— 8 kundi obuli kiro omulhume muthunganene oyo iniakaghalhawa busana n’obubi obo alhangira n’eriowa inian’ikere omwa kathi-kathi kabo. 9 Neryo kwesi, Yehova* anasi ngoku angalhamya abandu abakamubaha eribalhusya omw’ilengwako, aliwe akalindaya abathathunganene erisyathoghothibwa* okwa kiro ky’eritswera, 10 kutsibu-tsibu abanzire eritsandya emibiri y’abandi n’abakaghaya ab’obuthoki.*

Omwa buthubaha n’omwa lighundu sibesagha erikania nabi okwa b’olhukengerwa, 11 aliwe abamalaika, nomubanawithe akaghalha kanene n’obuthoki, sibali bahandikirira omwa binywe by’ebitsumi, busana n’erisikya Yehova.* 12 Aliwe abandu aba, ng’ebisoro ebithawithe menge ebikakolha erikwamana n’obuhangiranwa kandi ebikabuthawa ini by’erihambwa n’erithoghothibwa, bakakanaya nabi okwa myatsi eyo bathasi. Bakendi syaghalhwa omw’ithoghothibwa erikasa busana n’enzira yabo nyibi eyikathoghothaya, 13 eriaghalhwa ng’ekihembo kyabo busana n’enzira yabo nyibi.

Bakalhangira ini kibuya erilhabirirania omwa by’eriyitsemesya, nibya n’omw’ithungyi. Ibo ni burofu kandi bulema abakayihweraya omwa syongangirirya syabo sy’amabehi ibane okw’irya inene haghuma nenyu. 14 Ameso wabo oswire mw’oburaghane kandi sibanga thoka erileka ekibi, kandi bakohaya abath’imene ndeke. Bawithe omuthima owathendekirwe omwa mururu. Ni baana bathakirwa. 15 Omw’isighania enzira eyiterekerere, babirithebibwa. Babirikwama enzira ya Balama mughalha wa Beori, oyuwanza olhuhembo lhw’erikolha ebibi, 16 aliwe mwakungwa busana n’erithwa ekihano ekihikire. Ekisoro ekithebugha ekikaheka emisiko mukyabugha omwa mulenge w’omundu erikakirya erithwamu ly’erisire ly’omuminyereri.

17 Aba ni syongununuko esithemo maghetse kandi ni lhuhohe olhukahekawa omwa lihunga erikalire, n’omwirima wanyahinda abiribikwa busana nabo. 18 Bakakolesaya ebinywe ebikalha-kalire ebithawithe na mughaso. Omw’itsemesya esyongumbu sy’omubiri n’omw’ikolha eby’obukamya meso,* bak’ohaya abandu ababiribalha okwa bakakolha ebithuwene. 19 Bakabalhaghanisaya obwiranda, nabo ibobene-bene ini bakobe b’erihonda; kundi omundu amasondolhwa n’owundi, akabya mukobe wiwe. 20 Omo kwenene, bamabiribalha okwa bikatsandaya eby’ekihugho erilhabira omw’iminya erihikire ery’Omukama kandi Omulhamya Yesu Kristo, aliwe kandi ibathasyayingirya omwa bindu ibyan’ebyo neryo ibyabakinda, emibere yabo ey’erighunzerera yikabya mibi kutsibu kwilhaba ey’erimbere. 21 Kyangabere kibuya ibo erithendi minya enzira eyihikire ey’erithunganene kwilhaba eriminyayo kandi ibasighania ekihano ekibuyirire ekyo bahebawa. 22 Ekya omusyo w’okwenene akabugha kyabiribabyako, kino: “Embwa yabirisubira ebisalhu byayo, n’embunu eyabirinabibwa yikayighalha-ghalhaya omwa byondo.”