Ebaruha Okwa Banya Efeso
1 Paulo, omukwenda wa Kristo Yesu omw’isonda lya Nyamuhanga, okwa babuyirire abali e Efeso kandi abathaleghulha omw’imathikana na Kristo Yesu:
2 Ambi olhukogho n’obuholho erilhua oku Nyamuhanga Thatha wethu n’Omukama Yesu Kristo ibyabya nenyu.
3 Nyamuhanga kandi Thatha w’Omukama wethu Yesu Kristo apipawe, kundi abirithutsumulha omw’ithuha obuli mughisa w’obunyakirimu omwa myanya y’elhubulha omw’imathikana na Kristo, 4 ngoku athusombolha erimathikana nayu* ekihugho kithe kyatsuka, nuku thubye babuyirire kandi abatheko kahinira embere siwe omo lhwanzo. 5 Kundi mwasangwa athuyisogha erithuyiramo baghalha biwe erilhabira omu Yesu Kristo, erikwamana n’ebikamutsemesya n’erisonda liwe, 6 athoke eripipwa busana n’olhukogho lhwiwe lhw’olhukengerwa olho athuha omwa lhukeri erilhabira omo mwanzwa wiwe. 7 Omw’iyo thwabiriboholhwa erilhabira omwa ndongolya omwa musasi w’oyo, ee, erighanyirwa ebibi byethu, erikwamana n’olhukogho lhwiwe lhunene.
8 Abirileka olhukogho olhu ilhwakanyirira okw’ithwe omwa menge wosi n’omw’ikenga lyosi 9 omw’ithuminyisya embitha eyibuyirire ey’erisonda liwe. Eki ni kwamana n’ekikamutsemesaya ekyo iyuwene-wene abya iniabirithegheka 10 erihiraho obuthegheki okw’ihwererera ly’emighulhu eyahirawaho, erihindania emyatsi yosi yo haghuma omu Kristo, emyatsi y’elhubulha n’emyatsi y’okwa kihugho. Ee, omw’iyo 11 oyo thumathikene nayu n’eriyirwa mwa bawetwa,* eribya ithwabirisangwa thwayisowa erikwamana n’ekighendererwa eky’oyukaberereraya emyatsi yosi ngoku akathwamu erikwamana n’erisonda liwe, 12 nuku ithwe thwatsuka eribya n’amaha omo Kristo thukole busana n’erimuha olhukengerwa. 13 Aliwe nenyu mumwabya n’amaha omw’iyo enyuma w’eriowa ekinywe ky’ekwenene, engulhu yuwene eyihambire okwa mulhamu wenyu. Mwabere mwabirikirirya, mumwahirwako akaminyikalho erilhabira omw’iyo omwa mulimu abuyirire owalhaghanisibawa, 14 nagho iw’omutsimbo owasangwa* ahebwayo busana n’omwandu wethu, busana n’ekighendererwa ky’eriboholha ebindu bya Nyamuhanga omwa ndongolya, nuku apipawe n’erihebwa olhukengerwa.
15 Naghe ky’ekikaleka, eribya inabiriowa okw’ikirirya erya muwithe omo Mukama Yesu n’olhwanzo olhwa mukakanganaya ababuyirire abosi, 16 ingathaleka eriha ewasingya busana nenyu. Ngalholha embere eribahulha omwa misabe yaghe, 17 nuku Nyamuhanga w’Omukama wethu Yesu Kristo, Thatha w’olhukengerwa, angabaha omulimu w’amenge n’ow’eribisulirwa omw’iminya erihikire erimuhambireko. 18 Abirikyungulha ameso w’emithima yenyu, nuku mwangaminya nga ni maha wahi agho ababirikirira, emighisa y’olhukengerwa eyo awithire ababuyirire ng’omwandu, 19 kandi ngoku abirithukangania ithwe bikirirya amaaka wiwe okwa lhulengo olhulengethukire. Eki ni kwamana n’emikolere y’obuthoki bw’akaghalha kiwe, 20 obo akanganaya oku Kristo omughulhu amulhubukaya okwa baholi n’erimw’ikalya okwa byalha biwe by’amali omwa myanya y’elhubulha, 21 eyiri endatha kutsibu okwa buli buthabali n’ehamuli n’obuthoki n’obukama n’okwa buli lina erikalhukawa, butsira omwa mulembe ono musa aliwe n’omw’owakasa. 22 Kandi mwahira emyatsi yosi ahisi sy’ebisandu biwe n’erimuyiramo muthwe w’emyatsi yosi eyihambire okwa kithunga, 23 nakyo iw’omubiri wiwe, erilhughirirana liwe, oyuk’usulha omo byosi omo myatsi yosi.