Emibiiri y’Abakwenda
19 Emyatsi yabere yinemulholha embere, Apolo iniane e Korinto, Paulo mwathimba omwa myanya eyiri haali okwa ngetse kandi mwandaghalira e Efeso. Eyo mweyayo abandi bigha 2 neryo mwababulya athi: “Mumwanahebwa omulimu abuyirire omughulhu mw’ikiriraya?” Mubamusubirya bathi: “Sithuli thwathowa ngoku hane omulimu abuyirire.” 3 Neryo mwababulya athi: “Neryo kwesi, mwabatizibawa omuki?” Mubamusubirya bathi: “Omwa lhubatizo lhwa Yohana.” 4 Paulo mwabugha athi: “Yohana mwabatizya omwa lhubatizo lhw’ekiminyikalho ky’eriyisubamo, akabwira abandu athi b’ikiriraye omwa oyukasa enyuma siwe, ni bugha ambu, omu Yesu.” 5 Babere b’owa eki, mubabatizibwa omwa lina ly’Omukama Yesu. 6 Neryo Paulo abere abahirako ebyalha, omulimu abuyirire mwabahikako, kandi mubatsuka eribugha omwa mibughe y’ehandi n’eriminyerera. 7 Habya abalhume nga 12.
8 Mwaghunza amezi asathu inianemukanirya omwa sinagogi buthubaha, akaha emikania n’eribasona-sona omw’ighanirya nabo okwa bihambire oko Bwami bwa Nyamuhanga. 9 Aliwe abandi babere bakalya emithima omw’ighana erikirirya, erikania nabi okwa Enzira embere sy’abandu, mwabasigha kandi amaghabulha abigha omw’ibo, obuli kiro iniakaha emikania omwa kisenge kinene ky’esukuru e Tirano. 10 Eki mukyalholha embere habw’emyaka ibiri, kyamaleka abosi omwa provisi ye Asia, Abayuda n’Abagiriki ibowa ekinywe ky’Omukama.
11 Kandi Nyamuhanga mwalholha embere erikolha eby’amaaka ebikaswekaya erilhabira omwa byalha bya Paulo, 12 n’abandu mubahika okwa kiika ky’erithwalira abalhwere b’esyongyimba n’esyo aproni esiryathulha okwa mubiri wiwe, n’amalhwere wabo iniakalhama, n’emirimu mibi iyabalhuako. 13 Aliwe abandi Bayuda ababya bakaghenda ibanemuhighitha esyombinga nabo mubalengesya erikolesya erina ly’Omukama Yesu okwa baliko emirimu mibi; ibakabugha bathi: “Omo lina lya Yesu oyo Paulo akathulhughanaya, ngakubwira nyithi mulhueko.” 14 Neryo habya abaghalha musanju ab’omuhereri mukulhu Omuyuda ya Sikewa ababya bakakolha eki. 15 Aliwe ekirimu kibi mukyabasubirya kithi: “Nganasi Yesu kandi nganasi Paulo; aliwe inywe muli bahi?” 16 Neryo omulhume oyuliko ekirimu kibi mwabimukirako, amabalengya amaaka n’amani, neryo mubahulhuka omwa nyumba bamathibitha ibane ndumbu kandi ibabirihuthangalha. 17 Abayuda n’Abagiriki ababya b’ikere e Efeso abosi mubaminya omwatsi oyu; kandi abosi mububaha kutsibu, n’erina ly’Omukama Yesu mulyalholha embere erihamibwa. 18 N’abangyi b’okwa babya ibabirikirirya ibakasa n’erithulha ahathe eribisirira amalholho wabo n’ebya babirikolha. 19 Omo kwenene, abangyi b’okwa babya bakakolha eby’obukumu mubaletha ebitabu byabo bya haghuma, bamabihisirya embere sy’obuli mundu. Neryo mubabaririra obughuli bwabyo, byamabya ini binusu 50,000 eby’efeza. 20 Neryo omwa nzira y’amaaka, ekinywe kya Yehova mukyalholha embere erikanyirira n’erilhandaghana.
21 Emyatsi eyi yabere yabiribya, Paulo mwathwamu omwa muthima wiwe athi akendibya abirilhaba e Makedonia ne Akaya, angaghendire e Yerusalemu. Mwabugha athi: “Ngendibya nabiriyayo, ngatholere ingaghenda ne Roma.” 22 Neryo mwathuma e Makedonia y’ababiri b’okwa babya bakamuwathikya, Timoteo na Erasto, aliwe iyo mwasighalha omwa provisi ye Asia habw’obuthuku bulebe.
23 Okwa buthuku obo, muhabuthuka erikakalhukana linene erihambire okwa Enzira. 24 Kundi omulhume oyukahulhawamo Demetrio, omuhesi oyuwabya akakolha emyaliro y’efeza ya Artemi, aby’akaleka abahesi ibabana amaghoba. 25 Mwabahindania haghuma n’abandi ababya bakakolha ebindu ng’ebyo amabugha athi: “Balhume, munasi ndeke ngoku esuburu eno yikathw’ingiriraya esyosente nene. 26 Kandi mwabiriyilhangirira n’eriowa ngoku si mw’omwa Efeso musa, aliwe ngoku hakuhi omwa provisi yosi ye Asia, Paulo oyu abirisona-sona abandu bangyi n’eribahindulha omw’ibahiramo awandi malengekania, athi esyonyamuhanga esikahesawa omo byalha by’abandu si syonyamuhanga sy’okwenene. 27 Kandi ekitsibu kiri kithi, esuburu yethu eno siyendi thasyasikibwa, n’ehekalhu ya nyamuhanga mukulhu w’obukali Artemi yikendi lhangirwa mwa buyira, kandi Artemi oyukaramibawa omwa provisi ye Asia n’omwa kihugho kyosi akendi lhusibwa kw’obukulhu bwiwe.” 28 Abalhume abo babere babiriowa eki, mubahithana kutsibu n’eritsuka eribirikira bathi: “Artemi w’abanya Efeso ni mukulhu!”
29 Neryo etawuni muyusulha mw’akasasamaro, n’abosi haghuma mubathibitha omwa nyumba y’erisathiramo emisathu, bamakuriramo Gayo na Aristariko, abanya Makedonia, ababya bakaghenda na Paulo. 30 Paulo iyo abya iniananzire eryingiramo eriya eyiri abandu, aliwe abigha mubathamulighira. 31 Nibya n’abaghuma b’okwa babya bakatheghekania emikonga n’emisathu ababya banywani ba Paulo mubamulhaghirako, erimulemba-lemba bathi isyalengesaya eryingira omwa nyumba y’erisathiramo emisathu. 32 Abandi ibakabugha eki n’abandi ibabugha kirya; kundi abandu mubabulha ekiriho n’abangyi b’okw’ibo sibabya basi ekyamaleka ibayisorokerya haghuma. 33 Neryo mubalhusya Alekzanda y’omwa bandu bangyi, Abayuda ibanemumusukumira embere, na Alekzanda mwakolha akaminyikalho omwa byalha biwe akanza eriyilhwirako embere sy’abandu. 34 Aliwe babere baminya ngoku ni Muyuda, abosi mubatsuka eribirikirira haghumerere habw’esyosaha ng’ibiri bathi: “Artemi w’abanya Efeso ni mukulhu!”
35 Neryo erighunzerera omuhandiki w’etawuni abere abirihunia abandu, mwabugha athi: “Bandu be Efeso, kwenene omwa bandu abosi nindi oyuthasi ngoku etawuni y’abanya Efeso y’eyikatheghaya ehekalhu ya Artemi mukulhu n’esanamu eyathogha elhubulha? 36 Neryo kundi emyatsi eyi sihali oyuwangaghaniayo, mutholere imwathekana kandi isimwaharabana. 37 Kundi mwabiriletha abalhume aba bo hano abathe banyeyi b’esyohekalhu kutse batsumi b’enyamuhanga yethu y’obukali. 38 Neryo Demetrio n’abahesi abali nayu bamabya ibawithe olhubanza oko mundu mulebe, hane ebiro ebyo ekoti yikikaliramo kandi hane n’abathabali; muleke balethe emisango eyabawitheneko. 39 Aliwe mwamabya imukasondaya ekyosi-kyosi ekilhabire okw’aho, erithwamu litholere iryakolhwa n’abandu bosi. 40 Kundi kwenene thuli omwa kabi k’erihirwako olhubanza lhw’obuyisamambuli busana n’ebyamabya munabwire, kundi sihali esyonzumwa esyo thwangaha ng’esyamaleka ihabya akatabanguko aka.” 41 Neryo abere abiribugha ebi, mwabugha athi abandu baghende.