Emibiiri y’Abakwenda

20 Neryo ebyughungu byabere byabirihwa, Paulo mwathumira okwa bigha athi base, neryo abere abiribahimba n’eribalhagha, mwatsuka olhughendo lhwiwe lhw’eriya e Makedonia. 2 Abere abirithimba omwa bitsweka ebyo n’erihimba abaliyo omwa binywe bingyi, mwahika e Gurisi. 3 Mwaghunzayo amezi asathu, aliwe kundi Abayuda babya ibabiriya embitha y’erimwitha, omughulhu abya iniakayasokera e Suria, mwathwamu erisubayo erilhaba e Makedonia. 4 Abya iniane na Sopateri mughalha wa Piru owe Beroya, Aristariko na Sekundo abe Tesalonika, Gayo owe Derbe, Timoteo, na Tikiko na Trofimo ab’omwa provisi ye Asia. 5 Abalhume aba mubabya embere syethu kandi babya ibanathulindire e Troa; 6 aliwe muthwalhua e Filipi omo bwathu ebiro by’Omuggati Owathemo Kihamya ibyamabirilhaba, neryo omwa biro bithano muthwabahikako e Troa, neryo thwamaghunzayo biro musanju.

7 Okwa kiro ky’erimbere eky’ewiki, ithunahindene haghuma thukalya, Paulo mwatsuka eribakanirya, kundi abya iniakayaghenda engyakya; neryo mwabakanirya omukania muuli erihika omwa kathi k’ekiro. 8 Ekisenge ky’eyighulhu ekyathwabya thuhindenemo mwabya esyotara nyike. 9 Omulhwana oyukahulhawamo Eutiko abya inian’ikere omwa lidirisa, mwahwera omwa thulho thunene Paulo inianemulholha embere erikania, neryo mwayitsingako, amathogha erilhua eyighulhu okwa kayina yakasathu, bamamusongya iniabiriholha. 10 Aliwe Paulo mwandaghalira eyikwa, amamuwako n’erimukumbathira, n’eribugha athi: “Muthekane, aneho.” 11 Neryo mwahethukira endatha amimya ebyalya,* amalya. Mwalholha embere n’omukania ahabw’akathuku, obuthuku erikya, neryo amaghenda. 12 Neryo mubathwalha omulhwana iniabirisuba kandi mubahumulikanibwa kutsibu.

13 Neryo muthwaghenda eyiri obwathu thwamasokera e Asosi, eyo thwabya thwanzire eriyenda Paulo y’omo bwathu, kundi abere abiriha obusondoli okw’eki, iyo aby’anzire erighendayo omo bisandu. 14 Neryo abere athweya e Asosi, muthwaghenda nayu omo bwathu thwamaya e Mitilene. 15 Kandi thwabere thwalhua eyo omo bwathu ekiro ekyakwamako, muthwahika e Kio, aliwe okwa kiro kyakabiri, muthwahika e Samosi, n’okwa kiro kyakasathu muthwahika e Mileto. 16 Paulo abya iniabirithwamu erithendi lhaba e Efeso nuku syaghunze omwa provisi ye Asia mwa buthuku bwosi-bwosi kundi aby’akanguha nuku kyamathokekana ahike Yerusalemu okwa kiro ky’Omukonga we Pentekote.

17 Aliwe iniane e Mileto mwathuma omwatsi e Efeso kandi amabirikira abasyakulhu b’ekithunga. 18 Babere bamuhikako, mwababwira athi: “Munasi ndeke emibere eyo nabya nayu ingane nenyu eritsuka okwa kiro ky’erimbere ingahika omwa provisi ye Asia, 19 inganemukolera Omukama omw’iyikehya lyosi n’omwa misoni n’omwa bitsibu ebyanyihikako busana n’esyombitha sy’Abayuda, 20 nomwabine mundaleka eribabwira okwa myatsi yosi-yosi ey’omughaso kutse eribakangirirya embere sy’abandu na nyumba okwa nyumba. 21 Aliwe munaha ndeke obwema okwa Bayuda n’Abagiriki obuhambire okw’iyisubamo embere sya Nyamuhanga n’erikirirya omu Mukama wethu Yesu. 22 Neryo lino lebaya! inganoswire* n’omulimu, ngaghenda e Yerusalemu, nomwakine indi singasi ebikendi nyibyako eyo, 23 aliwe omwa buli tawuni omulimu abuyirire iniakabera erinyiha obwema, athi engomo n’amalighe binanyilindire. 24 Nomwabine sindi ghanza engebe yaghe ng’eyinyiwithire mughaso, ekikulhu nanamathaghunza olhughendo lhwaghe n’omubiiri ogho Omukama Yesu anyiha, eriha ndeke obwema obuhambire okwa ngulhu yuwene y’olhukogho lhwa Nyamuhanga.

25 “Neryo lino lebaya! nganasi ngoku sihali n’omughuma w’okw’inywe oyo nabwira oko Bwami oyukendi syathasyanyilholhako. 26 Neryo indyababirikira munabwire erisyayilhangirira ngoku sindi kw’omusasi w’abandu bosi, 27 kundi sinathaghana eribabwira erihana lyosi* lya Nyamuhanga. 28 Muyitheghaye kandi mutheghaye ekihangulho kyosi, ekyo mulimu abuyirire abiribasombolha eribya balebererya bakyo, erilisya ekithunga kya Nyamuhanga, ekyo aghulha omwa musasi wa Mughalha wiwe. 29 Nganasi ngoku ngendisyabya nabirighenda, ebyuhu ebikalire bikendi syingira omwa kathi-kathi kenyu, kandi sibyendi syabuya-buya ekihangulho, 30 kandi omw’inywe inywibene-bene abandu basyahangana n’eribugha ebihengemire bakanza eriyikurirako abigha.

31 “Busana n’ekyo, mubye imunalholire, kandi mwibuke ngoku ahabw’emyaka isathu, omwa kiro n’omwa musibo mwindaleka erihabulha obuli mughuma w’okw’inywe ingane muthoghongya emisoni. 32 Neryo lino ngabahira omwa byalha bya Nyamuhanga n’omwa kinywe kiwe ky’olhukogho, ekinywe ekyanga bahimba n’eribaha omwandu omwa kathi-kathi k’ababuyirire abosi. 33 Sinathayighomba efeza y’omundu kutse ehoro kutse esyongyimba. 34 Inywe inywibene-bene munasi ngoku ebyalha ebi byabirinyiha ebya ngayithagha n’eby’abo ngali nabo. 35 Omo myatsi yosi nabiribakangania ngoku omw’ikolha kutsibu omwa nzira eyi, mutholere imwawathikya abatsekire kandi mutholere imw’ibuka ebinywe by’Omukama Yesu, omughulhu iyuwene-wene abugha athi: ‘Erihithya likaletha etseme nene kwilhaba erihebwa.’”

36 Neryo abere abiribugha emyatsi eyi, iyo n’abosi mubakukama, amasaba. 37 Neryo abosi mubahutana n’ekiriro kandi mubawa oku Paulo* n’erimulyatsirira omo lhwanzo,* 38 kundi kutsibu-tsibu babya ibabirikwa obulighe bunene busana n’ebinywe ebya Paulo abya iniabiribabwira athi sibendi syathasyamulholhako. Neryo mubamukwamanisya erimuhikya oko bwathu.