Emibiiri y’Abakwenda
28 Thwabere thwabirihika buholho, muthwaminya ngoku ekizinga ekyo kikahulhawamo Melita. 2 N’abandu abakabugha omubughe w’ehandi* mubathukangania olhukeri lhunene kutsibu. Mubakya omuliro kandi bamathwangirira ithwe bosi omwa lhukeri busana n’embulha eyabya iyinemuwa kandi busana n’embeho. 3 Aliwe Paulo abere abirisenya esyongwe n’erisihira okwa muliro, enzoka muyalhuamo busana n’ekihuhania yamayilingira okwa byalha biwe. 4 Abakabugha omubughe w’ehandi babere balhangira ekihangikwa eky’obutwa ikinayilingire okwa byalha biwe, mubatsuka eribwirana bathi: “Kwenene omulhume oyu ni mwithi, kandi nomwakine indi mwakahika buholho erilhua omwa ngetse, ya Bulingirirania* mwathethamulighira eribya inianeho.” 5 Nomwabine, mwakunguthira ekihangikwa ekyo ky’omwa muliro kandi mwathakwaki. 6 Aliwe babya bakalengekania bathi akendi bimba kutse iniakwama kyayiholera. Babere babirilinda habw’obuthuku buuli n’erilhangira ku sihali ekitsibu ekyamamubyako, mubahindulha amalengekania wabu bamatsuka eribugha bathi iyo ni nyamuhanga.
7 Neryo omo mwanya oyo mwabya ebithaka by’omukulhu w’ekizinga, erina liwe ini Publio, mwathwangirira ndeke n’erithukokya habw’ebiro bisathu. 8 Neryo kwesi thatha wa Publio abya inianakesirye omwa ngyingo inianalhwere ekihuhania n’akasinini, neryo Paulo mwaghenda aho ali, amasaba, amamuhirako ebyalha n’erimulhamya. 9 Eki kyabere kyabiribya, n’abandi bandu ab’okwa kizinga ababya balhwere mubatsuka eryasa eyo ali n’erilhamibwa. 10 Kandi mubathusikya omw’ithuha ebihembo bingyi, neryo thwabere thukaghenda omo bwathu, mubathuhekya ebya thwabya thukayithagha.
11 Enyuma w’amezi asathu, muthwaghenda omo bwathu obuhandikireko buthi “Baghalha ba Zeu.” Obwathu obo bwabya ibukalhua e Alusanduria kandi bwabya ibwabirimabirighunza obuthuku bw’eritsuku ibune okwa kizinga. 12 Thwabere thwahika okwa mwalu we Sirakuse, muthwabyayo biro bisathu; 13 muthwalhua eyo thwamahika e Regio. Habere halhaba kiro kighuma ekiyagha ekikasira eyikwa mukyahitha neryo muthwahika e Puteoli okwa kiro kyakabiri. 14 Eyo muthweyayo balikyethu kandi mubathuhathikana bathi thubye nabo habw’ebiro musanju, neryo muthwalholha e Roma. 15 Eyo, balikyethu babere bowa ku thwabirihikayo, mubasa e Kathali ke Apia ne Amanyumba Asathu erisyathulholhako. Paulo abere abalhangira, mwasima Nyamuhanga kandi mwasika. 16 Erighunzerera thwabere thwahika e Roma, Paulo mwalighirwa er’ikalha iyuwene, omusirikali inianamutheghirye.
17 Aliwe enyuma w’ebiro bisathu, mwabirikira abakulhu b’Abayuda. Babere babirihindana haghuma, mwababwira athi: “Balhume, balikyethu, nomwakine indi sinathakolha ekihukene n’eby’abandu kutse n’eby’emirwa y’abathatha-kulhu wethu, munahirwa omwa byalha by’Abaroma ng’omunya-ngomo erilhua e Yerusalemu. 18 Neryo babere babirinyilebya ndeke, mubanza erinyiboholha, kundi sihabya ekyangaleka ing’ithibwa. 19 Aliwe Abayuda babere babirighana, munasaba indi ngathwalhawe ewa Kaisari, aliwe isi bugha indi ngawithe okwa b’ekihanda kyethu kw’olhubanza. 20 Neryo busana n’enzumwa eyi munasabire indi ngabalholeko n’erikania nenyu, kundi ngabohirwe omwa lhugyeghere olhu busana n’amaha we Israeli.” 21 Mubamubwira bathi: “Sithuli thwathabana esyobaruha esikuhambireko esikalhua e Yudea, kutse mulikyethu wosi-wosi oyukalhua eyo oyukasyakuthulhako mwatsi kutse erikubughako ekibi kyosi-kyosi. 22 Aliwe thukalengekanaya kihikire iwe erithubwira amalengekania wawu, kundi kwenene, bikahika okwa kadini aka, thunasi ngoku kakakanibawako nabi ehosi.”
23 Neryo mubathegheka ekiro ky’eribanangana nayu, kandi mubasa banene eyo akakesaya. Neryo eritsuka omwangyakya erihika omw’igholho mwabasoborera emyatsi omw’iha ndeke obwema obuhambire oko Bwami bwa Nyamuhanga kandi omw’ikolesya Emighambo ya Musa n’Abaminyereri mwaleka ib’ikirirya Yesu. 24 Abandi mubatsuka erikirirya emyatsi eyo abugha; abandi mubathikiriryayo. 25 Neryo kundi mubathalighirana, mubatsuka eriyighendera, neryo Paulo mwabugha ebinywe bino:
“Omulimu abuyirire ahikire akabwira abathatha-kulhu benyu erilhabira omo muminyereri Isaya, 26 athi: ‘Mughende eyiri abandu abo n’eribugha muthi: “Kwenene mukendi syowa aliwe simwendi syayitheghererya nahake, kandi kwenene mukendi syasamalira aliwe simwendi syalhangira nahake. 27 Kundi emithima y’abandu aba yabirikalha kandi babiriowa omwa mathwe wabo aliwe ibathayira eky’erikolha, kandi babiriliba ameso wabo, nuku sibalhangire omwa meso wabo n’eriowa omwa mathwe wabo n’eriyitheghererya omwa mithima yabo n’eribinduka, naghe ngabalhamya.”’ 28 Neryo muminye ngoku omulhamu oyo erilhua oko Nyamuhanga abirighendera ab’ebihanda; ahathe erithika-thika bakendi hulikiriragho.” 29 ——
30 Neryo mwabyayo habw’emyaka ibiri omwa nyumba yiwe y’eripangisya, kandi iniak’angirira ndeke abosi ababya bakasyamulebya, 31 akabathulira oko Bwami bwa Nyamuhanga n’eribakangirirya ebihambire oko Mukama Yesu Kristo inianawithe obwiranda bunene obw’erikania,* isihali ekikamukakiraya.