Emibiiri y’Abakwenda
4 Ababiri babere banemukanirya abandu, neryo abahereri, omukulhu w’abatheya b’okwa hekalhu, n’Abasadukayo mubasa eyo bali. 2 Aba mubahithana kundi abakwenda babya bakakangirirya abandu n’erithulhughania ahathe eribisirira erilhubuka lya Yesu okwa baholi. 3 Neryo mubabahamba n’eribathwalha omwa ngomo erihika engyakya, kundi bwabya ibwabirira. 4 Aliwe abangyi b’okw’abahulikirira omukania mub’ikirirya, n’omughanzo w’abalhume mwabya nga 5,000.
5 Ekiro ekyakwamako, abathabali babo, abakulhu, n’abahandiki mubahindana e Yerusalemu, 6 haghuma na Ana omuhereri mukulhu, Kayafa, Yohana, Alekzanda, n’abosi ababya bahughu b’omuhereri mukulhu. 7 Mub’imania Petero na Yohana omwa kathi-kathi kabo n’eritsuka eribabulya bathi: “Mumwakolire eki omwa buthoki bwandi kutse omwa lina lyandi?” 8 Neryo Petero inianoswire n’omulimu abuyirire, mwabugha nabo athi:
“Bathabali b’abandu n’abakulhu, 9 thwamabya ithukabulibawa munabwire okwa kindu kibuya ekihambire okwa mulhume omulema, kandi imwanzire eriminya oyuwalhamaya omulhume oyu nga nindi, 10 inywe bosi n’abandu bosi be Israeli muminye ngoku omwa lina lya Yesu Kristo Omunazareti, oyo mwahanika okwa muthi aliwe oyo Nyamuhanga alhubukaya okwa baholi, erilhabira omw’iyo omulhume oyu ak’imana hano embere syenyu iniabirilhama. 11 Eri ‘ly’eribwe eryo inywe bahimbi mwalhangira nga siriwithe mughaso eryabiribya libwe likulhu ly’esonda.’* 12 Eryongera okw’ekyo, sihali owundi oyuwangaletha omulhamu, kundi okwa kihugho sikuli erindi lina eryo abandu babirihebwa eryangathulhamya.”
13 Neryo babere balhangira ngoku Petero na Yohana bakayibughira buthubaha, n’eriminya ngoku sibasomire* kandi ku ni bandu ba buli kiro, mubasweka. Neryo mubatsuka eriminya ngoku babya bakabya haghuma na Yesu. 14 Kandi babere banasamalire omulhume oyuwabya iniabirilhamibwa inian’imene haghuma nabo, mubabulha eky’erithasyabugha. 15 Neryo mubababwira bathi bahulhuke omwa kisenge kye Sanhedrini,* neryo mubatsuka erisabana amenge, 16 bathi: “Abalhume aba thubakolereki? Kundi kwenene babirikolha ekiminyikalho ekithe kya buli kiro ekyo abikalhani bosi be Yerusalemu babiriyilhangirira kandi sithwanga kighania. 17 Neryo omwatsi oyu eribya isyangathasyongera erilhandaghana omwa bandu, muyire thubahayire n’eribabwira thuthi baleke erithasyabwira mundu wosi-wosi oko lina eri.”
18 Neryo mubababirikira n’eribabwira bathi baleke erithasyabugha kindu kyosi-kyosi kutse erikangirirya omwa lina lya Yesu. 19 Aliwe Petero na Yohana mubabasubirya bathi: “Mbulha kihikire embere sya Nyamuhanga eribahulikirira omwakanya k’erihulikirira Nyamuhanga, inywe mubye batsweri. 20 Aliwe ithwe, sithwanga leka erikania oko myatsi eyathwabirilhangira n’eriowa.” 21 Neryo babere babiribahayira kutsibu, mubababoholha, kundi mubathababanako ekyangaleka ibabasuyira kandi mubasagha abandu, kundi abosi babya bakaha Nyamuhanga y’olhukengerwa busana n’ekyabiribya. 22 Omulhume oyuwakolhawako ekithiko-thiko* eky’erilhamibwa eki abya w’emyaka eyilhabire oku 40.
23 Babere babiriboholhwa, mubaghenda eyiri balikyabo n’eriyababwira ebyo abahereri bakulhu n’abakulhu bababwira. 24 Babere babiriowa ebi, abosi haghuma mubasaba Nyamuhanga bathi:
“Omukama Omuthabali w’Ebyosi, n’Iwe wahangika olhubulha n’ekihugho n’engetse n’ebyosi ebiri mubyo, 25 kandi n’iwe wabugha erilhabira omwa mulimu abuyirire omwa buno bwa thatha-kulhu wethu Dawudi, omughombe wawu wuthi: ‘Busana naki ebihanda bikahithana n’abandu bakaghaniraya okwa bithawithe mughaso? 26 Abami b’ekihugho mubakangania emimanire yabo n’abathabali mubayihindania haghuma erilhwa na Yehova n’erilhwa n’omuhakabibwa wiwe.’* 27 Kundi kwenene Herode na Pontio Pilato haghuma n’abandu b’ebihanda n’abandu be Israeli mubayihindania haghuma omwa tawuni eyi erilhwa n’omughombe wawu oyubuyirire Yesu, oyo wahakabaya amaghutha, 28 erikolha ekya ebyalha byawu n’ekighendererwa kyawu byabya ibyabirisangwa byathwamu bithi bikendi syabya. 29 Neryo lino, Yehova, hulikirira erihayira lyabo, kandi wathikaya abaghombe bawu balhole embere erithulhughania ekinywe kyawu omwa buthubaha bwosi, 30 kandi iwunemunanulha ebyalha byawu busana n’erilhamya n’ebiminyikalho n’ebikathikaya ibinemukoleka erilhabira omwa lina ly’omughombe wawu Yesu oyubuyirire.”
31 Neryo babere babirisaba omw’ilemba-lemba,* omwanya ogho babya bahindenemo mwasuka-sukana, neryo abosi mubusulibwa n’omulimu abuyirire kandi mubabugha ekinywe kya Nyamuhanga omwa buthubaha.
32 Aliwe abangyi b’okwa bikiriraya babya n’omuthima mughuma kandi isihali n’omughuma w’okw’ibo oyuwabugha athi eby’awithe ni biwe iyuwene, aliwe mubawathikania omwa byosi ebyo babya bawithe. 33 Kandi omwa buthoki bunene abakwenda mubalholha embere eriha obwema obuhambire okw’ilhubuka ly’Omukama Yesu, n’abosi mubakanganibwa olhukogho lhunene. 34 Kundi nibya omw’ibo muhathabya n’oyukabya omwa buyithawa, kundi abosi ababya bawithe ebithaka kutse amanyumba ibakabighulhaya neryo ibaletha esyosente esiryalhuako, 35 kandi ibakasilethera abakwenda. Neryo isikaghabirawa obuli mundu erikwamana n’obuyithawa bwiwe. 36 Neryo Yozefu, oyo abakwenda babya bakathasyahulhamo Baranaba (lyamahindulhwa likamanyisaya, “Mughalha w’Erihumulikania”), Omulawi, embuthwa ye Kipuro, 37 aby’awithe eririma, mwalighulya, amaletha esyosente n’erisiha abakwenda.