Emibiiri y’Abakwenda
13 Neryo e Antiokia yabya ekithunga ekyabyamo abaminyereri n’abakangirirya: Baranaba, Simioni oyuwabya akahulhwamo Nigeri, Lukio owe Kurene, Manaeni oyuwakangiriribawa haghuma na Herode omuthabali w’edistrikiti, na Saulo. 2 Babere banemukolera* Yehova n’erisiba, omulimu abuyirire mwabugha athi: “Munyihighulire Baranaba na Saulo busana n’omubiiri ogho nabiribabirikirira.” 3 Neryo babere babirisiba n’erisaba, mubabahirako ebyalha n’eribabwira bathi baghende.
4 Neryo abalhume aba, abo omulimu abuyirire athuma, mubandaghalira e Seleukia, neryo mubalhua eyo bamasokera e Kipuro. 5 Babere bahika e Salami, mubatsuka erithulhughania ekinywe kya Nyamuhanga omwa syosinagogi sy’Abayuda. Kandi babya ibane na Yohana ng’omuwathikya.
6 Babere babirilhaba okwa kizinga kyosi erihika e Pafo, mubeya Omuyuda oyukahulhawamo Bara-Yesu, oyuwabya muthahwa kandi muminyereri w’amabehi. 7 Abya iniane na gavana Sergio Paulo, omundu w’amenge. Mwabirikira Baranaba na Saulo, omulhume oyu aby’anzire kutsibu eriowa ekinywe kya Nyamuhanga. 8 Aliwe Elema omuthahwa (kundi erina liwe kwa likahindulhawa lithya) mwatsuka eribahakanisya, erilengaho erilemesya omuthabali erikwama erikirirya. 9 Neryo Saulo oyukathasyahulhawamo Paulo, inianoswire n’omulimu abuyirire, mwamuthungerera 10 n’eribugha athi: “Iwe mulhume oyuswiremo obuli mulingo w’obunyeyi n’ow’obubi, iwe mughalha wa Diabolo, iwe nzighu y’obuli kindu ekithunganene, siwendi syaleka erihengemya esyonzira sya Yehova esihikire? 11 Lebaya! Ebyalha bya Yehova bine okw’iwe, kandi wukendibya ndimethime, siwendi lhangira ekyakakalha ky’eryuba ahabw’obuthuku.” Neryo aho naho ekilhumbi n’omwirima mubyamubyako, neryo mwamatha-matha akasondya oyuwanga musondolha omw’imuhamba okwa byalha. 12 Neryo omuthabali abere alhangira ekyamabya, mw’ikirirya, kundi mwasweka busana n’erikangirirya lya Yehova.
13 Neryo Paulo n’abo abya nabo mubalhua e Pafo omo bwathu bamahika e Perga omwa Pamfilia. Aliwe Yohana mwabasigha amasuba e Yerusalemu. 14 Aliwe mubalhua e Perga bamasa e Antiokia e Pisidia. Neryo babere b’ingira omwa sinagogi okwa kiro kye Sabato, mub’ikalha. 15 Emighambo n’emyatsi y’abaminyereri yabere yabirisomerwa embere sy’abandu, abakulhu b’omwa sinagogi mubababwira bathi: “Balhume, balikyethu, mwamabya imunawithe ekinywe ky’erihimbamo abandu, mukibughe.” 16 Neryo Paulo mwahangana, amabahunia omwa byalha n’eribugha athi:
“Balhume, Baisraeli, nenyu inywe bandi abak’ubaha Nyamuhanga, muhulikirire. 17 Nyamuhanga w’abandu aba, Abaisraeli, mwasombolha abathatha-kulhu bethu, kandi mwahamya abandu iban’ikere ng’ababunga omwa kihugho kye Misiri kandi mwab’ihayo omwa kuboko kw’amaaka. 18 Kandi omwa buthuku bw’emyaka nga 40, mwabaghumisirizya ibane omo mbwarara. 19 Abere abirithoghothya ebihanda musanju by’ekihugho kye Kanana, mwaghaba ekihugho kyabyo ng’omwandu. 20 Ebyosi ebyo byabya omwa myaka nga 450.
“Enyuma w’eki, mwabaha abatsweri erihika oko muminyereri Samweli. 21 Aliwe enyuma waho mubasaba erihebwa omwami, na Nyamuhanga mwabaha Saulo mughalha wa Kisi, omulhume ow’omwa kihanda kya Benyamini, ahabw’emyaka 40. 22 Abere abirimw’ihaho, mwabahanganirya Dawudi ng’omwami, oyo ahako obwema athi: ‘Nabiribana Dawudi mughalha we Yese omulhume oyo omuthima waghe akaligha; akendi kolha ebyosi ebyo ngayisunza.’ 23 Erikwamana n’omulhaghe wiwe, erilhua omwa lhubutho* lhw’omulhume oyu, Nyamuhanga abirilethera Israeli y’omulhamya, Yesu. 24 Oyo athali asa, Yohana abya iniabirithulira abandu bosi abe Israeli athi babatizibawe ng’ekiminyikalho ky’eriyisubamo. 25 Aliwe Yohana abere anemughunzerera omubiiri wiwe, iniakabugha athi: ‘Mukalengekanaya n’ingye ndi? S’ingye iyo. Aliwe lebaya! owundi anemwasa enyuma syaghe oyo ngathahikire n’okwa lhulengo lhw’eriboholha emikoba y’esyongetha siwe.’
26 “Balhume, balikyethu, inywe bitsikulhu b’omw’ihiika lya Abrahamu n’abandi abali omwa kathi-kathi kenyu abakubaha Nyamuhanga, thwabirithumirwa ekinywe ky’omulhamu oyu. 27 Kundi esyondulhani sye Yerusalemu n’abathabali babo mubathaminyerera oyu, aliwe babere bakakolha ng’abatsweri, mubaberererya ebyabughawa n’Abaminyereri, ebikasomawa omwa mulenge ow’akowika okwa buli sabato. 28 Nomwakine indi mubathamubanako ekyangaleka iniakwa, mubahathikana Pilato bathi alhangire athi omundu oyo ak’ithawa. 29 Neryo babere babiriberererya ebyosi ebyahandikawa ebimuhambireko, mubamukimya okwa muthi,* bamamuhira omw’isinda.* 30 Aliwe Nyamuhanga mwamulhubukya okwa baholi, 31 kandi ahabw’ebiro bingyi ababya bakaghenda nayu erilhua e Galilaya erihika Yerusalemu, mubamulhangira. Aba lino babakamuhera obwema embere sy’abandu.
32 “Neryo thukababwira engulhu yuwene eyihambire okwa mulhaghe ogho abathatha-kulhu bahebawa. 33 Nyamuhanga abiriberereryagho ighuma busana nethu, abaana babu, omw’ilhubukya Yesu; ngoku kinahandikire omwa lhwimbo lhwakabiri: ‘Wuli mughalha waghe; munabwire namabiribya thatha wawu.’ 34 Kandi eribya Nyamuhanga imwamulhubukya okwa baholi isyendi syasuba okw’ihonda, Nyamuhanga abiribugha omwa nzira eyi athi: ‘Ngendi syabaha ebikakanganaya olhwanzo olhutheleghulha olho nalhagha Dawudi.’* 35 N’olhundi lhwimbo lhukabugha lhuthi: ‘Siwendi syalighira omuthaleghulha wawu akahonda.’ 36 Okwa lhundi lhuhandi, Dawudi mwakolera Nyamuhanga* omubiiri owabuyirire omwa ngebe yiwe, mwaghotsera omwa lhuholho, mwatsikwa haghuma n’abathatha-kulhu biwe, kandi mwahonda. 37 Okwa lhundi lhuhandi, oyo Nyamuhanga alhubukaya mwathahonda.
38 “Neryo balikyethu, mukiminye ngoku erilhabira omw’oyu, munemubwirwa omwatsi w’erighanyirwa ebibi, 39 kandi ngoku n’okwa myatsi yosi eyo Emighambo ya Musa yabya isiyangathoka eribayira mw’abatheko olhubanza, obuli mundu oyukikiriraya akaghanzawa ng’oyutheko lhubanza erilhabira omw’oyu. 40 Busana n’ekyo, muyitheghaye nuku ebyo Abaminyereri babugha sibibabyeko: 41 ‘Muthakilhangira, inywe b’akakuthyo, musweke, kandi muthoghothe, kundi nganemukolha ekindu omwa biro byenyu, ekindu ekyo muthe mwang’ikirirya omundu nomwanga basoborerakyo buuli.’”
42 Babere bakahulhuka, abandu mubabalemba-lemba bathi basyabakaniraya emyatsi eyi okwa Sabato eyikakwamako. 43 Neryo olhuhindano lhw’omwa sinagogi lhwabere lhwahwa, abangyi b’okwa Bayuda n’abahindukira omwa Kiyuda ababya bakaramya Nyamuhanga mubakwama Paulo na Baranaba, abo omughulhu bakanaya nabu babalemba-lemba bathi basighale omwa lhukogho lhwa Nyamuhanga.
44 Okwa Sabato eyakwamako hakuhi etawuni yosi mubayihindania erihulikirira ekinywe kya Yehova. 45 Abayuda babere balhangira abandu bangyi, mub’usulha mw’erihali kandi omw’itsuma mubatsuka erihakanisya ebya Paulo aby’akabugha. 46 Neryo omwa buthubaha Paulo na Baranaba mubababwira bathi: “N’inywe mwabya mutholere eritsuka eribwirwa ekinywe kya Nyamuhanga. Kundi inywe mukakighana kandi mukayitswera ng’abathatholere eribana engebe y’erikotha, lebaya! thwamasuba okwa b’ebihanda. 47 Kundi Yehova abirithulhaghira omwa binywe bino athi: ‘Nabiribasombolha eribya kyakakalha ky’ebihanda, nuku mubye mulhamu erihika okwa nduli-nduli sy’ekihugho.’”
48 Ab’ebihanda babere bowa eki, mubatsuka eritsema n’eriha ekinywe kya Yehova ky’olhukengerwa, n’abosi ababya n’amalengekania awakaleka ibatholere engebe y’erikotha mubikirirya. 49 Eryongera okw’ekyo, ekinywe kya Yehova mukyalhandaghana omwa kihugho kyosi. 50 Aliwe Abayuda mubatsotsererya abakali b’ebitsumbi abak’ubaha Nyamuhanga n’abalhume bakulhu b’etawuni, kandi mubahira omwa bandu mw’akaliro-liro k’eriendererya Paulo na Baranaba n’eribaghusa eyihya w’emithano yabo. 51 Neryo mubabakunguthira etsutsu y’okwa bisandu byabo, bamaghenda e Ikonio. 52 N’abigha mubalholha embere eritsema n’eryusulha n’omulimu abuyirire.