Ebaruha y’Erimbere Okwa Banya Korinto
3 Neryo balikyethu, mundathoka erikania nenyu ng’abandu b’obunyakirimu, aliwe ng’abandu b’ekinyamubiri, ng’esyomekeke omu Kristo. 2 Munabaha amathe, butsira ebyalya ebikalha-kalire, kundi mwabya isimuli mwabya n’akaghalha akakaghunza. Kandi nibya na lino, simuli mwabya n’akaghalha akakaghunza, 3 kundi mukine b’ekinyamubiri. Kundi erihali n’amalhwa bine omw’inywe, mbwino obo simuli b’ekinyamubiri kandi simuli lendera ng’abandu kubakakolha? 4 Kundi omughulhu omundu akabugha athi, “Ingye indi wa Paulo,” n’owundi athi, “Ingye indi wa Apolo,” mbwino isimwathabya ng’abandu b’ekihugho?
5 Neryo kwesi, Apolo nindi? Na Paulo nindi? Abaghombe abo erilhabira omw’ibo mumwabya bikirirya, ngoku Omukama alighira obuli mughuma. 6 Ingye munahera, Apolo muthangirira, aliwe Nyamuhanga yuwabya akalhasyabyo, 7 neryo ekikulhu si y’oyukahera kutse oyukuthangirira, aliwe ni Nyamuhanga oyukaleka ibyalhasa. 8 Kwesi oyukahera n’oyukuthangirira ni baghuma,* aliwe obuli mundu akendi syahebwa olhuhembo lhwiwe erikwamana n’omubiiri wiwe. 9 Kundi thukakolha haghuma na Nyamuhanga. Inywe muli ririma eryo Nyamuhanga akalima, enyumba ya Nyamuhanga.
10 Erikwamana n’olhukogho lhwa Nyamuhanga olho nahebawa, munahimba omusingyi ng’omuhimbi* oyuthendekirwe ndeke, aliwe owundi yukahimba kugho. Aliwe obuli mundu abye inianemulebya ng’anemuhimba kugho kw’athi. 11 Kundi sihali oyuwangahimba owundi musingyi kwilhaba owabirihimbwa, nagho ini Yesu Kristo. 12 Neryo omundu wosi-wosi amahimba okwa musingyi omwa horo, efeza, amabwe w’obughuli, emithi, ebithi ebyumire, kutse obunyatsi, 13 omubiiri w’obuli mughuma akendi syakanganibwa ngoku ali,* kundi ekiro kineyo ekikendi syakanganiagho, kundi akendi syabisulhwa omwa muliro, kandi omuliro iwuwene-wene akendi syakangania nga ni mubiiri owali athi ogho buli mundu abirihimba. 14 Omubiiri ogho omundu wosi-wosi ahimbako amasighalhako, iniakendi syahebwa olhuhembo; 15 omubiiri w’omundu wosi-wosi amahya, iniakendi herya, aliwe iyo iniakendi lhamibwa; kandi byamabya bithya, iniakendibya ng’oyuwamalhamibwa omwa muliro.
16 Simwasi ngoku inyw’ibene-bene muli hekalhu ya Nyamuhanga kandi ngoku omulimu wa Nyamuhanga ikere omw’inywe? 17 Omundu wosi-wosi amathoghothya ehekalhu ya Nyamuhanga, Nyamuhanga akendi syamuthoghothya; kundi ehekalhu ya Nyamuhanga yibuyirire, nenyu muli hekalhu eyo.
18 Neryo sihabye oyukayitheba iyuwene-wene: Owosi-wosi omw’inywe amalengekania athi ni w’amenge omwa mulembe ono, abye mukiru, nuku angabya w’amenge. 19 Kundi amenge w’ekihugho kino ni bukiru embere sya Nyamuhanga, kundi kihandikire kithi: “Akahamba ab’amenge omwa mathebo wabo.” 20 Kandi: “Yehova anasi ngoku ebyo ab’amenge bakahanulha ni buyira.” 21 Neryo sihabye oyukayihalhambira abandu; kundi ebyosi ni byenyu, 22 mbulha ni Paulo kutse Apolo kutse Kefa* kutse ekihugho kutse engebe kutse olhuholho kutse ebiriho lino kutse ebikendi syasa, ebyosi ni byenyu; 23 muli bandu ba Kristo; na Kristo, ni wa Nyamuhanga.