Ebaruha Yakabiri Okwa Banya Korinto

9 Neryo okwa mubiiri w’ababuyirire, omo kwenene, sikiriyithaghisibawa ingye eribahandikira, 2 kundi nganasi omuthima wenyu w’eribya imunayitheghekire ogho ngayihalhambira okwa banya Makedonia, ngoku e Akaya yamabirighunza omwaka iyinayitheghekire, n’omuhwa wenyu abirisighalira abangyi b’okw’ibo. 3 Aliwe ngathuma baghalha bethu nuku eriyihalhamba lyethu omw’eki busana nenyu siribye buyira kandi nuku mwangabya imunayitheghekire, ngoku nanabugha indi mutholere imwabya. 4 Kundi, abanya Makedonia bamasa haghuma naghe neryo thuk’eya isimuyitheghekire, ithwe—nenyu ikwamune—ithukendi hemuka busana n’eriyikethera erya thubawithemo. 5 Neryo munalhangira ikitholere erihira omwa balikyethu mw’omuhwa w’eriasa eyo muli ihakine obuthuku n’erilhangira bathi ekihembo kyenyu kinene ekyo mwalhaghanisaya kikasangwa kyatheghekwa, nuku kyangabya ikinatheghekirwe ng’ekihembo ky’erihithya, butsira ng’eky’erikakwa.

6 Aliwe omw’eki, oyukabiba bike akendi syaghesa bike, n’oyukabiba bingyi akendi syaghesa bingyi. 7 Obuli mundu akole ngoku abirithwamu omwa muthima wiwe, butsira ng’oyukakakawa* kutse erikunwa, kundi Nyamuhanga anzire oyukaha inianatsemire.

8 Kandi Nyamuhanga anawithe amaaka w’erikanyirirya olhukogho lhwiwe lhwosi okw’inywe nuku mughulhu wosi mwangabya imunawithe obuli kindu ekya mukayithagha, kandi imunawithe bingyi omwa buli mubiiri owuwene. 9 (Ngoku kihandikire kithi: “Abirihithya kutsibu; abiriha abanakwa. Erithunganene liwe ni rya kera na kera.” 10 Neryo Oyukaghabira omubibi y’embutho n’omuggati w’erirya omwa bungyi akendi syabaha embutho n’erikanyiriryayo nuku muhereyo kandi akendi syakanyirirya erihulhulha lyenyu ly’erithunganene.) 11 Omwa buli mwatsi munemutsumulhwa omwa buli mulingo w’erihithya, ikyaleka erilhabira omw’ithwe, Nyamuhanga iniahebwa ewasingya; 12 kundi obuherezya bw’erikolera abandi obu si busana n’eritsomana ndeke ebiyithawa by’ababuyirire lisa aliwe na busana n’eryongera erilethera Nyamuhanga y’ewasingya. 13 Erilhabira omwa bwema obukalhangirika omwa buherezya bw’eriwathikya obu, bakaha Nyamuhanga y’olhukengerwa kundi mukaghondera engulhu yuwene eyihambire oku Kristo, ngoku mwabugha embere sy’abandu, kandi kundi mukahithaya omw’ibaha n’abandi bosi ahathe eriyikukumirira. 14 Kandi omw’ilemba-lemba Nyamuhanga busana nenyu, bakakanganaya olhwanzo olho babawithire busana n’olhukogho lhwa Nyamuhanga okw’inywe olhulengethukire.

15 Ewasingya oku Nyamuhanga busana n’ekihembo kiwe ekithe kyanga soborerwa ekyo akaha ahathe erithuha.