Emibiiri y’Abakwenda
8 Saulo iyo mwasighika er’ithibwa lya Stefano.
Okwa kiro ekyo, ekithunga ekyabya e Yerusalemu mukyendereribwa kutsibu; abosi mubapanzikanira omwa bitsweka bye Yudea ne Samaria, abakwenda batheko. 2 Aliwe abalhume abakubaha Nyamuhanga mubaheka Stefano bamayamutsika, kandi mubamulira kutsibu. 3 Aliwe Saulo mwatsuka eritsutsubya ekithunga. Iniakathahirira obuli nyumba, erikurira abalhume n’abakali b’eyihya n’eribahira omwa ngomo.
4 Aliwe abapanzikana mubalhaba omwa kihugho ekyo ibanemuthulhughania engulhu yuwene y’ekinywe. 5 Neryo Filipo mwandaghalira omwa tawuni ye Samaria amatsuka eribabwira oku Kristo. 6 Abandu bangyi ibanawithe ekighendererwa kighuma, mubathegha Filipo y’amathwe bakahulikirira n’erilhangira ebiminyikalho ebyo aby’akakolha. 7 Kundi abangyi babyako emirimu mibi, neryo iyikalhaka omwa mulenge muuli n’eribalhuako. N’abangyi ababya basanyarere n’abalema mubalhamibwa. 8 Neryo omwa tawuni eyo mumwabya etseme nene.
9 Neryo omwa tawuni eyo mwabya omulhume oyukahulhawamo Simoni, oyo erimbere aby’akakolha eby’olhukumu-kumu n’eriswekya abandu be Samaria, iniakayahulhamo mundu w’amaaka. 10 Abosi eritsuka okwa b’ahisi erihika okwa b’amaaka manene kutsibu, ibakamuhulikirira n’eribugha bathi: “Omulhume oyu ni Kaghalha ka Nyamuhanga, akakahulhawamo Maaka Manene.” 11 Neryo ibakamuhulikirira kundi ahabw’obuthuku aby’akabaswekya omwa by’olhukumu-kumu biwe. 12 Aliwe babere b’ikirirya Filipo, oyuwabya akathulhughania engulhu yuwene y’Obwami bwa Nyamuhanga n’ey’erina lya Yesu Kristo, abalhume n’abakali mubabatizibwa. 13 Simoni nayu mwikirirya, kandi abere abiribatizibwa, mwalholha embere na Filipo; kandi mwasweka akalhangira ebiminyikalho n’eby’amaaka bingyi ebyakoleka.
14 Abakwenda ababya e Yerusalemu babere bowa ngoku abanya Samaria babiriligha ekinywe kya Nyamuhanga, mubabathumira Petero na Yohana; 15 neryo mubandaghalirayo bamabasabira nuku babane omulimu abuyirire. 16 Kundi omulimu abuyirire abya isyali abya n’okwa mughuma w’okw’ibo, aliwe babya ibamathabatizibwa lisa omwa lina ly’Omukama Yesu. 17 Neryo mubabahirako ebyalha, bamatsuka erihebwa omulimu abuyirire.
18 Neryo Simoni abere alhangira ngoku abandu bakahebawa omulimu abuyirire abakwenda bakabahirako ebyalha, mwabalhaghanisya esyosente, 19 athi: “Naghe munyihe obuthoki obo nuku omundu owosi-wosi oyo nangahirako ebyalha iniabya inianganahebwa omulimu abuyirire.” 20 Aliwe Petero mwamubwira athi: “Efeza yawu yithoghothibawe haghuma nawu, kundi wukalengekanaya wuthi esyosente sikendi leka iwabana olhuhembo olho Nyamuhanga akaha ahathe eriliha. 21 Siwuwithe lhuhandi kutse ighabo omo mwatsi oyu, kundi omuthima wawu syalitere-tere embere sya Nyamuhanga. 22 Neryo wuyisubemo busana n’obubi bwawu obu, kandi wulembe-lembe Yehova wuthi, kyamathokekana, wughanyirawe busana n’amalengekania mabi w’omuthima wawu; 23 kundi ngalhangira wuli butwa obukalihire* kandi wuli mukobe w’ebithathunganene.” 24 Simoni mwababwira athi: “Mulembe-lembe Yehova busana naghe nuku okwa bya mwamabugha sihabye n’ekighuma ekikanyibyako.”
25 Neryo babere babir’iha ndeke obwema n’erikania ekinywe kya Yehova, mubasuba e Yerusalemu, kandi bamaghenda bakathulhughania engulhu yuwene omwa byalu bingyi by’Abasamaria.
26 Aliwe omumalaika wa Yehova mwabwira Filipo athi: “Hangana wughende eyikwa omwa nzira eyikalhua e Yerusalemu eriya e Gaza.” (Eyi y’enzira y’omwa mbwarara.) 27 Neryo mwahangana amaghenda, neryo lebaya! omulhume Omuetiopia omukonwa,* omulhume w’obuthoki ahisi sy’omwami-kali Kandake ow’Abaetiopia, kandi oyuwabya ak’imanira ebyosi by’obugaga by’omwami-kali. Abya iniabirighenda e Yerusalemu eriyaramya, 28 neryo abya iniakalhuayo kandi inian’ikere omwa kiggali kiwe, inianemusoma obuminyereri bwa Isaya omwa mulenge owakowika. 29 Neryo omulimu mwabwira Filipo athi: “Ghenda wuyahike okwa kiggali kirya.” 30 Neryo Filipo mwaghendania nayu inianemuthibitha, neryo mwowa omulhume inianemusoma obuminyereri bwa Isaya omwa mulenge owakowika, neryo mwamubulya athi: “Wunemuyitheghererya ebya wukasoma?” 31 Omulhume mwabugha athi: “Nangayitheghererya indi isihali oyukanyisondolha?” Neryo omulhume mwabwira Filipo athi asambire omwa kiggali n’er’ikalha haghuma nayu. 32 Neryo ono w’omwatsi w’Amasako ogho aby’akasoma: “Ng’embuli mwathwalhwa okw’ikerwa, kandi ng’ekyana ky’embuli ekiri bukuthu embere sy’omuthwi w’obweya bwakyo, neryo syalikumbulha obuno bwiwe. 33 Omughulhu ahemulikanibawa, mwalhusibwako obulingirirania. Nindi oyukendi syakania buuli okwa bihambire okwa lhulengo lhwiwe? Kundi engebe yiwe yikalhusibawa okwa kihugho.”
34 Neryo omulhume omukonwa mwabwira Filipo athi: “Ngakusaba wunyibwire, omuminyereri akakanaya okundi? Okw’iyo iyuwene-wene kutse oko wundi mundu?” 35 Filipo mwatsuka erikania, kandi eritsukira okw’isako eri, mwamubwira engulhu yuwene eyihambire oku Yesu. 36 Neryo babere banemughenda omwa nzira, mubahika ahali amaghetse, n’omukonwa mwabugha athi: “Lebaya! Hano hane amaghetse; ni kyahi ekikanyikakiraya okw’ibatizibwa?” 37 —— 38 Neryo mwabugha athi ekiggali k’imanibawe, neryo Filipo n’omulhume omukonwa mubandaghalira omwa maghetse, Filipo mwamubatizya. 39 Babere balhua omwa maghetse, aho naho omulimu wa Yehova mwathwalha Filipo, neryo omulhume omukonwa mwabya isyangathasyamulhangira, aliwe mwalholha embere n’olhughendo lhwiwe inianatsemire. 40 Aliwe Filipo mwayisanga e Asidodi, kandi mwathimba omwa bulhambu obo n’erilholha embere erithulhughania engulhu yuwene omwa syotawuni syosi erihika aho ahikira e Kaisaria.