Ebaruha oku Filemono
1 Paulo, omunya-ngomo busana na Kristo Yesu, na Timoteo mughalha wethu, oku Filemono omukoli mulikyethu mwanzwa, 2 n’oku Afia mwali wethu, n’oku Arkipo omusirikali mulikyethu, n’okwa kithunga ekiri omwa nyumba yawu:
3 Ambi olhukogho n’obuholho erilhua oku Nyamuhanga Thatha wethu n’Omukama Yesu Kristo ibyabya nenyu.
4 Mughulhu wosi ngasima Nyamuhanga waghe ingakwahulha omwa misabe yaghe, 5 omughulhu ngalholha embere eriowa okw’ikirirya lyawu n’olhwanzo olhwa wuwithire Omukama Yesu n’ababuyirire bosi. 6 Ngasaba indi ambi erikirirya erya thulimo haghuma iryakuhiramo omuhwa w’eriligha obuli kindu kibuya ekya thuwithe erilhabira omu Kristo. 7 Kundi munabana etseme nene n’erihumulikana ingowa okwa lhwanzo lhwawu, kundi emithima* y’ababuyirire yabirithekana erilhabira omw’iwe, mughalha wethu.
8 Busana n’enzumwa eyi, nomunganawithe obwiranda bunene bw’erikania erikwamana na Kristo obw’erikulhaghira indi wukole ekitholere, 9 omwakanya k’ekyo ngakulemba-lemba erisighikira oko lhwanzo lhwawu, kundi ngali Paulo omulhume mukulhu, ee, oyuli munya-ngomo lino busana na Kristo Yesu. 10 Ngakulemba-lemba busana n’omwana waghe ya Onesimo, oyo nabya nabere thatha wiwe ingane omwa ngomo.* 11 Erimbere abya isyakuwithire mughaso, aliwe lino akuwithire omughaso kuthya naghe. 12 Ngamusubaya eyo wuli, ee, iyo omuthima waghe.*
13 Nangananzire ingabya nayu hano nuku anyiherezaye omo bwawu omughulhu indi omwa ngomo busana n’engulhu yuwene. 14 Aliwe singanzire erikolha ekya wuthethalighirana nakyo, nuku wukole ebibuya, isi busana n’erikunwa, aliwe busana n’eriyithwiramo. 15 Obundi kwenene eki ky’ekyaleka iniakulhuako habw’akathuku kake,* nuku wangabya nayu kera na kera, 16 isyakiri mukobe buyira, aliwe mulikyethu mwanzwa, kwilhabirirya okw’ingye, aliwe ibbwa kandi kutsibu-tsibu okw’iwe, kinyamubiri n’omo Mukama. 17 Neryo namabya ingali munywani* wawu, wumwangirire ndeke ngoku wulyendi nyangirira. 18 Kandi, amabya imwakusoberya kutse iniali mw’eribanza lyawu, wunyihire lyoko. 19 Ingye, Paulo, ingyuwene-wene ngahandika omwa byalha byaghe: Ngendi syakuthuhalyo—nomwakine indi nawu wuli mw’eribanza lyaghe, engebe yawu. 20 Ee, mughalha wethu, ambi inahebwa obuwathikya obu erilhua okw’iwe omo Mukama; humulikanaya omuthima* waghe omo Kristo.
21 Ngayikethere ngoku wukendi ligha, neryo ngakuhandikira inganasi ngoku wukendi kolha kwilhaba n’ebya namabugha. 22 Aliwe erithasyongera okw’ekyo, wunyitheghekere omwanya w’er’ikalhamo, kundi ngawithe amaha indi erilhabira omwa misabe yawu ngendi lighirwa erisuba eyo wuli.*
23 Epafra, omunya-ngomo mulikyaghe omw’imathikana na Kristo Yesu, amakuramukya, 24 kuthya na Mariko, Aristariko, Dema, na Luka, abakoli balikyaghe.
25 Olhukogho lhw’Omukama Yesu Kristo lhubye nawu busana n’omuthima ogho wukakanganaya.