Ebaruha Okwa Banya Galatia
2 Enyuma w’emyaka 14 munathasyahethukira e Yerusalemu ingane na Baranaba, na Tito mwaghenda naghe. 2 Nahethukirayo busana n’eribisulirwa kandi munabahikyako engulhu yuwene eyo ngathulhughanaya omwa b’ebihanda. Aliwe eki mukyakolhwa bubiso-biso embere sy’abalhume ababya basikibwe, erilhangira indi sindithibithira bbule kutse sinathathibithira bbule. 3 Nomwabine, nibya na Tito oyuwabya naghe mwathakakwa eribanibwa, nomwanabya Mugiriki. 4 Aliwe omwatsi oyo mwabuthuka busana n’abalikyethu b’amabehi abalethawaho bubiso-biso, abombomberamo erisyabegga obwiranda obwa thuwithe omw’imathikana na Kristo Yesu, nuku banga thuyirir’ighuma mo bakobe babo; 5 muthuthaligha eribaghondera, eyihi, nibya n’ahabw’akathambi kake,* nuku mwangalholha embere imune n’ekwenene y’engulhu yuwene.
6 Aliwe okwa babya bakalhangirwa mwa b’omughaso—mbulha babya bahi, siki okw’ingye, kundi Nyamuhanga syali ghendera okwa misosere y’omundu ey’eyihya—ababya bakalhangirwa nga basikibwe abo mubathanyeghesya kihyaka kyosi-kyosi. 7 Mbaghane n’ekyo, babere balhangira inabirihebwa omubiiri w’eribwira abathabanibwe b’engulhu yuwene, ngoku Petero anahebawa ow’eribwira ababanibwe— 8 oyuwaha Petero y’obuthoki bw’eribya mukwenda okwa babanibwe naghe yuwananyihabo okwa b’ebihanda— 9 kandi babere balhangira olhukogho olho nakanganibawa, Yakobo, na Kefa* na Yohana, abalhangirika ng’esyonduhi, mubathuha ebyalha by’amali eby’obughuma ingye na Baranaba, nuku thughende okwa b’ebihanda aliwe ibo okwa babanibwe. 10 Mubathusaba kighuma bathi thubye ithun’ibukire abanakwa, kandi eki nabirilengaho kutsibu erikikolha.
11 Aliwe Kefa* abere asa e Antiokia, munamughania* busu okwa busu, kundi kwenene abya iniabirisobya.* 12 Kundi abalhume balebe erilhua eyiri Yakobo babere bathe bahika, abya iniakanalya n’abandu b’ebihanda; aliwe babere bahika, mwalekera aho erikolha ekyo, amayighabulha, ak’ubaha ababanibwe. 13 Abandi Bayuda nabo mubamuyiyungako omw’iyithendererya* eri, kuthya na Baranaba amabayiyungako omw’iyithendererya* lyabo. 14 Neryo nabere nalhangira ngoku sibali kwama ndeke ekwenene y’engulhu yuwene, munabwiririra Kefa* embere sy’abosi indi: “Iwe, nomwawune Muyuda, wamabya iwune omwa ngebe ey’ab’ebihanda butsira ey’Abayuda, wanga hira wuthi omwa b’ebihanda mw’omuhwa w’erighendera okwa ebyo Abayuda bakakolha?”
15 Ithwe Bayuda kibuthiranwa, butsira abakolha-nabi erilhua omwa b’ebihanda, 16 thunasi ngoku omundu akaghanzawa mo muthunganene, butsira erilhabira omwa bikorwa by’emighambo, aliwe erilhabira omw’ikirirya Yesu Kristo lisa. Neryo thwabirikirirya omu Kristo Yesu, nuku thughanzawe mwa bathunganene omw’ikirirya Kristo butsira omwa bikorwa by’emighambo, kundi sihali n’omughuma oyukendi* syahulhwamo muthunganene omwa bikorwa by’emighambo. 17 Neryo nethu thwamabya ithwabiribya bakolha-nabi ithunemusondekania erighanzwa mw’abathunganene erilhabira omu Kristo, neryo mbwino Kristo ini mwimaniri w’ekibi? Eyihi nahake! 18 Ebindu ebyo nanahimbulha, nam’imya ngathasyabihimba, inamakangania indi ngali mukolha-nabi. 19 Kundi erilhabira omwa mighambo munaholha oko mighambo, nuku nangabyaho oko Nyamuhanga. 20 Nabirikongomererwa okwa muthi haghuma na Kristo. S’ingye ngakiriho, aliwe Kristo yuliho omw’imathikana naghe. Omo kwenene, engebe eyo ngali nayo lino omwa mubiri nyiriho busana n’erikirirya Mughalha wa Nyamuhanga oyuwanyanza n’eriyihayo busana naghe. 21 Sindi ghana* olhukogho lhwa Nyamuhanga, kundi erithunganene lyamabya irikasa erilhabira omwa mighambo, kwesi Kristo imwaholera bbule.