E BIBLIA ERISUBIRYA OKWA BIBULYO

Hanemwendi syabya obuthuku ithwa thunga egavumente nguma omwa kihugho kyosi?

Thalengekania egavumente nguma omwa kihugho kyosi ngoku yanga ghasira abandu. Abangyi munabwire bakaghalhawa kundi ni banakwa kutsibu, abandi inina bagaga kutsibu. Aliriryo egavumente nguma ey’ekihugho kyosi eyikalumirirawa abandu iyikendi lhangira yithi obuli mundu akathunga eky’akayithagha. Mbwino abandu ibanakolha egavumente ng’eyi?​—Soma Yeremia 10:23.

Erilhua kera, esyogavumente syabirilemwa omwa nzira nyingyi erighunza h’ebitsibu, kwilhabirirya okwa banakwa. Esindi gavumente sikanubaya abandu. (Omugambuli 4:1; 8:9) Aliriryo Nyamuhanga Omuthoki w’Ebyosi abirilhaghanisya erihiraho egavumente eyikendi syalhusyaho esindi syosi. Omuthabali wayu akendi syatsomana ndeke abandu.​—Soma Isaya 11:4; Danieli 2:44.

Obwami bwa Nyamuhanga bukendi syakolhaki?

Yehova Nyamuhanga abirisombolha Omuthabali ow’ekihugho kyosi oyutholere, Mughalha wiwe, Yesu. (Luka 1:31-33) Iniane okwa kihugho, Yesu aby’anzire eriwathikya abandu. Ng’Omwami, akendi syahira abandu b’ebihanda byosi omwa bughuma n’eribalhamya okw’inuba lyosi.​—Soma Esyonyimbo 72:8, 12-14.

Obuli mundu anemwendi ligha Yesu ng’Omuthabali? Eyihi. Aliriryo Yehova akinaghumisirizaya. (2 Petero 3:9) Anemuha abandu b’akaghisa ak’eriligha Yesu ng’Omuthabali. Yesu akisigha inialhusya omwa kihugho mw’abandu babi n’eriletha obuholho n’obwiranda omwa kihugho kyosi.​—Soma Mika 4:3, 4.