Ebiro Bisathu eby’Erihumulikanibwa Bunyakirimu
1. Olhuhindano olhwe disitrikiti olhw’omwaka ono lhukendi thughasira lhuthi?
1 Omwa kihugho kya Sitani kino ekitsandire kutsibu bunyakirimu, Yehova ane mulholha embere erihumulikania abaghombe biwe. (Isa. 58:11) Enzira nguma eya Yehova akakolesaya erithuhira mw’akaghalha lhw’olhuhindano olhwe Disitrikiti olhw’obuli mwaka. Olhuhindano lhw’omwaka ono lhune museghera hakuhi, thwanga thoka thuthi eriyitheghekera erihumulikanibwa n’erihumulikania abandi bunyakirimu?—Emi. 21:5.
2. Ni mitheghekere ki eya thutholere ithwa sangwa thwakolha?
2 Wamabya isiwuli wakolha ekyo, lhangira wuthi wukathegheka ndeke emibiiri yawu wanga syahindana okwa biro byosi bisathu eby’olhuhindano. Wune wabaririra endambi eya wukendi syakolesya erighenda okwa lhuhindano buli kiro nuku wangasyahika lhuba n’eribana ah’erikalha? Thutholere ithwalhangira thuthi sithuli thalha okwa kihulho kyosi-kyosi eky’obunyakirimu ekya Yehova abirithutheghekera! (Isa. 65:13, 14) Wanabiri bana ahawukendi syakesya kandi ngoku wukendi syaghenda?
3. Ni menge wahi awakendi thuwathikya n’eka yethu erighasirwa ndeke omwa ndegheka?
3 Ni kyahi ekikendi syakuwathikya erihulikirira emikania yikalhabibwa? Kyamathokekana, omwa biro by’olhuhindano kesaya lhuba wanga lhuhuka. Thungerera embuyi yikakania. Sukulha obuli isako omwa Biblia yawu. Handika esyonzumwa. Kyuwene ababuthi er’ikalha n’abaana babu nuku banga bawathikya erihulikirira. (Emi. 29:15) Obundi mwangana kania okwa bilhwe omwa ndegheka obuli igholho-gholho ng’eka. Eka yawu erithoka erilholha embere erihumulikanibwa olhuhindano lhwosi lhwabiri hwamu, mwangana hira h’obuthuku omw’Iramya ery’Eka ery’erigholho-gholho erikania okwa syonzumwa ndebe esya mwanga kolesya ng’eka.
4. Thwanga wathikya thuthi abandi abali omwa kithunga eribana erihumulikanibwa bunyakirimu?
4 Wathikaya Abandi Babane Erihumulikanibwa: Thwanzire n’abandi bahumulikanibawe bunyakirimu. Mbwino omwa kithunga kyenyu mune abathuliri abakekelhuhire kutse abandi abakayithagha obuwathikya obw’erighenda okwa lhuhindano? Mbwino wangana thoka eribawathikya? (1 Yn. 3:17, 18) Abasyakulhu, kwilhabirirya abalebererya b’esyogurupu, batholere ibalhangira bathi abathuliri ng’aba bakahebawa obuwathikya.
5. Thukendi syaghaba thuthi ehipapura ehy’erikokya ithune okwa lhuhindano? (Lebaya akasanduko okwa lhupapura lhuno.)
5 Ngoku thukana kolha, esyoyenga isathu olhuhindano lhwethu lhuthe lhwabya thukendi syasangira omw’ithererera ery’erikokya abandu. Ebithunga bitholere ibyahira h’ekilhubirirwa eky’erighaba ehipapura ehyosi ehy’erikokya n’erighunza obulhambu kyamathokekana. Aliriryo, mwamasakya ehipapura hy’erikokya omw’eka yenyu erithererera likahwamu, mulhangire muthi mukendi syasa nahyo okwa lhuhindano. Hikendi syakolesibwa erikokya abandu abothukeghaya ithune okwa lhuhindano. Eka yamabya iyikinawithe ehindi hipapura ehy’erikokya kandi yikalhangira yithi siyendi thoka erihighaba iyine okwa lhuhindano, yitholere iyahiha abathangiriri yikahika okwa lhuhindano Kyakathano. Omwatsi owakakanganaya ngoku ehipapura ehi hyanga kolesibwa akendi syahebwa okwa lhuhindano.
6. Thwanga humulikania thuthi abandi omw’ibakangania esyongeso mbuya?
6 Esyongeso Mbuya Sikahumulikanaya: Kundi thuli omwa buthuku obuli mw’abandu bangyi “abakayanza” n’erithendi tsomana eriyowa ly’abandi, ka kyanga humulikania eribya haghuma n’Abakrisitayo balikyethu abakanganaya esyongeso mbuya! (2 Tim. 3:2) Thukakanganaya esyongeso mbuya thuk’ingira ahali olhuhindano ithuna yithondekenie n’erihambira ab’omw’eka yethu b’omwanya, abathulyasa nabu kutse abigha bethu be Biblia abahya-bahya. Thukaghendera okwa busondoli bw’omwimaniri w’ekitsweka akabugha athi thw’ikale n’erihulikirira omuziki owakakyungulha. Kikakanganaya esyongeso mbuya erilhangira thuthi esyosimu syethu sisitabura abandu endegheka yikalholha embere. Kandi thukakanganaya esyongeso mbuya thwamathendi toka, erithumira abandi b’emyatsi okwa simu, kutse eritanga-tanga endegheka eyine mulholha embere.
7. Thwanga humulikanibwa thuthi n’erihumulikania abandi thukasangira haguma n’abalikyethu?
7 Eribya Haghuma n’Abandi Erikahumulikanaya: Olhuhindano lhukathuha akaghisa ak’eritsemera haghuma n’Abakrisitayo balikyethu. (Esy. 133:1-3) Busana naki iwuthalhangira wuthi wukakanaya n’abaghalha bethu n’abali bethu abakalhua omwa bindi bithunga? (2 Kor. 6:13) Wangana hira h’ekilhubirirwa eky’eriminya mundu mughuma kutse eka nguma obuli kiro. Erilhuhuka ery’erithungyi likathuha akaghisa ak’erikolha eki. Busana n’ekyo, heka endanda nuku wanga syalira ahali olhuhindano n’erisangira haghuma n’abalikyethu omwakanya k’erilhua ahali olhuhindano wukayasonderya ebyalya by’eyihya. Eki kyangana kuha omughisa ow’eribana abandi banywani babuya.
8. Busana naki thutholere ithwayihayo erikolha omubiiri okw’olhuhindano, kandi busana naki?
8 Ka kyanga humulikania erikolha haghuma n’abaramya balikyethu omwa mubiiri ow’abuyirire! Wangana yihayo eriwathikya akathongole kalebe kutse eriwathikya ekithunga kyenyu kyamahebwa omubiiri ow’eriyonza? (Esy. 110:3) Wamabya isiwathahebwa omubiiri ow’erikolha, hika okw’Akathongole Akakakolangana n’Omubiiri w’Eriyihayo okwa lhuhindano. Erikolera haghuma likaleka omubiiri inianguha kandi iniakolhwa n’obutseme.
9. Busana naki thutholere ithwalengekania okwa mighendere yethu n’emyambalire yethu omwa buthuku bw’olhuhindano?
9 Emighendere Yethu Yikatsemesaya Abakathulhangira: Omwa biro bisathu ebyosi eby’olhuhindano thuli bagheni, butsira okwa ndambi ey’endegheka nyisa. Abakathulhangira ithune omwa kitsweka ekiri mw’olhuhindano batholere ibalhangira embaghane eyiri ahakathi-kathi kethu n’abathe Bema. (1 Pet. 2:12) Emyambalire n’emiyipambire yethu ithune okw’olhuhindano, aha thukakesaya, n’omwa syohuteri bitholere ibyaha Yehova y’olhukengerwa. (1 Tim. 2:9, 10) Eryambalha esyobbaji likendi leka abakathulhangira ibaminya nga thuli bahi kandi obundi lyangana thuha akaghisa ak’eribabwira okw’olhuhindano n’eribaha obwema.
10. Ebyalholirweko ebikakanganaya ngoku obwema obuwene bukahebawa busana n’emighendere yethu ey’Ekikrisitayo ni byahi?
10 Emighendere yethu mibuya ithune okwa lhuhindano yikahamba yithi okw’abandi? Erikwamana n’omwatsi owabya omwa lhupapura lhw’amakuru, omwimaniri mughuma ow’omwanya ow’akabera erikolerwa mw’olhuhindano mwabugha athi: “Ni bandu ab’emibere mibuya. Thukatsema eribya nabu obuli mwaka.” Omwaka owahwa omundu oyuthe Mwema mwathalirya akasaho kiwe akakabika mw’esyosente omwa huteri eya abagheni b’olhuhindano bakakesayamu. Babere bakawathya omwimaniri w’ehuteri y’akasaho ako isimwathathalha n’ekindu n’ekighuma, mwabwira mwinyeko athi: “Ni kibuya indi Abema ba Yehova balhue bawithe olhuhindano hakuhi n’ehuteri eno, kandi abangyi balhue bakakesya muyo. Kubithabya bithya, siwanga banire akasaho ako.”
11. Olhuhindano lhune museghera hakuhi, ekilhubirirwa kyethu kitholere ikyabya kyahi, kandi busana na ki?
11 Olhuhindano lhw’omwaka ono lhune museghera hakuhi. Endambi n’akaghalha kangyi byabiri kolesibwa omw’ikolha endegheka n’eritheghekania olhuhindano. Lhangira wuthi kikabya kilhubirirwa kyawu erisyahindana okwa biro byosi bisathu, n’eriyitheghekera ebya Yehova n’ekithunga kiwe kyabiri thutheghekera. Lhangira wuthi wukahumulikanaya abandi omwa mighendere yawu mibuya, eribya haghuma n’abandi, n’emibere mibuya. Kwesi iwe n’abandi mwangana yowa ng’abaghenda okw’olhuhindano olhw’omwaka owahwere abahandika bathi, “Olhuhindano oyu mulhwa tsemesya kutsibu!”
[Eblabbu okwa lhupapura 4]
Ngoku thukana kolha, esyoyenga isathu olhuhindano lhwethu lhuthe lhwabya thukendi syasangira omw’ithererera ery’erikokya abandu
[Eblabbu okwa lhupapura 6]
Emyambalire n’emiyipambire yethu ithune okw’olhuhindano, aha thukakesaya, n’omwa syohuteri bitholere ibyaha Yehova y’olhukengerwa
[Eblabbu okwa lhupapura 7]
Lhangira wuthi wukahumulikanaya abandi omwa mighendere yawu mibuya, eribya haghuma n’abandi, n’emibere mibuya
[Akasanduko okwa lhupapura 4-7]
Eriyibukya Ebihambire Okw’olhuhindano Lhwe Disitrikiti Olhwa 2011
◼ Esyondambi esy’Endegheka: Ebiro byosi bisathu endegheka yikendi syabya yikatsuka 3:20. Abandu bakendi syatsuka erithangirirwa eritsuka saha 2:00. Omuziki akendi syabya akatsuka, ithwe abosi thutholere ithw’ikalha nuku endegheka yanga tsuka omwa mibere ey’erisikya. Kyakathano na Kyamukagha endegheka yikendi syahwamu 10:55 na Kyasande yikendi syahwamu 9:40.
◼ Ah’erimania Esyongumbaghali: Emyanya eyosi eyikabya kw’olhuhindano lhwethu kukabya ikune omwanya ow’erimania mw’esyongumbaghali okw’abo abanga tsuka eryasa. Abalema bangana tsomanwa kutsibu.
◼ Erihambira Abandi b’Omwanya: Wangana hambira abawulyasa nabu omwa matoka nguma kutse abamuli nabu omw’eka nguma b’omwanya w’er’ikalhamu, haghuma n’aba wuk’igha nabu lino e Biblia.—1 Kor. 13:5.
◼ Ebyalya eby’Erithungyi: Wukasabawa eriletha endanda ey’erilira aho omw’akanya k’erilhua ahali olhuhindano eriyarondya ebyalya okwa ndambi y’erilhuhuka. Sithutholere thukaheka omwa bindu ebyanga thulhangika.
◼ Erihayo: Thwangana kangania erisima lyethu omw’ithoghongerya omwa busanduko obuli omwa Kisenge ky’Obwami kutse okwa lhuhindano erisighika omubiiri ow’ekihugho kyosi.
◼ Obutandwa n’Erilhwalha Kitsumbukirania: Omundu amabana obutandwa kutse akalhwalha kitsumbukirania okwa lhuhindano, kisi manyisaya omuthangiriri oyuli hakuhi, oyukendi bwira akathunga akakakolangana okwa Bubalya Obwa Lhuba-lhuba nuku omundu oyuwasi eby’obubalya anga lebya emibere nga yiri yithi neryo anga muha obuwathikya. Kyamayithaghisibwa, oyukakolangana okwa by’obubalya akendi birikira ematoka eyikaheka abalhwere. Eki kikendi leka abandu bangyi ibathatherera abakakolangana kw’ebi b’esyosimu nyingyi.
◼ Omubatsi: Wamabya iwuwithe omubatsi mulebe owawukalya, lhangira wuthi wukasa n’owakaghunza kundi omubatsi ng’oyo syangabanika okwa lhuhindano.
◼ Ebiryathu: Obuli mwaka abandu bakahuthalha busana n’omulingo ow’ebiryathu ebya bambere. Omwakanya k’eriambalha ekiryathu ni kiryathu kutse ekikabya nga kya kiri okwa mulembe, ni kibuya eriambalha ekiryathu ekitholere kandi ekikuhikire ekikendi leka iwalyatha ndeke.
◼ Ebikakumba: Eyindi mihindano minene-minene yikabya omw’amanyumba awathe mw’embeho eyikaghunza. Busana n’ekyo, kyanganabya kibuya thwamathendi hakaba amalasi awakakumba kutsibu awanga tabura abandu abakwire amakoni muthina-muthina.—1 Kor. 10:24.
◼ Esyofomu esy’Erisondekania Abandu: Efomu eya Please Follow Up (S-43) yitholere iyakolesibwa erisakanga kw’omwatsi owahambire okw’abakanzisibawa busana n’eribathulira kitsumbukirania okwa buthuku obw’olhuhindano. Abathuliri batholere ibaletha efomu nguma kutse ibiri okwa lhuhindano. Esyofomu esya wabirisulirirya wangana sihererya Akathongole ak’Ebitabu kutse iwasiha omusakangyi w’ekithunga kyawu.—Lebaya olhupapura olhw’Omubiiri Wethu ow’Obwami olhwa Novemba 2009, olhup. 4.
◼ Ah’erighulira eby’Erirya: Leka emibere yawu mibuya yihe erina lya Yehova ly’olhukengerwa omwa myanya ng’eyi.
◼ Esyohuteri:
(1) Si wuhambe ebisenge binene ebya wuthendi kolesya, kandi omwa kisenge simubye bandu banene kwilhaba abakayithaghisibawamu.
(2) Wamabya isiwendi thasya kolesya ekisenge, sangwa wa bwira abinye huteri omwa byalhuba.—Mt. 5:37.
(3) Thwalha akagali ak’eriheka kw’ebindu wamabya kwenene iwukanza erikakolesya, kandi kasubulhaye lhuba nuku abandi banga kakolesya.
(4) Si wutsumbire omwa bisenge ebithahamulirwe eritsumbirwamu.
(5) Sighira abakathegha-theghanaya ekisenge kyawu kutse abakakuhekera ebindu b’akasimo.
(6) Siwimaye ebyalya bingyi kwilhaba ebya wutholere erimya ebikahebawa abagheni omwa huteri okwa ky’engyakya.
(7) Kanganaya emikolere eyikalhua okw’omulimu wukakolangana n’ab’ehuteri okwa buli ndambi yosi. Bakalabirira abagheni bangyi neryo bakasima thwama bakangania olhwanzo, erighumisirizya, n’obuyitheghererya.
(8) Hamabanika ekitsibu omwa kisenge kyawu eky’ehuteri, bwira Akathongole akakakolangana okwa eby’ah’Erikesya.
◼ Omubiiri ow’Eriyihayo: Etseme eyathukabana busana n’erihindana okwa lhuhindano yikendi syongera kutsibu thukayihayo eriwathikya omwa mibiiri eyikayithaghisaya eriyihayo. (Emib. 20:35) Omundu wosi-wosi oyuwanzire erikolha ekyo atholere iniahika okw’Akathongole ak’Omubiiri ow’Eriyihayo okwa lhuhindano. Abaana abali ahisi sy’emyaka 16 nabu bangana bawathikya omw’ikolha n’ababuthi kutse owundi mundu oyutholere amabasondolha.
[Akasanduko okwa lhupapura 5]
Thukendi Syaghaba Thuthi Ehipapura hy’Erikokya?
Erithoka erighunza obulhambu bwethu, thutholere ithwakania bike. Thwangana bugha thuthi: “Wabukire. Thukasangira omwa mubiiri owakakolhawa omwa kihugho kyosi ow’erighaba akapapura ak’erikokya kano. Kano ka kawu. Omwatsi owalhabire aho wukendi banagho okwa kapapura kano.” Akapapura ak’erikokya kakolirwe omwa nzira ey’erileka abandu banze erik’imya, busana n’ekyo, kahe omwinye nyumba nuku angalhangira ebiri embere. Kanaya iwuna huha-huhene. Wukasangira omwa mubiiri ow’erighaba ehipapura okwa wikendi, n’esyogazeti nasyo sitholere isyaghabwa kyamabya ikyangana thokekana.