Wangan’ibuka?

Wunewasoma ndeke esyogazeti sy’Akaleberyo esy’omwaka ono? Thalebyanu nga wangana subirya okwa bibulyo bino:

Eribya ‘n’obulengekania buhya-buhya’ mwamuliki? (Abar. 12:2)

Eki sikirisubulira okw’ikolha ebindu ebyuwene buyira. Mwamuli erilebya ndeke omundu wethu w’omwakathi n’erikolha esyombinduka esikayithaghisibawa nuku thuhambanaye engebe yethu n’ebihano bya Yehova ngoku thwanga thoka.—w23.01, olhup. 8-9.

Thwanga kolhaki nuku sithughemere lhuhandi lhughuma thukalebya ebikabya omwa kihugho?

Thwanzire ithwalebya ebikabya omo kihugho munabwire nga bikaberereraya bithi amaminyereri we Biblia. Omwakanya k’eriteberezya, ekindu ekyangana leka ihabulha obughuma, thukakolha ndeke thukaseghemerya ebyo thukabugha okwa ebyo ekithunga kya Yehova kikahulhukaya. (1 Kor. 1:10)—w23.02, olhup. 16.

Olhubatizo lhwa Yesu lhuli lhuthi mbaghane okwa lhw’abigha biwe?

Abuthawa omwa kihanda ekiyihereyo oku Nyamuhanga, Yesu syabya akayithagha eriyihayo oku Yehova ngoku ithwe thukakolha. Yesu aby’ahikene, isyawithe kibi. Syabya akayithagha eriyisubamo.—w23.03, olhup. 5.

Thwanga wathikya thuthi abandi erisubirya okwa mihindano?

Thwangana subirya omwa bikuhi, nuku n’abandi nabu basubiraye. Kandi thwangana yihighulha okw’ibugha esyonzumwa nyingyi. Neryo ithukendi leka n’abandi ibabana eby’eribugha.—w23.04, olhup. 23.

“Embalhu y’eribuyirire” eyiri omu Isaya 35:8 yikamanyisayaki?

Erimbere enzira nene ey’omusyo eyi yabya yikamanyisya enzira y’Abayuda eyabya yikalhua e Babeli eriya ewabu. Kandi ibbwa omwa buthuku obwa lino-lino? Ahabw’ebighana bingyi ebyakolhaya oko mwaka 1919, omubiiri w’eritheghekania mwakolhwa—erihindulha n’eriprintinga esyo Biblia, eryongera okwa bindi bindu. Abandu ba Nyamuhanga babiribya ibanemulendera omwa “mbalhu y’eribuyirire” eriya omwa paradiso y’obunyakirimu, eyikakolhaya okwa mighisa y’Obwami.—w23.05, olhup. 15-19.

N’ihabulha lyahi eriri omwa Emisyo sura 9 erihambire oko bakali babiri ab’omusyo?

Emisyo yikakanaya okwa “mukali mukiru” oyo erikokya liwe likakolhaya “Ekulimu” n’okwa “menge” w’okwenene, awakanibweko ng’omukali, oyo erikokya liwe likakolhaya “omo nzira y’obwowika” n’engebe. (Emi. 9:1, 6, 13, 18)—w23.06, olhup. 22-24.

Eriyikehya n’obuyitheghererya bwa Nyamuhanga mubyalhangirika bithi akakolongana na Loti?

Yehova mwalhaghira Loti athi athibithe alhue e Sodomo asaghire okwa bithwe. Loti abere akayilemba-lemba athi alighirawe erithibitha e Zoari, Nyamuhanga mwaligha erisaba liwe.—w23.07, olhup. 21.

Omukali angakolhaki omwanze wiwe amabya akalebya eponografe?

Atholere in’ibuka ngoku si w’eritsweba. Atholere iniahwerya amalengekania okwa bughuma bwiwe na Nyamuhanga n’erighanirya oko myatsi ye Biblia ey’abakali ababya bawithe amaghaniryo ababana erihumulikana omw’iyo. Angana wathikya mwira wiwe eriyihighulha okwa mibere eyanga leka inialengwako.—w23.08, olhup. 14-17.

Thwamahakanisibwa busana n’ebya thwikirirye, amenge angathuwathikya athi eribya ithune bolho?

Thukalhangira ekibulyo kutse erihakanisya ng’enzira y’eriminyiramo eby’omundu oyo akalengekanayako kutse ebyo atsomene. Neryo thukathoka erisubirya omwa bwolho.—w23.09, olhup. 17.

Thwang’ighaki oku Maria bikahika okw’ibana akaghalha?

Abere aminya ngoku angabere mama wa Masiya, Maria mwabana akaghalha erilhua okwa bandi. Gabrieli na Elizabeti mubahumulikania Maria omw’ikolesya Amasako. Nethu thwangana bana akaghalha erilhua oko balikyethu.—w23.10, olhup. 15.

Yehova angana subirya athi emisabe yethu?

Akayilhagha erihulikirira emisabe yethu kandi akalebaya nga yinahambene n’ekighendererwa kiwe. (Yer. 29:12) Angana subirya omwa nzira muthina-muthina emisabe y’abandu abalyasaba ebisosene, aliwe mughulhu wosi akendi thuwathikya.—w23.11, olhup. 21-22.

Abanya Roma 5:2 hakahulha “amaha,” neryo busana naki iniathasyakanibwako omwa mulhondo 4?

Omundu akabya abiriowa engulhu yuwene, anganabya n’amaha w’eritsemera engebe okwa kihugho paradiso. Aliwe akabya akabana amalighe, akayiyiniryagho, n’erilhangira ngoku Nyamuhanga akamusima, amaha wiwe iniangan’ongera erighuma kandi iniongera erilhangiragho mwa w’okwenene.—w23.12, olhup. 12-13.