Erisomo 4
Diabolo Nindi?
Sitani Diabolo—alhwa hayi? (1, 2)
Sitani akathebatheba abandu bathi? (3-7)
Busananaki utholere erirwanisya Diabolo? (7)
1. Ekinywa “diabolo” kikamanyisaya omundu oyukathulha amabehi mabi okwo wundi mundu. “Sitani” kikamanyisaya enzighu kutse omuhakani. Ebinywa bino bikakolesibawa okwa nzighu mukulhu wa Yehova. Okwa nzuko abya mumalaika oyuhikene inyikere omwa lhubulha na Yehova. Aliriryo enyuma waho mwayirengekania ko kutsibu neryo mwanza eriramya eryangahebwa Yehova musa libye liwe.—Matayo 4:8-10.
2. Omumalaika ono, Sitani, mwabugha na Eva erilhabira omwa nzoka. Akamubwira amabehi, mwaleka inyathasikya Yehova. Omwa nzira eyi, Sitani muyaghaya ekikahulhawa “mw’obuthabale,” kutse ekitsumbi kiwe iyo ngo owe Ndatha Kutsibu. Sitani muyalethaho erihangyahangya kwenene Yehova ng’akanathabalha omonzira eyitholere kandi busana n’obubuya obwabo ab’akathabalha. Sitani kandi mwaletha erihangyahangya ngahanasyabya mundu wasyabya muyisiwa eyiri Yehova. Erikolha athya, Sitani mwayiyira mwa nzighu ya Yehova. Kyakireka inyahulhwa mwa Sitani Diabolo.—Enzuko 3:1-5; Yobu 1:8-11; Eribisulirwa 12:9.
3. E Sitani yikalengaho erithebya abandu, baramaye yo. (2 Abanya Korinto 11:3, 14) Enzira nguma ey’akathebera mw’abandu wa madini aw’amabehi. Kundi edini yamakangirirya amabehi oku Yehova, kwenene iyamaberererya ebighendererwa bya Sitani. (Yoane 8:44) Abo abali omwa madini w’amabehi banganikirirya ndeke-ndeke bathi banamuramya Yehova ow’ekwenene. Aliriryo bakabya kwenene ibakakolera Sitani. Iyo ya ‘nyamuhanga ow’ekihugho kino.’—2 Abanya Korinto 4:4.
4. Ebya Obulhaghuli y’enzira yindi eya Sitani yikahirira abandu b’ahisi h’akaghalha kayo. Bangana saba abalimu eribatsunga, erihuthalya abandi, erilhaghulha ebyasyabyaho emighulhu eyikasa, kutse n’erikolha ebithikothiko. Sitani ya kaghalha kabi akali enyuma w’ebikakolhawa ebi ebyosi. Eritsemesya Yehova, sithutholere thukakolha kyosi ekihambene n’ebyobulhaghuli.—Eryibuka Ebihano 18:10-12; Emibiri 19:18, 19.
5. Kandi Sitani yikathebaya abandu erilhabira omw’iyipanga kutsibu omwa rangi yebihanda kandi n’eriramya ery’ebithunga by’ekithabale. Abaghuma bakayowa nga ekithunga kutse ekihanda kyabo nga kirengire eky’abandi. Aliriryo kino sikwenene. (Emibiri 10:34, 35) Ibo abandi bathungerere ebithunga by’obuthabale erighunzaho ebitsibu by’abandu. Erikolha bathya, bakabya ibakaghana Obwami bwa Yehova. Ibwo busa bwabwa syaghunzaho ebitsibu byethu.—Danieli 2:44.
6. Eyindi mibere eya Sitani yikatheberaya mw’abandu ly’eribalengako n’esyongumbu nyibi. Yehova akathubwira athi thuyihighule okw’ikolha ebindu bibi kusangwa anasi kubyangathukolha nabi. (Abanya Galatia 6:7, 8) Abandi bandu bang’ananza bathi wuyitsungire nabo omwikolha ebindu ngebi. Wibuke, lino, indi kwenene oyukaghonzaya ukole ebindu bino ni Sitani.—1 Abanya Korinto 6:9, 10; 15:33.
7. Sitani angana kolesya eryendereribwa kutse erikughania wangalhwa oku Yehova. Abaghuma b’okw’abanze baghu bangana hithana kutsibu kusangwa wuk’igha e Biblia. Abandi bangana kusekerera. Aliriryo nindi oyo wakuha engebe eyawuwithe? E Sitani yanzire erikuubahisya neryo wulekere aho ery’igha oku Yehova. Siwikiriraye Sitani yika kusinga! (Matayo 10:34-39; 1 Petero 5:8, 9) Wamarwanisirya ighuma Diabolo, wanganatsemesya Yehova n’erikangania ko wukasemba Obuthabale Bwiwe.—Emisyo 27:11.
[Ebisasani okwa lhupapura 9]
Edini yamabehi, ebyobulhaghuli n’eriyipanga busana nerihanga bikathebaya abandu
[Ekisasani okwa lhupapura 9]
Wughane Sitani wukalholya emuliro n’er’igha ku Yehova