Erisomo 7

Eriyithunda Hakuhi na Yehova omw’Isaba

Busananaki niky’omubongo erisaba obuthumbya? (1)

Thutholere ithwasaba ndi, kandi thuthi? (2, 3)

Ni bindu ki ebya thutholere erisaba? (4)

Utholere iwasaba di? (5, 6)

Yehova akanahulikirira emisabe yosi? (7)

1. Erisaba ly’erikania na Yehova omw’iyibombeka. Wutholere iwasaba ku Yehova obuthumbya. Imwawukendiyowa ngawuli hakuhi nayu ngokwa wukabya eyiri omunywani wawu kundu. Yehova nimukulhu kutsibu kandi niwa kaghalha, aliriryo akahulikirira erisaba lyethu! Wukana saba Yehova obuthumbya?—Esyonyimbo 65:2; 1 Abanya Tesalonika 5:17.

2. Erisaba nikitsweka kyokwa miramirye yethu. Lithy, thutholere ithwa saba Omuhangiki, Yehova musa. Omughulhu Yesu abya okwa kihugho, endambi nyingi inyakasaba eyiri Thatha wiwe butsira okwa wundi mundu. Nethu thutholere erikolha thuthya. (Matayo 4:10; 6:9) Aliriryo, erisaba lyethu lyosi litholere iryalhaba omwa lina lya Yesu. Kino kikakanganaya kithi thukaha Yesu ye kitsumbi kiwe kandi n’erikirirya omwa mbanulho yiwe ey’eriyihonga.—Yoane 14:6; 1 Yoane 2:1, 2.

3. Omughulhu thukasaba anguli ithwakania na Yehova ebikalhwa omwa muthima wethu. Isithwasaba ebyo ebya thwabirihambira omo muthwe kutse erisoma busome erilhwa omwa kitabu ky’erisaba. (Matayo 6:7, 8) Thwanganasabira omwa mibere yosi eyathwangabyamo yamabya iyanganaha erisikya, okwa ndambi yosi, kandi omwa mwanya wosi wosi. Yehova akowa n’ebyathukasaba omwa muthima wethu ithunahunire. (1 Samweli 1:12, 13) Kyowene erisondya omwanya owa hunerere ahathe bandi bandu omughulhu thukayisabira ithwe ithwibene-bene.—Mariko 1:35.

4. Nibindu ki ebya thwangasaba? Ekyosi kyosi ekyanganahamba okwa bunywani obwa wuwithe nayu. (Abanya Filipi 4:6, 7) Erisaba ely’erighirako likakanganaya lithi anguli ithwasaba ebihambene n’erina lya Yehova n’ebighendererwa biwe. Kandi ithwanganasaba athuhe ebiyithawa byethu ebyomubiri, athughanyire amalholho ethu, n’erithuwathikya sithulengaweko. (Matayo 6:9-13) Omwa musabe wethu isithwabya aba kayitsomana ithwibenebene. Anguli ithwasaba ebyo bisa ebihikene n’erisonda lya Yehova.—1 Yoane 5:14.

5. Wanganasaba buli ndambi yowukowiramu omuthima wawu amanza erisima kutse eripipa Yehova. (1 Emyatsi y’Emigulu 29:10-13) Anguli iwasaba omughulhu wukabana ebitsibu n’erikirirya lyaghu lyamabya irikalengawako. (Esyonyimbo 55:22; 120:1) Kitholere erisaba wuthali walya ebyalya. (Matayo 14:19) Yehova akathukokaya erisaba ‘mughulhu wosi.’—Abanya Efeso 6:18.

6. Kutsibu-tsibu thukayithagha ithwasaba thwamabya ithwabirikolha erilholho linene. Eyo y’endambi yerisabira mw’erighanyira lya Yehova n’olhukeri lhwiwe. Thwamathulhagho amalholho ethu eyali neryo thukakolha ekyosi-kyosi erithendisubiragho, Yehova ‘akanguha erighanyira.’—Esyonyimbo 86:5; Emisyo 28:13.

7. Yehova akahulikirira erisaba ly’abandu abathunganene basa. Emisabe yaghu eryowibwa na Yehova, anguli iwalengaho erighendera okwa bihano biwe. (Emisyo 15:29; 28:9) Kandi anguli iwayikehya omughulhu wukasaba. (Luka 18:9-14) Wukayithagha erikolha okwekyo ekya wukasaba. Obo imwa wukendikangania wuthi wuwithe erikirirya kandi kwenene wukamanyisaya ebyaghukabugha. Aho na Yehova imwa kendisubirya emisabe yaghu.—Abaebrania 11:6.