Esura Makumi Abiri

Wubye Iwune Mulengekania Okwa Kiro kya Yehova

1. Wabere wabir’igha ngoku erilhamibwa okwa bitsibu eby’omughulhu mubi ono kwa liri hakuhi, muwayowa wuthi?

EKIGHUMA okwa bindu ebya watsuka erigha omwa Biblia ky’ekighendererwa kya Yehova eky’erikolha ekihugho kyosi mwa paradiso. Omwa kihugho kihya-kihya ekyo simwendi syaswabya, esyonyuhi, erithwa ebilhaghiro, obusama, amalhwere, eriaghalhwa, n’olhuholho. Nibya n’ababiriholha bakendi syalhubuka. Aya ka ni maha mabuyanga! Ekikakanganaya ngoku emilhaghe eyi yiri hakuhi-kuhi bw’obwema obukakanganaya ngoku Kristo atsuka erithabalha ng’Omwami omwa buthalhangirika omw’omwaka wa 1914, kandi ebiro by’enyuma-nyuma eby’omughulhu mubi ono ngoku byatsuka omw’omwaka oyo. Ebiro by’enyuma-nyuma bino bikendibya bikahwa, Yehova akendi thoghothya omughulhu mubi ono neryo inialetha ekihugho kihya-kihya eky’alhagha!

2. “Ekiro ky’Omukama [Yehova]” niki?

² E Biblia yikahulha ekiro ky’erithoghothya ekikayasa mwa “ekiro ky’Omukama [Yehova].” (2 Petero 3:10) ‘Ky’ekiro ky’erihithana ly’Omwami Mukulhu’ okwa kihugho kyosi ekya Sitani. (Zefania 2:3) Ekiro ekyo kikendi syahwererera “omw’amalhwa w’ekiro kinene kya Nyamuhanga Omuthoki w’Ebyosi . . . , [ekikahulhawa] omwa Kihebrania mwa Harmagedoni,” aho “abami b’ekihugho kyosi” basya thoghothibirwa. (Eribisulirwa 16:14, 16) Emibere y’engebe yawu yikana kanganaya indi w’ikirirye ngoku “ekiro . . . ky’Omwami Mukulhu” kiri hakuhi?​—Zefania 1:14-18; Yeremia 25:33.

3. (a) Ekiro kya Yehova kikendi asa mughulhu wahi? (b) Yehova erithendi thubisulira “ekiro ekyo kutse endambi eyo” kyabiribya ky’omughaso omu nzira ki?

³ E Biblia siyiri thubwira ekiro ekyo nyine-nyine ekya Yesu Kristo akendi syasiramu ng’Omutsweri oyo Yehova akendi syakolesya erithoghothya omughulhu mubi ono owa Sitani. Yesu mwabugha athi, “Sihali mundu oyo wasi erihika ly’ekiro ekyo kutse endambi eyo n’omubangabya abamalaika omwa lhubulha kutse Omughalha, nina Thatha yunasi iyuwene.” (Mariko 13:32) Hamabya abathanzire Yehova, ibakendibya n’amalengekania aw’eribugha indi ekiro ekyo sikiri kya yaberya neryo ibatsuka erirondekania ebindu by’ekihugho. Aliriryo abanzire Yehova bakendi mukolera n’omuthima wosi, n’omubangabya isibasi ekiro ekye enduli y’omughulhu mubi ono yikendi asiramu.​—Esyonyimbo 37:4; 1 Yoane 5:3.

4. Yesu mwakunga athiki?

⁴ Yesu mwakunga abanzire Yehova akabugha athi: “Mutheghaye, mulebaye, kusangwa simwasi omughulhu oyo nga ni wahi.” (Mariko 13:33-37) Akathuhana athi erirya n’erinywa kutse ‘amaghaniryo w’engebe’ sibithalhaye amalengekania wethu neryo thukaleka eritsomana omughulhu owathulimu ngali athi.​—Luka 21:34-36; Matayo 24:37-42.

5. Ngoku Petero asoborera, ekiro kya Yehova kikendi syaletha ki?

⁵ Kuthya, Petero nayu akathuhana athi thubye ithune mulengekania okwa “erihika ly’ekiro kya Nyamuhanga. Okwa kiro ekyo, olhubulha lhwasyahisibwa n’erihera, n’ebyahangikawa omwa lhubulha byasyanuna omwa muliro akalire.” Amathabali wosi w’abandu ni bugha ambu “olhubulha” kuthya n’ekithunga ky’abandu abosi ababi ni bugha ambu “ekihugho,” haghuma “n’ebyosi” ni bugha ambu amalengekania n’emibiiri mibi y’ekihugho kino ng’emibere yakyo ey’eriyighabulha oku Nyamuhanga, obutswatswa n’erirondekania ebindu bya kutsibu, byasya thoghothibwa. “Olhubulha lhuhya-lhuhya [Obwami bwa Nyamuhanga obw’elhubulha] n’ekihugho kihya-kihya [ekithunga kihya-kihya eky’abandu abakendi syabya okwa kihugho]” aho “ekithunganene kikasiba” bikendi syasuba omwa mwanya wabyo. (2 Petero 3:10-13) Emyatsi eyi eyikendi syabindulha ekihugho yikendi syatsuka kitsumbukirania kandi okwa kiro kutse endambi eyithayitsulirwe.​—Matayo 24:44.

Thungerera Ndeke Emyatsi Eyihambire Okwa Kiminyikalho Yikabererera

6. (a) Ekya Yesu asubiraya okwa kibulyo eky’abigha biwe mukya bererera okwa lhulengo lhungahi okwa nduli ey’omughulhu w’Abayuda? (b) Ni byahi okwa ebya Yesu asubiraya ebihambire okwa myatsi n’emibere eyikabererera eritsuka omw’omwaka wa 1914 erilholya embere?

⁶ Erikwamana n’ebiro ebya thulimu, thutholere ithwaminya ndeke-ndeke emyatsi eyihambire okwa kiminyikalho ekikakanganaya ebiro by’enyuma-nyuma​—“erihwererera ly’emighulhu.” Wibuke indi omughulhu Yesu asubiraya ekibulyo eky’abigha biwe, ekisakangire omu Matayo 24:3, ebighuma by’okwa myatsi eyakanaya omwa mulhondo owa 4 erihika okwa wa 22 mubya bererera okwa lhulengo lhuke omwa mughulhu w’Abayuda eritsuka omw’omwaka owa 33 erihika owa 70 C.E. Aliriryo eribererera ly’obuminyereri omwa buswire litsukire omw’omwaka wa 1914, obuthuku ‘bw’erihika’ lya Kristo ‘n’obw’erihwererera ly’emighulhu.’ Matayo 24:23-28 hakathubwira okwa byangabere erilhua omw’omwaka wa 70 C.E. erihika omwa buthuku bw’erihika lya Kristo. Emyatsi eyikakanibawa omu Matayo 24:29–25:46 yine mubya omwa buthuku bw’enduli.

7. (a) Busana naki thutholere ithwa yitheya okwa mibere eyiriho munabwire ngoku yikaberereraya ekiminyikalho? (b) Subiraya okwa bibulyo ebiri ahikwa okwa katsweka kano, erikakangania ngoku ekiminyikalho kyabiri bererera erilhua omw’omwaka owa 1914.

⁷ Ithwe ahabw’ethu thutholere ithwayitheghererya ndeke emyatsi n’emibere eyikaberereraya ekiminyikalho. Erihambania emyatsi eyi n’obuminyereri bwe Biblia kikendi thuwathikya eribya ithune mulengekania okwa kiro kya Yehova. Kandi kikendi thuwathikya erikunga abandi ngoku ekiro ekyo kiri hakuhi-kuhi. (Isaya 61:1, 2) Thune mulengekania okwa myatsi eyi, thughaniraye okwa bibulyo ebikwamireko bino ebikahira omuwathu w’okwa myatsi eyihambire okwa kiminyikalho, ngoku kisakangire omu Matayo 24:7 na Luka 21:10, 11.

Obuminyereri obuhambire okwa ‘kihanda erilhwa n’ekindi kihanda, n’obwami erilhwa n’obundi bwami’ mubwa bererera omwa nzira yahi ey’eriswekya eritsuka-tsukana n’omwaka wa 1914? Erikwamana n’esyonyuhi, ekyabiribya erihika munabwire ni kyahi?

Omw’omwaka wa 1918, ni bukoni bwahi obw’itha abandu kwilhaba abakwa omwa Lhuhi lhw’Erimbere olhw’Ekihugho kyosi? Nomwakine indi abandu babirikulha-kulhana omwa by’emibatsi, ni malhwere wahi awakin’itha obukekulhu n’obukekulhu bw’abandu?

Nomwakine indi abandu babikulha-kulha omwa by’esayansi omwa kighonye ekihwere, enzalha muyanubya abandu erihika okwa lhulengo lhungahi?

Ni kyahi ekikaleka iwakakasya wuthi 2 Timoteo 3:1-5, 13 sihali kanaya ngoku emibere y’engebe yine ngoku yanabya kera, aliriryo hakakanaya ngoku emibere mibi yikongera eribya mibi kutsibu thukayahika okwa nduli ey’ebiro by’enyuma-nyuma bino?

Erighabulhwa ly’Abandu

8. (a) Ni kindi kindu kyahi ekikakanibawako omu Matayo 13:24-30, 36-43, ekya Yesu asosekanaya n’erihwererera ly’emighulhu? (b) Omusyo wa Yesu akamanyisayaki?

⁸ Yesu mwakania okwa yindi myatsi mikulhu-mikulhu eyihambangene n’erihwererera ly’emighulhu. Omughuma okwa myatsi eyi ly’erighabulha “abaana b’obwami” erilhua omwa “abaana b’omubi.” Yesu mwakangania eki akakania omusyo wiwe owahambire okw’irima ery’engano erye enzighu yabiba mw’ebithi. “Engano” omwa musyo wiwe yikimanira Abakrisitayo ab’ekwenene abahakabibwa. “Ebithi” bik’imanira abandu abakayahulha mw’Abakrisitayo aliriryo ibayikangania ‘ng’abaana b’omubi’ kundi bakakwama-kwamanaya emibere y’ekihugho ekikathabalhawa na Diabolo. Abandu aba bakaghabulhawa omwa “abaana ba [Nyamuhanga] ab’obwami” kandi bali kw’akaminyikalho ak’erithoghothibwa. (Matayo 13:24-30, 36-43) Mbwino erighabulhwa eri lyabiribya?

9. (a) Olhuhi lhw’Erimbere olhw’Ekihugho kyosi lhwabere lhwahwa, abosi ababya bakayahulha mw’Abakrisitayo mubaghabulhwa bathi? (b) Abakrisitayo abahakabibwa mubakangania bathi ngoku ni baghombe ab’ekwenene ab’Obwami?

⁹ Olhuhi lhw’Erimbere olhw’Ekihugho kyosi lhwabere lhwahwa, abosi abakayahulha mw’Abakrisitayo mubaghabanisibwa mw’ebithunga bibiri: (1) Abakulhu b’amadini aw’akayahulha mwa w’Ekikrisitayo n’abalembya babu, abakayikanganaya ng’abakasighika ekithunga ky’Eriyitherana ly’Ebihanda (lino bw’Obughuma bw’Ebihanda) kandi ibane musighika ebihanda byabu, na (2) Abakrisitayo ab’ekwenene ababyaho enyuma w’olhuhi olho, abasighika Obwami bwa Nyamuhanga obw’Ekimasiya, butsira ebihanda by’ekihugho kino. (Yoane 17:16) Aba mubayikangania ngoku ni baghombe ab’ekwenene ab’Obwami bwa Nyamuhanga bakathulhughania “engulhu yuwene y’Obwami eyi” omwa kihugho kyosi. (Matayo 24:14) Ekyabya kya lhwiririremu ni kyahi?

10. Ekyatsuka erilhwiririra omwa mubiiri w’erithulira Obwami ni kyahi?

¹⁰ Erimbere, muhabya erihindania emisighalira ey’okw’abahakabibawa n’omulimu wa Nyamuhanga, abawithe amaha w’eribya na Kristo omwa b’Obwami bw’elhubulha. Nomwakine indi abandu aba babya bayitsatsangire omwa bihanda bingyi, mubalethwa omwa kithunga eky’obughuma. Omubiiri w’erihira okw’abahakabibwa kw’akaminyikalho akisiya iniahwa.​—Eribisulirwa 7:3, 4.

11. (a) Ni mubiiri wahi ow’erihindanibwa owane mulholha embere, kandi akasighikira okwa buminyereri bwahi? (b) Eribererera ly’obuminyereri obu likamanyisaya ki?

¹¹ Enyuma waho, omwisi sy’obusondoli bwa Kristo, erihindanibwa erye “endeko nene . . . eyi[ka]lhua okwa buli kithunga n’ebihanda byosi, n’abandu bosi, n’emibughe yosi” mulyatsuka. Aba ‘sy’esindi mbuli’ abakendi syalhama ‘eriendererya linene’ n’eringira omwa kihugho kihya-kihya kya Nyamuhanga. (Eribisulirwa 7:9, 14; Yoane 10:16) Omubiiri w’erithulhughania Obwami bwa Nyamuhanga ono ane mulholha embere erithulibwa erihika aha enduli yikendi asira. Omwa buthaleghulha, omughanzo w’abandu ab’endeko nene ey’esindi mbuli owamabiri kanyirira munabwire, bakawathikaya emisighalira y’okw’abahakabibwa erithulha omwatsi w’Obwami. Omwatsi oyu ane muthulhughanibwa omwa bihanda byosi.

Ebikayabya Omwa Buthuku Obukayasa Nibyahi?

12. Omubiiri w’erithulhughania akendi kolhwa erihika okwa lhulengo lhungahi ekiro kya Yehova kithe kyahika?

¹² Ebyosi ebiryakanibawako ahandatha aha bikakanganaya ngoku enduli y’ebiro by’enyuma-nyuma yiri hakuhi kandi bikakanganaya ngoku ekiro kya Yehova kiri hakuhi-kuhi. Mbwino, hakine awandi maminyereri awakendi tsuka eribererera ekiro kinene eky’eryubahya kithe kyatsuka? Ee. Ahabw’ekindu kighuma, erighabulhwa ly’abandu erikwamana n’omwatsi w’Obwami siriri lyahwa. Omwa bindi bitsweka ebyabya mw’erihakanisibwa erikalire ahabw’emyaka mingyi, lino abigha bahya-bahya bak’ongera eribanikamu. N’omwa bitsweka omuli abandu abakaghana engulhu yuwene, Yehova ane mukangania olhukogho lhwiwe thukabathulira engulhu. Busana n’ekyo, ongera erikolha omubiiri oyu! Yesu akathughumaya athi omubiiri akendibya akahwa, n’enduli iyahika.

13. Ngoku kisakangire omwa 1 Abanya Tesalonika 5:2, 3, ni kindu ki eky’omughaso ekikayabya, kandi kikendi syamanyisya ki okw’ithwe?

¹³ N’obundi buminyereri bw’omubongo obuli omwa Biblia bukalhaghulha buthi: “Omughulhu abandu bakabugha bathi, hali ‘obuholho n’eriyisyandira,’ neryo-neryo erithoghothya lyasithabo! Nabu sibendi syabalha n’ahake, lyasyahika ng’erikunda erikahika okw’omukali.” (1 Abanya Tesalonika 5:2, 3) Thulindirire erilhangira ngoku erithulhagho ‘ery’obuholho n’eriyisyandira’ likendi syakolhwa. Aliriryo sikyendi syamanyisya kithi abathabali b’ekihugho bamabiri ghunza ebitsibu ebyosi eby’abandu. Abakabya ibane mulengekania okwa kiro kya Yehova sibendi syathebibwa n’erithulhughania eryo. Bakyasi ngoku ekyo kikendi syabya kyanabiribya, erithoghothibwa ery’ekitsumbukirania iryasa.

14. Ni myatsi ki eyikendi syakoleka omwa buthuku bw’obulighe bunene, kandi yikendi syathondekana yithi?

¹⁴ Okw’itsuka-tsukana ly’obulighe bunene, abathabali bakendi syabindukira n’erithoghothya Babeli Mukulhu, obuthabali bw’amadini w’amabehi obw’ekihugho kyosi. (Matayo 24:21; Eribisulirwa 17:15, 16) Enyuma w’ekyo, ebihanda bya syabindukira abakasighika obuthabali bwa Yehova, ikyaleka Yehova iniahithana okw’amathabali w’ekihugho n’abakasighika gho, n’erighunzerera iniabathoghothya kundu. Obulighe bunene bukendi syahwererera okwa kiro kye Harmagedoni. Neryo, Sitani n’esyombinga siwe bakendi syaboherwa omwa buhya obuthawithe kabunu, nuku sibathoke erithasya theba abandu. Eki ky’ekikendi syaluma ekiro kya Yehova, omughulhu erina liwe likendi syapipwa.​—Ezekieli 38:18, 22, 23; Eribisulirwa 19:11–20:3.

15. Busana naki sikyangabya ky’amenge erilengekania thuthi ekiro kya Yehova kikine hali?

¹⁵ Enduli ey’omughulhu ono yikendi syasa okwa buthuku obwo nyine-nyine, erisighikira n’endegheka ya Nyamuhanga. Sibwendi syamalha. (Habakuki 2:3) Wibuke, erithoghothya lye Yerusalemu omw’omwaka we 70 C.E. mulyasa lhuba, omughulhu Abayuda babya isi bayitheghekire bathi lyangasa, omughulhu balengekanaya bathi akabi kabirilhaba. Kandi ibbwa e Babeli eyakera? Abya muyi w’akaghalha, owawithe obuholho, kandi owawithe esyombimbo esighumire. Aliriryo mwawa omw’ithumbi ighuma. Kuthya, erithoghothya ery’ekitsumbukirania likendi hika okwa mughulhu mubi ono. Likendibya lyasa, ka lithusangane ithune omwa bughuma bw’eriramya ly’ekwenene, ithune mulengekania okwa kiro kya Yehova.

Eby’Eriyibukya

• Busana naki ni kikulhu eribya ithune mulengekania okwa kiro kya Yehova? Thwangakolha ekyo kya thuthi?

• Ithwe ahabw’ethu thukahambawako thuthi n’omwatsi w’erighabulha abandu owane mukolhwa munabwire?

• Ekiro kya Yehova kithe kya tsuka, ni kyahi ekikine embere? Busana n’ekyo, thutholere ithwabya ithune mukolha ki?

[Ekisasani okwa lhupapura 180, 181]

Omwa biro ebithe byahali ebiro by’enduli bikendi hwa, omughulhu wa Sitani akahwaho