Omughombe Oyuthaleghulha n’ow’Amenge Nindi?

Buthuku buke Yesu iniakisiya iniaholha, mwakania n’abigha biwe bbani ahathe bandu—iya Petero, Yakobo, Yoane, na Anderea. Yesu abere anemukania okwa kiminyikalho eky’erihika liwe omwa biro by’enyuma-nyuma, mwabulya ekibulyo kikulhu kino: “Omughombe oyutheleghulha n’ow’amenge nindi kwehi? Ya n’oyo mukama wiwe asighira abaghombe b’enyumba yiwe eritheya n’erihabo akalyo kabu okwa mughulhu atholere.” (Matayo 24:3, 45; Mariko 13:3, 4) Yesu akakasaya abigha biwe athi iyo ‘ng’omukama’ wabu, akendi syahiraho abakendi syabya ibanemulisya bunyakirimu abakamwikiriraya omwa biro by’enduli. Ni bahi abangabere omughombe oyu?

Ni kathunga akaliko baghalha babu Yesu abake ab’okwa bahakabibwa. “Omughombe” k’Akathunga Akakasondolha aka Bema ba Yehova. Kakaghabira abaramya ba Yehova abalikyabo b’ebyalya by’obunyakirimu okwa ndambi eyitholere. Thuyikethere omughombe oyutheleghulha oyu erithuha ‘erighabo lyethu ly’akalyo okwa mughulhu atholere.’—Luka 12:42.

Kakatheghaya ab’enyumba ya Nyamuhanga. (1 Timoteo 3:15) Yesu mwaha omughombe y’olhukwamirwa olhulithohire olhw’eritheya omubiiri ow’ekitsweka eky’okwa kithunga kya Yehova eky’okwa kihugho, ni bugha ambu, eritheya ebindu eby’ekithunga ekyo, erisondolha omubiiri w’erithulira, n’erithukangirirya erilhabira omwa bithunga byethu. Neryo erithoka erithuha ebya thukayithagha okwa ndambi eyitholere, “omughombe oyutheleghulha n’ow’amenge” anemuhulhukya ebyalya by’obunyakirimu omw’ikolesya ebitabu ebya thukakolesaya omw’ithulira, n’erilhabira omwa mihindano yethu, emike-mike n’eminene-minene.

Omughombe oyu ni muthaleghulha kundi syalihengemaya ekwenene eyiri omwa Biblia kandi akalholha embere erikolha omubiiri wiwe ow’erithulha engulhu yuwene, kandi ni w’amenge erikwamana ngoku akatheghaya ndeke emyatsi ya Kristo eyiri okwa kihugho. (Emibiri 10:42) Ebyalya bingyi eby’obunyakirimu n’abandu banene eryasa omwa kwenene, kikakanganaya ngoku Yehova anemutsumulha omubiiri w’omughombe oyu.—Isaya 60:22; 65:13.

• Nindi oyo Yesu asombolha erilisya abigha biwe bunyakirimu?

• Omughombe ni muthaleghulha kandi w’amenge omwa nziraki?