Omukobe Oyuwabya Akowa Nyamuhanga

Yozefu abya mughuma w’okwa baghalha ba Yakobo abalere. Bakulhu biwe mubalhangira ngoku Yozefu yuwanzibirwe kutsibu na thatha wabu. Wukalengekanaya mubayowa bathi busana n’ekyo? Mubakwa Yozefu y’obuha kandi mubamupona. Kiro kighuma Yozefu abere alhotha ebilhotho ebikaswekaya, mwabibwirako baghalha babu. Mubalhangira ngoku ebilhotho ebyo bikamanyisaya bithi kiro kighuma bakendi syamunamira. Ekyo ibbwa mukyaleka ibongera erimupona!

Kiro kighuma baghalha babu Yozefu babya ibane mulisya esyombuli hakuhi n’etawuni eye Sekemu. Yakobo mwathuma Yozefu eriyalebya nga baliyo bathi. Mubalhangira Yozefu ya haali iniane mwasa neryo bamabwirana bathi: ‘Ow’ebilhotho siyolya anemwasa. Muleke thumwithe!’ Mubamuhamba n’erimughusa omwa kyuna. Aliwe ya Yuda, omughuma w’okwa baghalha babu, mwabugha athi: ‘Simumwithe! Kamwanya thumughulhaye ng’omukobe.’ Neryo mubaghulya Yozefu oko basuburi Abamidiani ababya ibakaghenda e Misiri, bamabaha ebihandi 20 by’efeza.

Neryo baghalha babu Yozefu mubahira ekanzu yiwe y’omwa musasi w’embene, bamathumira thatha wabu y’ekanzu eyo, bathi: ‘Eyi si kanzu ya mughalha wawu?’ Neryo Yakobo mwalengekania athi ebisoro by’omoli byabir’itha Yozefu. Mukyamwitha bulighe bunene. Isihali oyuwanga muhumulikania.

E Misiri, Yozefu mwaghulibwa ng’omukobe oko mukulhu mughuma oyukahulhawamu Potifari. Aliwe Yehova abya iniane na Yozefu. Potifari mwalhangira ngoku Yozefu aby’asi ndeke erikolha emibiiri kandi ini muyisiwa. Ekyo mukyaleka Yozefu iniahebwa obukulhu obw’eritheya ebindu byosi bya Potifari.

Mukali wa Potifari mwalhangira ngoku Yozefu abya mubuya kandi w’amani. Obuli kiro iniakabwira Yozefu athi akesaye nayu. Yozefu angakolireki? Mwaghana n’eribugha athi: ‘Eyihi! Ni kibi. Mukama waghe anyiyikethere, kandi wuli mukali wiwe. Namakesya nawu, inamakolha ekibi embere sya Nyamuhanga!’

Kiro kighuma mukali wa Potifari mwalengesya erikaka Yozefu erikesya nayu. Mwamuhamba omw’imukura kw’esyongyimba, aliwe Yozefu amathibitha. Potifari abere akahika eka wiwe, mukali wiwe mwamubwira athi Yozefu mwakanza erimuhamba. Abya iniakabugha amabehi. Potifari mwahithana kutsibu, neryo mwahira Yozefu y’omwa ngomo. Aliwe Yehova mwath’ibirirwa Yozefu.